JOBO 15

₂“Na mohlalefi

a ka bèbèra manenekoane,

a pipitleloa ke moea

oa ho phorohla?

₃A phea khang

ka ho bua mafeela-feelane,

kapa ka puo tse sa thuseng letho?

₄Ho tšaba Molimo

u ho phephethetse hōle le uena,

ho rapela Molimo

hona ua ho felisa.

₅Puo tsa hao

li susumetsoa ke bokhopo ba hao,

boqhoeqhoele

bo ntlheng ea leleme la hao.

₆Ha u tsuoe ke 'na,

u tsuoa ke lipuo tsa hao,

molomo oa hao

ke oona paki-motšoaeli.

₇“Ebe ke uena

motsoaloa-pele oa motho?

Kapa u bōpiloe pele ho maralla?

₈Na merero ea phiri tsa Molimo

oa e tseba?

Na bohlale bona

ebe ke ba hao u le inotši?

₉U tseba life

tseo re se nang tsebo ea tsona?

U utloisisa life

tseo re se nang kutloisiso ea tsona?

₁₀Bo-raputsoe le maqheku

ba ka hlakoreng la rōna,

banna-baholo ba boneng letsatsi

pele ho ntat'ao.

₁₁“Na matšeliso a Molimo

ua a halala,

le mantsoe a buuoang ka bonolo

tsèbeng tsa hao?

₁₂U lumella'ng ho roaloa

ke pelo ea hao?

Mahlo a hao 'ona

a tukela'ng malakabe,

₁₃hoo u hlatsetsang

khalefo ea hao ho Molimo,

u buang puo tse tjee,

ka molomo oa hao?

₁₄“Motho ke ntho 'ngoe,

hoo a ka bang le tlhoeko?

Ea tsoetsoeng ke mosali

eena a ka loka joang?

₁₅Haesita Molimo

a sa tšepe mangeloi a hae,

mahlong a hae

le maholimo a sa hloeka,

₁₆a ka tšepa motho joang,

a le manyala, a tletse polile,

a momorotsa bokhopo

sa metsi a mophoko?”

₁₇“Thea tsèbè, u mamele,

ke u manollèlè,

ke u bolelle tseo ke li boneng

ka mahlo a ka;

₁₈tse boletsoeng

ke banna ba bahlalefi,

ba li bolela ba sa pate letho,

ba bolela tseo ba li utloileng,

ho bahōlō-hōlō ba bona;

₁₉bona bao naha e neng

e abeloe bona feela,

ho se molata o jakileng har'a bona.

₂₀“Ea khopo

o khoebethoa ke letsoalo,

le mo khoebetha

ka tšiu tsohle tsa hae,

mohatelli le eena

le a mo khoèbetha,

le mo khoèbethe

ka lemo tsohle tsa bophelo ba hae.

₂₁Tsèbè tsa hae li tlala

melumo e tšosang,

haeka tsohle li ea hantle

batupi ba mo hlasele.

₂₂O lahlehetsoe ke tšepo

ea ho tsoa kahar'a lefifi,

kae-kae sabole le eona e mo laletse.

₂₃O lelera le naha, a batla lijo,

a ntse a botsa hore na li kae;

oa tseba, tsatsi la timelo ea hae

le atametse;

₂₄matšoenyeho le mahlōkō

a mo kenya letsoalo,

a mo pupetsa

sa khosi e khatheng la ho futuha,

₂₅hoba o kokoselitse Molimo letsoho,

o iketsa senatla ho Ea Matla 'ohle.

₂₆O mo khōrōhela

a satalalitse molala,

thèbè e shahlileng

a e utlile ka mallèla.

₂₇“Le hoja a le fahleho se matlebele,

theka la hae le le maphethe-phethe,

₂₈o tla phela metseng e le lithako,

matlung a seng a setse a le feela,

a khatheng la ho fetoha masupi.

₂₉Ha a ka ke a hlola a ba a rua,

matlotlo a hae 'ohle a tla timela,

fatše le ke ke la aneloa

ke maruo a hae.

₃₀A ke ke be a phonyoha lefifing,

lakabe le tla chesa mahlaku a hae,

khalefo ea Molimo e mo timetse!

₃₁A se ithetse ka ho tšepa mafeela,

hobane mafeela

e tla ba oona moputso oa hae.

₃₂Pele a e-shoa hoo ho tla etsahala,

makala a hae a ke ke be a tlōkōma.

₃₃O tla tšoana le morara

o hlōhlōrang tholoana li sa le tala,

joaloka mohloaare o hlōhlōrang,

o hlōhlōrang thunthung tsa oona.

₃₄“Ba khopo

ba ke ke ba ba le litlōhōlō,

mollo o tla chesa matlo

a ba phelang ka tjotjo.

₃₅Ba emōla tlokotsi,

ba tsoale bokhopo,

thetso ke eona

ngoan'a pōpelo ea bona.”