JOBO 17

₁“Moea oa ka o tetebetse,

matsatsi a ka a khutsufetse,

bitla le lona le nkemetse.

₂Basomi ba mpota-potile,

mahlo a ka a talimile bora ba bona.

₃“Nkholoe, Molimo, ke bua 'nete,

ha ho na e mong ea ka mpakelang;

₄kelello tsa bona u li thithibantse,

kahoo u se k'a b'a ba thusa,

ba hlōla.

₅Ea èkang motsoalle

ho fumana moputso,

bana ba hae ba tla lebella

mahlo a b'a khathale.

₆“Ho bohle

ke se ke fetohile sesomo,

fahleho sa ka ba se tšoela ka mathe;

₇mahlo a ka a fifalitsoe ke masoabi,

litho tsa ka tsohle e s'e ka seriti.

₈Hona batho ba lokileng

ba ho makaletse,

ba se nang molato

ba nyatsa ba khopo;

₉ea lokileng

o tla tiisetsa tseleng ea hae,

ea matsoho a hloekileng

a 'ne a matlafale.”

₁₀“Lōna bohle, boelang le leke hape!

Feela har'a lōna

ha ke bone mohlalefi.

₁₁Matsatsi a ka a fetile,

merero ea ka e nyōpile;

takatso tsa pelo ea ka

le tsona li nyōpile.

₁₂Bosiu ba bo fetola motšeare,

ha ho le lefifi ba re:

‘Seli le haufi!’

₁₃Haeba hae la ka ke Qalo ea Bafu,

eba phate tsa ka ke li ala lefifing;

₁₄haeba ke re ho lebitla:

‘Ke uena ntate,’

ho sebōkō ke re:

‘U 'mè, u khaitseli,’

₁₅ebe joale tšepo ea ka e tla ba kae?

Ebe ke mang ea tla e bona?

₁₆E tla theohela le 'na lebitleng,

e theohele le 'na lerōleng.”