Sechaba se kōpa Jeremia hore a se rapelle
1Eaba balaoli bohle ba mabōtho le Johanane, mora oa Karea, le Jesaniea, mora oa Hoshaea, le batho bohle, ho tloha ho ea eisehang ho isa ho ea hlomphehang, baa atamela, 2ba re ho moporofeta Jeremia: “Rea u kōpa: Ak'u mamele thapeli ea rōna, u re rapelle ho Morena Molimo oa rōna, u rapelle le masalla ana 'ohle, hobane joalokaha u bona, re se re setse re se bakae, ha pele re ne re le bangata. 3Rapela hore Morena Molimo oa hao, a re tsebise moo re lokelang ho ea teng, le seo re lokelang ho se etsa.”
4Moporofeta Jeremia a re ho bona: “Ke le mametse; bonang, ke tla rapela Morena Molimo oa lōna, ho ea kamoo le kōpileng kateng, 'me ke tla le bolella tsohle tseo Morena a tla li bua, ke sa le patele letho.”
5Bona ba re ho Jeremia: “Morena e be eena paki ea 'nete, e tšepahalang, e tla re ahlōla, haeba re ke ke ra hlompha litaelo tsohle tseo Morena Molimo oa hao, a tlang ho li rōmela ho rōna ka uena. 6Re tla mamela lentsoe la Morena Molimo oa rōna, eo re u rōmang ho eena, leha le ka ba monate kapa la ba bohlōkō, hore litaba tsa rōna li tle li tsamaee hantle, ha re mamela lentsoe la Morena Molimo oa rōna.”
Morena o araba thapelo ea Jeremia
7Eare hoba ho fete matsatsi a leshome, lentsoe la Morena la fihla ho Jeremia. 8Eaba Jeremia o bitsa Johanane, mora oa Karea, le balaoli bohle ba mabōtho ba neng ba e-na le eena, le batho bohle, ho tloha ho ea eisehang ho isa ho ea hlomphehang. 9A re ho bona: “Morena Molimo oa Iseraele, eo le nthōmmeng ho eena ho ea le buella, o bua tjena: 10‘Haeba le ka 'na la phela naheng ena, ke tla le bōpa, ke se ke ka le qhalanya; ke tla le tsitsisa, ke se ke ka le liha, hobane ke inyatsetsa koluoa eo ke ileng ka e lihela holim'a lōna. 11Le se ke la tšaba khosi ea Babilona, eo le e tšabang hona joale. Le se ke la e tšaba, hobane ke na le lōna, ke tla le pholosa, ke le lopolle matsohong a eona, ho rialo Morena. 12Ke tla le hauhela hore le eona e tle e le hauhele, e le khutlisetse naheng ea habo lōna.’
13“Empa haeba le re: ‘Ha re ka ke ra phela naheng ena,’ 'me le sa mamele lentsoe la Morena Molimo oa lōna; 14eba le re: ‘Che, re tla ikela naheng ea Egepeta, moo re sa tl'o hlola re bona ntoa, kapa re utloa molumo oa lenaka, leha e le hona ho bolaoa ke sekoboto, 'me re tla phela moo;’ 15lōna he, masalla a Juda, utloang lentsoe la Morena. Morena oa mabōtho, Molimo oa Iseraele, o bua tjena: ‘Haeba le fela le ikemiselitse ho ea Egepeta ho ea jaka teng, 16sabole eo le e tšabang e tla le fumana moo Egepeta, le sekoboto seo le se tšabang se tla le sala morao ho ea fihla moo Egepeta, 'me le tla shoela hona teng. 17Ho tla fela ho be joalo ho bohle ba ikemiselitseng ho ea phela Egepeta; ba tla bolaoa ka sabole, ba bolaoe ke sekoboto le ke lefu la seoa; ha ho le ea mong oa bona ea tla phela, kapa a pheme koluoa eo ke tla e lihela holim'a bona.’
18“Morena oa mabōtho, Molimo oa Iseraele, o bua tjena: ‘Joalokaha bohale ba ka le khalefo ea ka li ile tsa theoleloa holim'a baahi ba Jerusalema, ka mokhoa o joalo khalefo ea ka e tla theoleloa holim'a lōna ha le kena Egepeta. Le tla nyelisoa, le be sesomo, le rōhakoe, le nyefoloe, 'me le ke ke la hlola le bona sebaka sena hape.’
19“Malebana le lōna Morena o itse: ‘Lōna masalla a Juda le se ke la ea Egepeta.’ Tsebang hore ka letsatsi lena ke le khalemetse, 20hobane ha le ne le nthōma ho Morena Molimo oa lōna, le ne le etsa boikaketsi bo tla le timetsa, ha le re: ‘Re rapelle ho Morena Molimo oa hao; u re bolelle tsohle tseo Morena Molimo oa hao, a tla li bua, 'me re tla li etsa.’ 21Ka letsatsi lena ke le boleletse tsona, empa ha lea mamela lentsoe la Morena Molimo oa lōna, leha e le ntho efe kapa efe eo a nthōmmeng ho le bolella eona. 22Ka baka leo, tsebang hore ruri le tla bolaoa ka sabole, le bolaoe ke sekoboto le ke lefu la seoa, hona naheng eo le reng le ea jaka ho eona.”
