1Oho, hoja ua phetla maholimo
ua theoha,
thaba li tle li reketle
ha li u bona!
2Joalokaha mollo o hotetsa patsi,
metsi a bele,
le uena theoha,
lira tsa hao li tsebe bitso la hao,
u etse hore chaba li thōthōmele
ha li u bona!
3Ha u ne u etsa tse tšosang,
tseo re neng re sa li lebella,
u ile ua theoha,
thaba tsa reketla ha li u bona.
4Ho tloha mehleng ea khale-khale
ha ho ea kil'a utloa,
ha ho ea kil'a bona
Molimo e mong ntle ho uena,
Molimo ea thusang
ba mo tšepileng.
5U thusa ba etsang ho loka,
ba ho etsang ba thabile,
bona ba hopolang litsela tsa hao.
Leha u n'u halefile
re 'nile ra etsa libe;
ebe joale re ka pholosoa joang?
6Bohle re tšoana le motho,
le motho ea sesila,
ketso tsohle tsa rōna tse lokileng
li ka likatana tse litšila;
bohle re omella sa lehlaku le omella,
libe tsa rōna
li re fefola sa moea ha o fefola.
7Ha ho na motho
ea ipiletsang ho uena,
kapa ea lekang hore a u khomarele;
hobane u re patetse fahleho sa hao,
ua etsa hore re motele
ka baka la libe tsa rōna.
8Leha ho le joalo, Morena,
uena u ntat'a rōna;
rōna re letsopa, uena u sebōpi,
bohle re mosebetsi
oa matsoho a hao.
9Oho, Morena, se ke ua halefa,
ua halefa ho feta tekanyo;
se hopole libe tsa rōna,
ua li hopola kamehla eohle.
Ak'u hopole hore re chaba sa hao.
10Metse e halalelang ea hao
e fetohile lehoatata,
Sione ke lehoatata,
Jerusalema ke nanaola.
11Tempele e halalelang,
e tlōtlehang ea rōna,
moo u neng u rorisetsoa teng,
u rorisoa ke baholo-holo ba rōna,
e chesitsoe ka mollo, ea re lore!
Tsohle tsa bohlokoa
li fetohile masupi.
12Na tse etsahetseng tsee
ha li u ame?
Na ha u na ho etsa letho, Morena?
Na u tla fela u khutse,
u re otle ho feta tekanyo?
