Lirōtō tse peli tsa feiee
1Ha Nebukadenesare, khosi ea Babilona, a se a thōpile Koniea, mora oa Jehoeakime, khosi ea Juda, le mahosana a Juda, le litsebi tsa mesebetsi ea matsoho, le malala, a ba tlositse Jerusalema, a ba isa Babilona, Morena a mpontša lirōtō tse peli tsa feiee, tse beiloeng kapele ho Tempele ea Morena. 2Se seng sa lirōtō tsena se ne se tšetse feiee e ntle, e tšoanang le feiee e butsoang pele; se seng sona se tšetse feiee e bolileng, hoo e neng e ke ke ea jeoa.
3Eaba Morena o re ho 'na: “Jeremia, u bona'ng?”
'Na ka araba, ka re: “Feiee! Feiee e ntle, e ntle haholo, empa feiee e bolileng eona e bolile hoo e ke keng ea jeoa.”
4Lentsoe la Morena la boela la fihla ho 'na, la re: 5“Morena Molimo oa Iseraele, o bua tjena: ‘Baahi ba Juda ba thōpiloeng, bao ke ba ntšitseng naheng ena, ka ba isa naheng ea Bakalatiea, ke tla ba talima ka mohau joaloka feiee ena e ntle. 6Ke tla ba alosa, ke ba etsetse tse molemo, 'me ke ba khutlisetse naheng ena hape. Ke tla ba bōpa, ke se ke ka ba qhalanya; ke tla ba tsitsisa, ke se ke ka ba liha. 7Ke tla etsa hore lipelo tsa bona li ntsebe, li tsebe hore ke 'na Morena. Bona e tla ba sechaba sa ka, 'na ke be Molimo oa bona, hobane ba tla khutlela ho 'na ka lipelo tsa bona tsohle.
8“ ‘Empa ha e le Sedekiea, khosi ea Juda, le mahosana a hae, le masalla a Jerusalema a ntseng a le naheng ena, le a phelang naheng ea Egepeta, bohle ke tla ba tšoantša le feiee ena e bolileng hoo e ke keng ea jeoa,’ ho rialo Morena. 9‘Ke tla etsa hore mebuso eohle ea lefatše e ba nyonye, libakeng tsohle tseo ke tla ba lelekela ho tsona ba nyelisoe, e be setsoto, ba songoe, ba rōhakoe. 10Ke tla ba bolaea ka sabole, le ka sekoboto, le ka lefu la seoa, ho fihlela ba felile lefatšeng leo ke neng ke ba nee lona le bo-ntat'a bona.’ ”
