'Mika o rapela melimo ea bohata
1Ho ne ho e-na le monna ea neng a phela naheng e maralla ea Efraime, lebitso la hae e le 'Mika. 2A re ho 'm'ae: “Ha u ne u utsoelitsoe chelete ea silefera e ka etsang boima ba likilo tse leshome le metso e meraro, u ne u nee ea utsoitseng chelete eo thōhako, moo ke ntseng ke utloa. Bona he, silefera eo ke ena ho 'na; ke 'na ea neng a e nke.”
'M'ae a re: “Morena a ke a u hlohonolofatse, ngoan'aka.”
3'Mika a khutlisetsa ho 'm'ae chelete ea silefera e ka etsang boima ba likilo tse leshome le metso e meraro. 'M'ae a re: “Silefera ena e tsoang letsohong la ka ke e abela Morena, ka baka la mora oa ka, hore ho etsoe setšoantšo se betliloeng, le setšoantšo se bōpiloeng. Ka baka leo, ke e khutlisetsa ho uena.”
4Ha 'Mika a khutliselitse chelete eo ho 'm'ae, 'm'ae a ntša chelete ea silefera e ka etsang boima ba likilo tse peli le halofo, a e nea lelala, 'me lona la etsa setšoantšo se betliloeng, le setšoantšo se bōpiloeng, 'me tsena tsa isoa ka tlung ea 'Mika.
5Monna enoa, 'Mika, o ne a e-na le ntlo eo a e hahetseng melimo. A etsa setipe, le molingoana oa lelapa, 'me a hlomamisa e mong oa bara ba hae hore e be moprista. 6Mehleng eo Baiseraele ba ne ba se na khosi; motho ka mong o ne a iketsetsa seo eena a reng se nepahetse.
7Ho ne ho e-na le mohlankana oa Molevi, oa lelapa la Juda, ea tsoang Betlelehema e Juda, 'me a jakile moo. 8Monna eo a tloha motseng oo oa Betlelehema e Juda, ho ea jaka moo a ka fumanang tjako teng. Ha a ntse a tsamaea joalo, a fihla naheng e maralla ea Efraime, tlung ea 'Mika.
9'Mika a re ho eena: “U tsoa kae?”
Monna eo a re ho eena: “Ke Molevi oa Betlelehema e Juda, 'me ke il'o jaka moo nka fumanang tjako teng.”
10'Mika a re ho eena: “Lula mona ha ka, 'me u be ntate le moprista oa ka. Ka selemo ke tla u lefa chelete ea silefera, e ka etsang boima ba likeramo tse lekholo le leshome, ke u fe le liaparo, le lijo.” Eaba Molevi oa kena. 11Molevi a khotsofalla ho lula ha 'Mika, 'me mohlankana enoa a ba joaloka e mong oa bara ba 'Mika. 12'Mika a hlomamisa Molevi; mohlankana enoa ea e-ba moprista oa hae, 'me a phela tlung ea 'Mika. 13Eaba 'Mika o re: “Joale kea tseba hore Morena o tla nkatlehisa, hobane ke na le moprista oa Molevi.”
