Thapelo ea Jesu
1Jesu a bua tsena, 'me a lelaletsa mahlo leholimong, a re: “Ntate, nako e fihlile; tlotlisa Mora oa hao, hore Mora a tle a u tlotlise, 2joalokaha u mo neile matla holim'a batho bohle, hore bohle bao u mo neileng bona, a tle a ba nee bophelo bo sa feleng. 3Bophelo bona bo sa feleng ke hore ba u tsebe, u le Molimo a le mong, oa 'nete, le Jesu Kreste eo u mo rōmileng. 4Ke u tlotlisitse lefatšeng, ke phethile mosebetsi oo u 'neileng oona hore ke o etse. 5Joale, uena Ntate, ntlotlise kapele ho uena ka tlōtla eo ke bileng le eona ho uena, lefatše le e-s'o be teng.
6“Bao u 'neileng bona lefatšeng, ke ba rutile lebitso la hao. E ne e le ba hao, u 'neile bona, 'me ba bōlōkile lentsoe la hao. 7Joale ba tsebile hore tsohle tseo u 'neileng tsona li tsoa ho uena, 8hobane mantsoe ao u 'neileng 'ona, ke ba neile 'ona. Ba a amohetse, ba tsebile kannete hore ke tsoa ho uena, 'me ba lumetse hore u nthōmile. 9Kea ba rapella; ha ke rapelle lefatše, empa ke rapella bao u 'neileng bona, hobane ke ba hao. 10Tsohle tsa ka ke tsa hao, le tsa hao ke tsa ka, 'me ke tlotlisitsoe ka bona. 11Ha ke sa le lefatšeng, empa bona ba ntse ba le lefatšeng, athe 'na ke tla ho uena. Ntate ea halalelang, u ba bōlōke ka lebitso la hao leo u 'neileng lona, hore ba be ntho e le 'ngoe joaloka rōna. 12Ha ke ne ke sa na le bona, ke ba bōlōkile ka lebitso la hao leo u 'neileng lona, ka ba sireletsa, 'me ha hoa timela le ea mong oa bona, haese ea lōketseng ho timela, hore Mangolo a tle a phethahale.
13“Joale ke tla ho uena. Ke bua tsena ke sa ntse ke le lefatšeng, hore ba be le thabo ea ka e phethehileng ka ho bona. 14Ke ba neile lentsoe la hao, 'me lefatše le ba hloile, hobane hase ba lefatše, joalokaha le 'na ke se oa lefatše. 15Ha ke rapele hore u ba tlose lefatšeng, empa e le hore u ba sireletse ho E Mobe. 16Hase ba lefatše, joalokaha le 'na ke se oa lefatše. 17Ba halaletse 'neteng; lentsoe la hao ke 'nete. 18Joalokaha u nthōmile lefatšeng, le 'na ke ba rōmile lefatšeng, 19'me ke ikhalaletsa ka baka la bona, hore le bona ba halaletsoe 'neteng.
20“Ha ke rapelle bona feela, empa ke rapella le ba lumelang ho 'na ka lentsoe la bona, 21hore bohle ba tle ba be ntho e le 'ngoe, joalokaha uena, Ntate, u le ka ho 'na, le 'na ke le ka ho uena, hore le bona ba tle ba be ka ho rōna, lefatše le tle le lumele hore u nthōmile. 22Tlōtla eo u 'neileng eona ke ba neile eona, hore ba tle ba be ntho e le 'ngoe, joalokaha le rōna re le ntho e le 'ngoe: 23'Na ka ho bona le uena ka ho 'na, hore ba be ntho e le 'ngoe ka botlalo, lefatše le tle le tsebe hore u nthōmile, le hore u ba ratile joalokaha u nthatile.
24“Ntate, bao u 'neileng bona, ke rata hore moo ke leng teng le bona ba be hona teng, hore ba bone tlōtla ea ka, eo u 'neileng eona, hobane u nthatile ho e-s'o theoe lefatše.
25“Ntate ea lōkileng, lefatše ha lea ka la u tseba, empa 'na ke u tsebile, 'me bana ba tsebile hore u nthōmile. 26Ke ba tsebisitse lebitso la hao, 'me ke tla 'ne ke ba tsebise lona, e le hore lerato leo u nthatileng ka lona le tle le be ka ho bona, le 'na ke be ka ho bona.”
