Bo-Debora le Barake ba hlōla Sisera
1Ha Ehude a se a shoele, bana ba Iseraele ba boela ba siteloa Morena. 2Morena a neelana ka bona matsohong a Jabine, khosi ea Kanana, e neng e busa Hasore. Molaōli oa mobōtho a hae e ne e le Sisera, ea neng a ahile Haroshete ea Balichaba. 3Bana ba Iseraele ba ipiletsa ho Morena, hobane Jabine o ne a e-na le likariki tsa ntoa tse makholo a robong, tse entsoeng ka tšepe. A hatella bana ba Iseraele habohlōkō ka lilemo tse mashome a mabeli.
4Ka nako eo, moporofeta Debora, mosali oa Lapidote, e ne e le eena moahlōli oa Baiseraele. 5Debora o ne a ee a lule tlas'a sefate sa hae sa palema, pakeng tsa Rama le Bethele, naheng e maralla ea Efraime. Bana ba Iseraele ba ne ba ee ba ee ho eena ho ea ahlōleloa. 6A rōma maqosa ho ea bitsa Barake, mora oa Abinoame, ea tsoang Kedeshe e Nafthali, 'me Debora a re ho eena: “Morena Molimo oa Iseraele, o u laetse, a re: ‘Tsamaea, u lebe thabeng ea Tabore, u ee le banna ba likete tse leshome ba tsoang har'a bana ba Nafthali le har'a bana ba Sebulone. 7Sisera, molaōli oa mabōtho a Jabine, ke tla mo nōnōeletsa molatsoaneng oa Kishone, a tle ka likariki tsa hae tsa ntoa, le ka mabōtho a hae, ebe ke neelana ka eena matsohong a hao.’ ”
8Barake a re ho eena: “Haeba u tla tsamaea le 'na, ke tla ea, empa haeba u sa tsamaee le 'na, ha ke na ho ea.”
9Debora a re: “Ruri ke tla tsamaea le uena, empa leeto leo u le nkang ha le na ho u tlisetsa tlōtla, hobane Morena o tla neelana ka Sisera matsohong a mosali.” Eaba Debora oa ema, o tsamaea le Barake ho ea Kedeshe. 10Barake a bitsetsa banna ba Sebulone le ba Nafthali Kedeshe, 'me a nyolohela teng a e-na le banna ba likete tse leshome. Debora a nyoloha le eena.
11Joale Hebere oa Mokene o ne a ikarohantse ho Bakene, e leng litlōhōlō tsa Hobabe, mohoe oa Moshe, a hlomme tente ea hae tlas'a sefate sa eike se Saananime, e pel'a Kedeshe.
12Ba tsebisa Sisera hore Barake, mora oa Abinoame, o nyolohetse thabeng ea Tabore. 13Sisera a bōkella likariki tsa hae tsohle tsa ntoa, e le likariki tse makholo a robong tsa ntoa, tse entsoeng ka tšepe; le mabōtho 'ohle ao a neng a e-na le 'ona, ho tloha Haroshete ea Balichaba ho ea fihla molatsoaneng oa Kishone.
14Debora a re ho Barake: “Tsamaea! Lena ke letsatsi leo ka lona Morena a neelanang ka Sisera matsohong a hao. Ha ke re Morena o se a u eteletse pele?” Barake a theoha thabeng ea Tabore, a e-na le banna ba likete tse leshome. 15Morena a qhalanya Sisera le likariki tsa hae tsohle tsa ntoa, le lebōtho la hae lohle ka sabole, kapele ho Barake. Sisera a theoha kariking ea hae ea ntoa, a hlanola tlhabela. 16Barake a phalalisa likariki le lebōtho ho ea fihla Haroshete ea Balichaba, moo lebōtho lohle la Sisera le ileng la bolaeloa teng ka sabole, ha se ke ha sala le ea mong.
17Empa Sisera a hlanola tlhabela ho ea fihla tenteng ea Jaele, mosali oa Hebere oa Mokene, hobane khotso e ne e le teng pakeng tsa Jabine, khosi ea Hasore, le lelapa la Hebere oa Mokene.
18Jaele a ea khahlanyetsa Sisera, 'me a re ho eena: “Fapohela mona, monghali; kena ka tenteng ea ka, u se ke ua tšaba.” Eaba Sisera o kena ka tenteng, Jaele a mo koahela ka kobo.
19Sisera a re ho Jaele: “Ak'u mphe metsinyana ke noe, hobane ke nyoriloe.” A bula lekuka la lebese, a mo nea, a noa, eaba o mo koahela hape.
20Sisera a re ho Jaele: “Ema monyakong oa tente, 'me ere ha motho a ka fihla, a u botsa, a re: ‘Na ho na le motho moo?’ Uena u tle u re: ‘Che!’ ”
21Joale Jaele, mosali oa Hebere, a nka thakhisa ea tente, a nka le noto ka letsohong, a mo nanyetsa, a khokhothella thakhisa eo tlhafunelong ea hae, ea phunyeletsa ho ea fihla fatše. Sisera o ne a ile le sephume sa boroko, a khathetse. Eaba oa shoa.
22Eare ha Barake a ntse a phalalisa Sisera, Jaele a ea mo khahlanyetsa, a re ho eena: “Tloo, ke tla u bontša motho eo u ntseng u 'matla.” Barake a kena ka tenteng ea Jaele, 'me a bona Sisera a tjapaletse fatše, a se a shoele, thakhisa e kene tlhafunelong ea hae.
23Ka lona letsatsi leo Molimo a kokobetsa Jabine, khosi ea Kanana, kapele ho bana ba Iseraele. 24Bana ba Iseraele ba 'na ba tsoela pele ho imela Jabine, khosi ea Kanana, ho fihlela ba timetsa khosi eo ea Kanana.
