Jeremia oa qōsoa
1Tšimolohong ea puso ea Jehoeakime, mora oa Josiea, khosi ea Juda, lentsoe la Morena la fihla ho Jeremia, la re: 2“Morena o bua tjena: Ema lebaleng la Tempele ea Morena, u bue ho bohle ba metse ea Juda, ba tlang ho tla rapella ka Tempeleng ea Morena. Ba bolelle mantsoe 'ohle ao ke u laelang hore u ba bolelle 'ona, 'me u se ke ua siea lentsoe leha le le leng feela. 3Mohlomong ba tla mamela, motho ka mong a khelohe tsela ea hae e khopo, ebe kea hauha, ke thibela koluoa eo ke neng ke rerile ho ba lihela eona holimo, ka baka la liketso tsa bona tse khopo. 4U ba bolelle, u re: ‘Morena o bua tjena: Haeba le sa 'mamele, le sa latele melao ea ka eo ke le beetseng eona; 5haeba le sa mamele mantsoe a bahlanka ba ka, e leng baporofeta bao ke ba rōmetseng ho lōna ka makhetlo-khetlo, le hoja le sa ka la ba mamela; 6'na ke tla etsa hore Tempele ena e tšoane le Shilo, motse ona o rōhakehe mahlong a lichaba tsohle tsa lefatše.’ ”
7Eaba baprista le baporofeta, 'moho le sechaba sohle, ba utloa Jeremia ha a bua mantsoe ana a le ka Tempeleng ea Morena. 8Ha Jeremia a qetile ho bua tsohle tseo Morena a neng a mo laetse tsona hore a li bue ho sechaba sohle, baprista le baporofeta 'moho le sechaba sohle, ba mo tšoara, ba re: “Ruri u tlameha ho bolaoa! 9Ke ka baka la'ng ha u porofeta ka lebitso la Morena, u re: ‘Tempele ena e tla tšoana le Shilo, motse ona o tla fetoha lesupi, o hloke baahi?’ ” Eaba sechaba sohle se bokanela Jeremia ka Tempeleng ea Morena.
10Ha mahosana a Juda a utloa tsena, a nyoloha tlung ea khosi, a ea Tempeleng ea Morena, a fihla a lula lebaleng la Monyako o Mocha oa Tempele ea Morena. 11Joale baprista le baporofeta ba bua ho mahosana le ho sechaba sohle, ba re: “Motho enoa o tlameha ho ahlōleloa lefu, hobane o porofetetse motse ona timelo, joalokaha le ikutloetse ka litsèbè tsa lōna!”
12Eaba Jeremia o bua ho mahosana 'ohle le ho sechaba sohle, o re: “Morena o nthōmme hore ke porofetele Tempele ena le motse ona mantsoe 'ohle ao le a utloileng. 13Ka baka lena, fetolang mekhoa ea lōna, le liketso tsa lōna, le mamele lentsoe la Morena Molimo oa lōna, 'me Morena o tla hauha, a se ke a le tlisetsa koluoa eo a le reretseng eona. 14Ha e le 'na ke matsohong a lōna: Etsang ka 'na seo lōna le bonang se le molemo, 'me se lokela. 15Feela le tsebe hore haeba le ka fela la mpolaea, lōna, le baahi ba motse ona, le tla ba molato oa ho tšolla mali a se nang molato, hobane ruri Morena o nthōmme ho lōna, hore ke tl'o bua mantsoe ana 'ohle moo le ntseng le utloa.”
16Eaba mahosana, 'moho le sechaba sohle, a re ho baprista le ho baporofeta: “Motho enoa ha a lokele ho ahlōleloa lefu, hobane o buile ho rōna ka lebitso la Morena Molimo oa rōna!”
17Joale ba bang ba baholo ba naha eo ba ema, ba bua le sechaba sohle se phuthehileng, ba re: 18“Mehleng ea Hesekiea, khosi ea Juda, 'Mika oa Moreshete a na a porofeta, a bolella sechaba sohle sa Juda, a re: ‘Morena oa mabōtho o bua tjena:
“ ‘Sione e tla lengoa
joalokaha eka ke tšimo,
Jerusalema eona e fetohe
liqubu tsa majoe,
leralla leo Tempele
e hahiloeng holim'a lona
le fetohe tututsoana
e aparetsoeng ke moru.’
19“Na Hesekiea, khosi ea Juda, le bohle ba morabe oa Juda, ba ne ba 'molaee? Na Hesekiea ha aa ka a tšaba Morena, a ithapella ho Morena? Na Morena ha aa ka a hauha, a se ke a ba tlisetsa koluoa eo a neng a ba reretse eona? Re lekhatheng la ho itlisetsa koluoa e tšabehang!”
20Ho ne ho e-na le monna e mong ea neng a porofeta ka lebitso la Morena. E ne e le Uriea, mora oa Shemaea ea tsoang Kiriate-Jearime. Le eena o ne a porofetela motse ona le naha ena timelo, 'me a bua mantsoe 'ohle a tšoanang le a Jeremia.
21Ha bo-khosi Jehoeakime le bahale bohle ba hae, le mahosana 'ohle a hae, ba utloa mantsoe a Uriea, khosi Jehoeakime a batla ho 'molaea, empa eare ha Uriea a utloela a tšoha, eaba o balehela Egepeta. 22Khosi Jehoeakime a rōma banna Egepeta, e leng Elenathane, mora oa Akabore, le banna ba bang ba neng ba mo tsamaisa tsela ho ea Egepeta. 23Banna bao ba tla le Uriea, ba mo tlisa ho khosi Jehoeakime. Jehoeakime a 'molaea ka sabole, a lahlela setōpō sa hae ka setšeng sa mabitla a bafo.
24Leha ho le joalo Ahikama, mora oa Shafane, a buella Jeremia hore a se ke a neeloa sechaba hore se 'molaee.
