Jobo o re na Molimo o mo sotlela'ng
1“Bophelo bona ba ka bo ntenne,
kahoo ke tla bolelisa
tsa ka lipelaelo,
ke bue moea oa ka o tubehile.
2Ke tla re ho Molimo:
‘Se ke be ua nkahlōla;
mpolelle tseo u nqosang ka tsona.
3U bona ho le molemo
ho 'na u nkataka,
u nyelisa 'mōpo oa matsoho a hao,
u thabela merero ea ba khopo?
4Na u na le mahlo a nama?
Na u bona joalokaha batho ba bona?
5Na tšiu tsa hao
li tšoana le tšiu tsa batho?
Na ngoaha tsa hao
li tšoana le ngoaha tsa batho?
6Ha e le moo u tsoile bosele
ho tsoma bokhopo ba ka,
u batla, u batlisisa le sebe sa ka?
7Uena ua tseba
ho 'na bokhopo ha bo eo,
'me ha ho ea ka ntopollang
matsohong a hao.
8“ ‘Kahohle-hohle ke bōpiloe
ke matsoho a hao,
empa joale
ke se ke timetsoa ke uena!
9Ak'u hopole,
u mpōpile seka letsopa;
na u tla nkhutlisetsa lerōleng hape?
10Na ha u nqhatsa
joalokaha ho qhatsoa lebese,
ua mphèhla
joalokaha leokoana le fèhloa?
11Ua nkapesa
ka letlalo le ka linama,
ua ntlamahanya
ka masapo le ka mesifa?
12U 'neile bophelo,
ua ba ua 'nea lerato,
ua mpōlōka,
ua baballa le moea oa ka.
13“ ‘Tsena e n'e le kunutu
la pelo ea hao,
kea tseba,
tsena e n'e le morero oa hao:
14Ha ke etsa sebe
u ntalima ka le nchocho,
u ke ke ua ntōkōlla molatong oa ka.
15Haeba ke molato
bomalimabe ke ba ka!
Leha ke se molato
nke ke ka talima motho,
ke hlajoa ke lihlong
ke loeba ka har'a tlokotsi.
16Ha hlooho ea ka e phahama
u tla ntsoma joaloka tau,
u ntlhokofatsa
ka ho nketsetsa limakatso.
17U tlisa paki tse ncha
ho 'nyopisetsa bopaki,
le khalefo ea hao
e ntlōkōmela ho feta,
mara a hao
a mphutuhela ka mekhahlelo.
18“ ‘Ke hobane'ng u entseng
hore ke tsoaloe?
Eka nkabe ke shoele
ke e-s'o bonoe ke motho!
19Eka nkabe ke sa k'a ba ka tsoaloa,
kapa ka isoa lebitleng
ha ke qeta ho tsoaloa!
20Tšiu tsa ka li khutšoanyane,
lia feta;
ak'u ntlohele,
ke re khefu! ho se hokae,
21ke e-s'o ikele koana bo-ea-batho,
fatšeng le lefifi,
le meriti e metšo;
22fatšeng le lefifi la bo-nka-ntjana,
moo e leng lapeng habo morusu,
moo seli la teng e leng lefifi!’ ”
