Qabang ea Jeremia le Pashahure
1Ha Pashahure, mora oa moprista Imere, eo e neng e bile e le mookameli oa Tempele ea Morena, a utloa hore Jeremia o porofeta lintho tsena, 2a re moporofeta Jeremia a shapuoe, a tlamelloe pakeng tsa likoqo tse neng li le Monyakong oa Benjamine o kaholimo, pel'a Tempele ea Morena. 3Ka letsatsi le hlahlamang, Pashahure a re Jeremia a lokolloe. Eaba Jeremia o re ho eena: “Lebitso leo Morena a u reileng lona hase Pashahure, empa ke Kahohle ke Matšabeho. 4Morena o bua tjena: ‘Ke tla etsa hore u itšabe, le metsoalle eohle ea hao e u tšabe. Metsoalle eo ea hao e tla bolaoa ke lira tsa eona ka sabole, 'me tsena u tla li bona ka mahlo a hao. Baahi bohle ba Juda ke tla neelana ka bona matsohong a khosi ea Babilona; eona e tla ba thōpa, e ba ise Babilona, e ba bolaee ka sabole. 5Maruo 'ohle a motse ona, le tsohle tse sebelitsoeng ka thata, le lintho tsohle tsa bohlokoa, le matlotlo 'ohle a likhosi tsa Juda, tsena tsohle ke tla neelana ka tsona matsohong a lira tsa bona. Lira li tla li hapa, li li nke, li ee le tsona Babilona. 6Ha e le uena Pashahure, le bohle ba phelang tlung ea hao, le tla thōpuoa, le isoe Babilona. U tla shoela teng, 'me u epeloe teng, uena le metsoalle eohle ea hao eo u e porofetetseng leshano.’ ”
Jeremia o ipelaetsa ho Morena
7Morena, u ile ua nthetsa,
ka thetseha,
uena u matla ho mpheta,
'me u ntlhōtse.
Tsatsi lohle ba ntlepa litšeho,
motho ka mong
o 'nyekoletsa melomo.
8Kamehla ha ke bua ke ee ke hōoe,
ke meketse, ke re:
“Moferefere le timelo!”
Ka linako tsohle kea songoa,
kea nyatsuoa,
ka baka la ho bolela
lentsoe la Morena.
9Ha ke re: “Ha ke sa tla hlola
ke bua ka Morena,
ha ke sa tla hlola
ke bolela bitso la hae,”
ka pelong ea ka
ntsoe la hae ke malakabe,
ke mollo o tukang
kahar'a masapo a ka,
ke se ke khathetse
ke ho hlola ke o bipile,
ho o mamella le hona hoa ntšita.
10Ke utloa ba bangata
ba ntse ba hoeshetsa,
ba re: “Kahohle ke Matšabeho!
Mo hlahatseng!
A re mo hlahatseng!”
Metsoalle ea ka eohle
e laletse hore ke fose,
e re:
“Mohlomong a ka 'n'a thetseha,
eaba re tseba ho mo hlōla ke hona,
ra ba ra tseba
le ho iphetetsa ka eena.”
11Empa Morena o na le 'na,
o matla, oa tšabeha,
kahoo bahlorisi ba ka
ba tla khōthōmetseha.
Ha ba ka ke ba ba ba hlōla,
ba tla hlajoa ke lihlong haholo,
merero ea bona e ke ke be ea atleha,
le lihlong tsa bona
li ke ke be tsa lebaloa.
12Empa uena Moren'a mabōtho,
uena ea hlahlobang ba lokileng,
uena ea bonang
botebo ba lipelo tsa batho,
a nke ke bone
ha u iphetetsa holim'a bona,
hobane nyeoe ea ka
ke e beile kapele ho uena.
13Binelang Morena, le mo rorise!
O pholositse bafumanehi
matsohong a ba khopo.
14Ho ke ho rōhakehe
tsatsi la tsoalo ea ka!
Tsatsi leo ke belehiloeng ka lona,
tsatsi leo le se hlohonolofale!
15Ho ke ho rōhakehe
ea ileng a bēhela ntate,
eena ea ileng a mo thabisa, a re:
“U tsoaletsoe ngoan'a moshanyana!”
16Motho eo a ke a tšoane le metse,
metse eo Morena
a ileng a e timetsa ho se mohau.
Motho eo a ke a utloe lillo
e sa le ka matjeke,
mokhosi oa ntoa a o utloe
ha tali e anyesa,
17hoba ha a ka a mpolaea
ke e-s'o tsoaloe,
pōpelo ea 'mè
ea e-ba lebitla la ka,
'mè ea e-ba moimana
kamehla eohle.
18Ekaba ke ne ke tsoela'ng
pōpelong ea 'mè,
hore ke tl'o bona
litsietsi le masoabi,
bophelo ba ka
ke bo qete ke le lihlong?
