JOHANNE 20

₁Ka letsatsi le qalang beke, Maria oa Magadala a ea lebitleng kameso, ho sa le lefifi, 'me a bona lejoe le tlositsoe lebitleng. ₂Joale a matha, a tla ho Simone Petrose le ho morutuoa e mong eo Jesu a neng a mo rata, a re ho bona: “Ba tlositse Morena lebitleng, 'me ha re tsebe moo ba 'meileng teng!”

₃Petrose le morutuoa eo e mong ba tloha, ba ea lebitleng. ₄Bobeli ba bona ba matha hammoho, empa morutuoa eo e mong a siea Petrose ka lebelo, a fihla pele lebitleng. ₅Ha a nyarela, a bona masela a beiloe fatše, empa a se ke a kena. ₆Simone Petrose a tla a mo setse morao, a kena ka lebitleng, 'me a bona masela a le fatše. ₇Lesela le neng le le hloohong ea hae le ne le se maseleng a mang, empa le ne le phuthiloe le le leng sebakeng se kathōko. ₈Eaba morutuoa eo e mong ea fihlileng pele lebitleng, le eena oa kena, a bona, 'me a lumela, ₉hobane ba ne ba e-s'o utloisise Mangolo a reng eka khona a tsōhe bafung. ₁₀Joale barutuoa ba khutlela hae.

₁₁Maria oa Magadala o ne a eme kantle, pel'a lebitla, a ntse a lla. Ha a ntse a lla, a nyarela ka lebitleng. ₁₂Eaba o bona mangeloi a mabeli a apereng liaparo tse tšoeu a lutse, le leng ka hloohong, le leng ka maotong, moo setōpō sa Jesu se neng se beiloe teng.

₁₃A re ho eena: “Mosali, u llela'ng?”

A re ho 'ona: “Ba tlositse Morena oa ka, 'me ha ke tsebe moo ba 'meileng teng.” ₁₄Eare ha a rialo, a reteleha, 'me a bona Jesu a eme, feela a se ke a tseba hore ke Jesu.

₁₅Jesu a re ho eena: “Mosali, u llela'ng? U batla mang?”

Eena, ka ho hopola hore ke molemi oa serapa, a re ho eena: “Monghali, haeba ke uena ea mo tlositseng, mpolelle moo u 'meileng teng, 'me ke tla ea mo nka.”

₁₆Jesu a re ho eena: “Maria!”

A reteleha, a re ho Jesu ka Seheberu: “Rabbuni!” ke ho re: Moruti!

₁₇Jesu a re ho eena: “U se ke ua ntšoara, hobane ha ke e-s'o nyolohele ho Ntate, empa e-ea ho bana beso, 'me u ba bolelle, u re: ‘Ke nyolohela ho Ntate, le Ntat'a lōna, Molimo oa ka, le Molimo oa lōna!’ ”

₁₈Maria oa Magadala a ea behela barutuoa, a re: “Ke bone Morena!” A bolela le tseo Jesu a 'moleletseng tsona.

₁₉Mantsiboeeng a letsatsi leo le qalang beke, ha menyako ea moo barutuoa ba neng ba le teng e notletsoe ka baka la ho tšaba Bajuda, Jesu a tla, a ema har'a bona, a re ho bona: “Khotso e be le lōna!” ₂₀Hoba a rialo, a ba bontša matsoho a hae le lehlakore. Barutuoa ba thaba ha ba bona Morena.

₂₁Jesu a re ho bona hape: “Khotso e be le lōna; joalokaha Ntate a nthōmile, le 'na kea le rōma.” ₂₂Hoba a rialo, a bululela moea ho bona, a re: “Amohelang Moea o Halalelang! ₂₃Bao le ba tšoarelang libe, ba li tšoaretsoe; bao le ba ballang tsona, ba li baletsoe.”

₂₄Thomase, e mong oa ba leshome le metso e 'meli, ea bitsoang Lefahla, o ne a le sieo har'a bona ha Jesu a fihla. ₂₅Barutuoa ba bang ba re ho eena: “Re bone Morena.”

Empa a re ho bona: “Ha ke sa bone maqeba a lithakhisa matsohong a hae, ka kenya monoana oa ka masobeng a lithakhisa, 'me ka kenya letsoho la ka lehlakoreng la hae, ha nka ke ka lumela.”

₂₆Kamora' matsatsi a robeli, barutuoa ba hae ba ne ba le ka tlung hape, Thomase a e-na le bona. Jesu a kena, menyako e ntse e notletsoe, a ema hare, a re: “Khotso e be le lōna!” ₂₇Eaba o re ho Thomase: “Tlisa monoana oa hao mona, u bone matsoho a ka; u tlise le letsoho la hao, u le kenye lehlakoreng la ka, 'me u se ke ua hloka tumelo, u mpe u be le tumelo.”

₂₈Thomase a araba, a re ho eena: “Morena oa ka le Molimo oa ka!”

₂₉Jesu a re ho eena: “Na u lumetse kahobane u mpone? Ho lehlohonolo ba lumelang leha ba sa ka ba bona.”

₃₀Jesu o ile a etsa mehlolo e meng e mengata moo barutuoa ba hae ba ntseng ba bona, e sa ngoloang bukeng ena. ₃₁Empa tsena li ngotsoe hore le tle le lumele hore Jesu ke Kreste, Mora oa Molimo, le hore ka ho lumela le tle le be le bophelo ka lebitso la hae.