JEREMIA 46

₃“Tšoarang thèbè tsa lōna,

le tšoare le lithejana,

le teōlōhe, le thèè theko ea ntoa!

₄Qhanehang lipere le li palame!

Thèang thekō

le roetse katiba tsa ntoa!

Tšotsang marumo,

le apare tsa ntoa!

₅Ke'ng ha ke bona

ba se ba phakhasela,

ba furaletse, ba se ba etsa sealō?

Linatla tsa bona fatše li tjapaletse,

ke mphete-ke-u-fete,

morao ha ba sa hetla,

ka nkong tsa bona

ho nkha lefu feela!”

₆“Ba nang le sekaja

maoto a bona aa katleha,

linatla tsa bona

ha li ka ke tsa phonyoha;

bohle baa khōthōmetseha,

baa pōlōpōqana,

ba oela ka lebōea

ho nōka ea Euferatese.

₇“Ke mang eo ea tlang

sa nōka ea Nile e sabaletse,

ea tlang

sa nōka tsa metsi a bilohang?

₈Ke Egepeta e tlang

sa Nile e sabaletse,

e tlang

sa nōka tsa metsi a bilohang.”

Egepeta e re:

“Ke tla saballa,

ke aparele lefatše,

metse ke e timetse

'moho le baahi ba eona.”

₉Morena o re:

“Futuhang lōna banna ba lipere!

Khannang ka sekhahla

lōna ba likariki!

Teōlōhang lōna banna ba bahlabani,

banna ba Kushe le ba Pute,

matšoara-thèbè,

banna ba Lōde ba fulang ka liqha!

₁₀Lena ke tsatsi la Morena,

Molimo oa mabōtho,

tsatsi la boiphetetso,

ho lira tsa hae;

sabole e tla bolaea

ho fihlela mali a khanathetse,

e bolaee ho fihlela mali a e tahile.

Morena Molimo oa mabōtho,

o tla etsa sehlabelo,

a se etse naheng

e ka lebōea ho Euferatese.

₁₁“Nyolohela Gileade

u fumane moriana teng,

uena moroetsana,

morali oa Egepeta;

u sebelisitse tlhare tse ngata

ho se katleho,

le ho phekoleha

ha ua ka ua phekoleha.

₁₂Chaba li utloile

ho tlontloloha ha hao,

fatše lohle le tletse

seboko sa hao,

senatla se thulane

le senatla se seng,

bobeli ba tsona

tsa oela fatše 'moho.”

₁₄“Bolelang tsena Egepeta,

le li phatlalatse Migedole,

le li phatlalatse le Nofa

le Tahepanehese, le li bolele,

le re:

Emang le tiile,

le itokisitse,

hobane sabole e tla bolaea

ba le pota-potileng.

₁₅Apise, molingoan'a hao

o fefoloa ke'ng?

O sitiloe ho setlela

hoba Morena o mo lihile.

₁₆Morena o khōthōmelitse

ba le bangata,

mohlabani

a oela holim'a mohlabani.

Ba re:

‘Tsohang, a re khutleleng

chabeng sa habo rōna,

re khutleleng naheng

ea tsoalo ea rōna,

re baleheng sabole ea mokataki.’

₁₇Teng ba tla hōoeletsa, ba re:

‘Faro, khosi ea Egepeta,

o shoahla haholo;

menyetla ea hae e se e mo fetile.’

₁₈“Kea tiea, kea hlapanya,”

ho rialo Khosi,

Khosi eo bitso la eona

e leng Molimo oa mabōtho;

“E mong o tla tla

sa Tabore har'a lithaba,

a tle sa Karamele e pel'a leoatle.

₁₉Tlamang thōtō ea lōna

le be baphaphathehi,

lōna matsoalloa a naha ea Egepeta,

hoba Nofa e tla ba nanaōla,

e hloke baahi.

₂₀“Egepeta e ka sethole se setle-setle,

empa sebōba se tsoang lebōea

se tla e lōmaka.

₂₁Bahlabani ba hiriloeng ke Egepeta,

ba ka manamane a nontšitsoeng;

le bona ba tla phekhōha,

ba balehe kaofela,

ha ba ka ke ba tseba ho ema senna,

hobane tsatsi la koluoa

le ba fihletse,

ba fihletsoe ka nako ea bona,

nako ea ho ahlōloa.

₂₂Egepeta e tla hoasa

e hoase sa noha e baleha,

e hoase ha sera se e-tla ka sekhahla;

ba tla e futuhela ba tšoere lilepe,

ba li tšoere

sa banna ba rema lifate.

₂₃Moru oa Egepeta

ba tla o khethula,”

“ba o khethule leha o opane haholo,

hobane ba feta le litsie ka boieane,

palo ea bona hase e ka ba ea baloa.

₂₄Baegepeta ba tla tlontloloha,

ho neelanoe ka bona

ho batho ba tsoang lebōea.”

₂₇“Uena mohlanka oa ka Jakobo,

u se ke ua tšaba,

uena Iseraele, u se ke ua tsieleha,

hoba ke tla u pholosa

u le naheng e hōle,

le litlōhōlō tsa hao

naheng ea bothōpuoa.

Jakobo o tla khutla,

a be le khotso le boiketlo,

ho se be ea ka hlolang

a 'makela tšabo.

₂₈Uena mohlanka oa ka Jakobo,

u se ke ua tšaba,

hobane ke na le uena,”

“Lichaba tsohle ke tla li timetsa,

lichaba tseo

ke u leleketseng har'a tsona,

empa uena ha u ka ke

ua timella ruri;

ke tla u ahlōla, feela e le ka toka,

nke ke ka u tlohela

u sa ahlōloa ho hang.”