JOBO 12

₂“Ha ho pelaelo,

batho ke lona feela!

Bohlale bo tla ea le lōna lebitleng.

₃Le 'na ke na le kelello joaloka lōna,

etsoe le hona ha le mphete ka letho;

ke mang ea sa tsebeng

lintho tsee tsohle?

₄Kajeno ke fetohile sesomo

ho metsoalle,

ke fetohile sesomo ke lokile,

ke se na koli,

'na ea neng a ipiletsa ho Molimo,

a nkarabe.

₅Ba iketlileng

ba nyelisa bomalimabe,

ba re ke pheletso

ea ba khatheng la ho thèlla.

₆Malapeng a batupi

teng ho rena khotso,

ba phephetsang Molimo

ba phela ka boiketlo,

bao matla a bona

e leng oona molimo oa bona.

₇“Ak'u botse liphoofolo,

tsona li tla u ruta,

nonyana tsa leholimo

le tsona li u kaele;

₈u buele lefatše le tle le u rupele,

le tlhapi tsa leoatle li ke li u qoqele.

₉Ke efe ho tsona tsohle

e hlokang tsebo

ea hore Morena o entse tsohle

ka letsoho la hae?

₁₀Bophelo ba sebopuoa ka seng

bo matsohong a hae,

le meea ea batho bohle

e phela ka eena.

₁₁Ha ke re tsèbè

e mamela ho khetha mantsoe,

joalokaha leleme

le khetha lijo ka ho li latsoa?

₁₂Bohlale ba sebele

bo hahetse ho bo-raputsoe,

ho phela halelele

ho fana ka kutloisiso.

₁₃“Empa bohlale le matla

tsona ke tsa Molimo,

ke eena mong'a kelello

le kutloisiso;

₁₄moo a helelitseng

ho ke ke ha tsosoa marako,

eo a mo kentseng chankaneng

a ke ke a lopolloa.

₁₅Ha a thibela pula,

metsi a pshela ruri,

ha a nesa ea litloèbèlèlè,

fatše lohle lea senyeha.

₁₆Matla le bohlale ba sebele

ke tsa hae;

mothetsi le mothetsuoa

ba matleng a hae.

₁₇Baeletsi o ba tlosa

ba se na le nketlana,

baahlōli bona

a ba fetole litšeretšere!

₁₈O lōkōlla mahlaahlela

a likhosi a bohatelli,

mathekeng a tsona

a khaole maqhama a puso;

₁₉baprista o ba tlosa

ba se na le nketlana,

linatla tsona a li theole

tulong tsa tsona;

₂₀baeletsi ba 'makhonthe

a ba fetole limumu,

maqheku 'ona a a amohe meelelo.

₂₁O soma mahosana, a a teōle,

a kokobetse boikalatiso

ba mahosana;

₂₂a senole le liphiri tsa mafifing,

meriti e metšo

a e chabisetse leseli.

₂₃O hōlisa lichaba

a be a li timetse,

a li anafatse, a be a li hasanye;

₂₄babusi ba lichaba

a ba amohe meelelo,

a ba lelerise mahoatateng

ho se na tsela,

₂₅ba phōphōletse lefifing

ho se leseli,

a ba thekeselise

sa mahlena a bo habotse.”