Jeremia o isoa Egepeta
1Hoba Jeremia a qete ho bolella sechaba sohle mantsoe 'ohle a Morena Molimo oa sona, mantsoe 'ohle ao Morena Molimo oa sona, a neng a mo rōmme ho se bolella 'ona, 2bo-Asariea, mora oa Hoshaea, le Johanane, mora oa Karea, le banna bohle ba ikakasang, ba re ho Jeremia: “U bua leshano! Morena Molimo oa rōna, ha a ea u rōma hore u re: ‘Le se ke la ea jaka Egepeta!’ 3Ke Baruke, mora oa Neriea, ea u hlohleletsang hore u neelane ka rōna matsohong a Bakalatiea, ba tle ba re bolaee, kapa ba re ise Babilona, bothōpuoeng.”
4Kahoo bo-Johanane, mora oa Karea, le balaoli bohle ba mabōtho, le sechaba sohle, ba se ke ba mamela lentsoe la Morena, la hore ba ahe naheng ea Juda. 5Empa bo-Johanane, mora oa Karea, le balaoli bohle ba mabōtho, ba nka masalla 'ohle a Juda, a neng a khutletse naheng ea Juda ho tla aha ho eona, a e-tsoa lichabeng tsohle tseo a neng a qhalanetse ho tsona. 6Ba nka le banna le basali, le bana le barali ba khosi, le batho bohle bao Nebusaradane, molaoli oa balebeli ba khosi, a neng a ba siile le Gedaleea, mora oa Ahikama, setlōhōlō sa Shafane, le moporofeta Jeremia, le Baruke, mora oa Neriea. 7Ba fihla naheng ea Egepeta, hobane ba ne ba sa ka ba mamela lentsoe la Morena. Eaba he ba fihla Tahepanehese.
8Joale lentsoe la Morena la fihla ho Jeremia ha a le Tahepanehese, la re: 9“Nka majoe a likakaoe, u a tsetele tseleng e katiloeng ka litene, e lebang tlung ea Faro e Tahepanehese, pontšeng ea banna ba Juda, 10ebe u re ho bona: ‘Morena oa mabōtho, Molimo oa Iseraele, o bua tjena: Bonang, ke tla tlisa mohlanka oa ka Nebukadenesare, khosi ea Babilona, 'me ke tla bea terone ea hae holim'a majoe ana ao ke a tsetetseng; eena o tla hloma tente ea hae ea bokhosi holim'a 'ona. 11Ha a fihla o tla otla naha ea Egepeta, a bolaee ba lokelang ho bolaoa, a thōpe ba lokelang ho thōpuoa, ba abetsoeng sabole a ba bolaee ka sabole. 12Ke tla besa mollo ka litempeleng tsa melimo ea Egepeta; Nebukadenesare o tla chesa litempele tseo, a hape melimo eo a e ise bothōpuoeng. Joalokaha molisa a ee a hloekise kobo ea hae ka ho e runa linta, le Nebukadenesare o tla hloekisa naha ea Egepeta joalo, ebe o tloha teng ka khotso. 13O tla be a pshatle le lifika tseo le li khumamelang, tse Bete-Shemeshe, naheng ea Egepeta, litempele tsa melimo ea Baegepeta a li chese ka mollo.’ ”
