JOHANNE 14

₁“Pelo tsa lōna li se ferekane. Lumelang ho Molimo; le ho 'na le lumele. ₂Ka tlung ea Ntate ho na le meaho e mengata; hoja ha ho joalo, nkabe ke le boleletse, hobane ke ea ho le lōkisetsa bolulo. ₃Ha ke se ke ile, ke le lōkiselitse bolulo, ke tla boela ke tle ke le nkele ho 'na, hore moo 'na ke leng teng, le lōna le be hona teng. ₄Ebile moo ke eang, tsela ea teng lea e tseba.”

₅Thomase a re ho eena: “Morena, ha re tsebe moo u eang teng; tsela re ka e tseba joang na?”

₆Jesu a re ho eena: “Ke 'na tsela, le 'nete, le bophelo; ha ho ea ka tlang ho Ntate haese ka 'na. ₇Ha le ntseba, le Ntate lea mo tseba. Ho tloha joale lea mo tseba, le bile le 'mone.”

₈Filipi a re ho eena: “Morena, re bontše Ntate, ebe ho re lekane.”

₉Jesu a re ho eena: “Ke bile le lōna nako e kaakaale, empa ha ua ka ua ntseba, Filipi? Ea mponeng o bone Ntate; u bolela joang ha u re: ‘Re bontše Ntate?’ ₁₀Na ha u lumele hore ke ka ho Ntate, le Ntate o ka ho 'na na? Lipolelo tseo ke le bolellang tsona, ha ke li bolele li e-tsoa ho 'na, empa Ntate ea lulang ka ho 'na o etsa mesebetsi ea hae. ₁₁Ntumeleng ha ke re ke ka ho Ntate, le Ntate o ka ho 'na, ha le sa ntumele, lumelang ka baka la eona mesebetsi eo. ₁₂Kannete-nete, kea le bolella, ea lumelang ho 'na, le eena o tla etsa mesebetsi eo ke e etsang, a etse le e fetang ena, hobane ke ea ho Ntate. ₁₃Eng le eng eo le e kōpang ka lebitso la ka, ke tla e etsa, hore Ntate a tlotlisoe ka Mora. ₁₄Ha le kōpa eng kapa eng ka lebitso la ka, ke tla e etsa.

₁₅“Haeba lea nthata, le tla bōlōka litaelo tsa ka. ₁₆Ke tla kōpa Ntate, 'me o tla le nea Mothusi e mong, hore a be le lōna ka ho sa feleng, ₁₇e leng Moea oa 'nete, oo lefatše le ke keng la o amohela, hobane ha le o bone leha e le ho o tseba; lōna lea o tseba hobane o lula le lōna, 'me o ka ho lōna. ₁₈Ha ke na ho le siea le le likhutsana, ke tla tla ho lōna. ₁₉Ho se ho se hokae, 'me lefatše ha le sa tla mpona, empa lōna lea mpona, hobane kea phela, le lōna le tla phela. ₂₀Mohlang oo le tla tseba hore ke ka ho Ntate, 'me lōna le ka ho 'na, le 'na ke ka ho lōna. ₂₁Ea nang le litaelo tsa ka, 'me a li bōlōka, ke eena ea nthatang; ea nthatang o tla ratoa ke Ntate, le 'na ke tla mo rata, 'me ke tla iponahatsa ho eena.”

₂₂Judase, e seng Judase Isekariota, a re ho eena: “Morena, ho tla joang hore ebe u se u tla iponahatsa ho rōna, e seng ho lefatše na?”

₂₃Jesu a mo araba, a re: “Ha motho a nthata, o tla bōlōka lentsoe la ka, 'me Ntate o tla mo rata, re tla tla ho eena, 'me re lule ka ho eena. ₂₄Ea sa nthateng ha a bōlōke mantsoe a ka, 'me lentsoe leo le le utloang hase la ka, empa ke la Ntate ea nthōmileng.

₂₅“Ke buile tsena ho lōna ke sa ntse ke e-na le lōna, ₂₆empa Mothusi, Moea o Halalelang oo Ntate a tla o rōmela lebitsong la ka, eena o tla le ruta tsohle, a le hopotse tsohle tseo ke le boleletseng tsona. ₂₇Ke le siela khotso, ke le fa khotso ea ka; ha ke le fe kamoo lefatše le fanang kateng. Pelo tsa lōna li se ferekane, leha e le ho ba boi.

₂₈“Le utloile hore ke le boleletse, ka re: ‘Kea ea, 'me ke tla khutlela ho lōna.’ Haeba le ne le nthata, le ka be le thabile, hobane ke ea ho Ntate, kaha Ntate o moholo ho 'na. ₂₉Ke le boleletse e sa le joale, pele ho etsahala, hore ha ho etsahala le tle le lumele. ₃₀Ha ke sa tla bua tse ngata le lōna, hobane 'musi oa lefatše oa tla. Ha a na matla holim'a ka, ₃₁empa lefatše le tšoanetse ho tseba hore ke rata Ntate, 'me ke etsa joalokaha Ntate a ntaetse. Emang, a re tloheng mona.”