ESAEA 58

₁“Hōoeletsa haholo,

u se ke ua khaotsa;

hōoa haholo

joalokaha ho letsoa lenaka.

Bolella sechaba sa ka

litšito tsa sona,

ntlo ea Jakobo

u e bolelle libe tsa eona.

₂Ka letsatsi le letsatsi

ba ntse ba mpatla,

ba labalabela

ho tseba litsela tsa ka,

joalokaha eka ke sechaba

se etsang tse lokileng,

se sa furallang

melao ea Molimo oa sona.

Ba nkōpa ho ba bolella

melao e lokileng,

ba re ba chesehela

ho ikatametsa ho Molimo.

₃Ba re: ‘Ke hobane'ng

ha re itimme lijo,

empa uena u sa ka ua bona?

Ke hobane'ng

ha re itlhōkōfalitse,

empa uena u sa ka ua natsa hoo?’

“Ka tsatsi la ho itima lijo,

lōna le phetha merero ea lōna,

le sebelisa

basebetsi ba lōna ka thata.

₄Ho itima lijo ha lōna

ho baka likhang le liqabang,

ho bake le ho tlantlana,

ho tlantlana ka litebele.

Na ho itima lijo ka mokhoa o tjee

ho ka etsa hore thapelo tsa lōna

li mamelehe?

₅Na oo ke mokhoa oa ho itima lijo,

na ke mokhoa oo ke o khethileng,

oa hore motho a itlhōkōfatse

ka tsatsi le le leng?

Oa hore a kebise hlooho

joaloka letsepa la lehlaka,

a ipitike holim'a tse mahoashe,

a be a itšelake ka molora?

Na oo ke oona mokhoa

oa ho itima lijo?

Na tsatsi le tjee

le ka amoheleha ho Morena?

₆“Mokhoa oa ho itima lijo

oo ke o khethileng ke ona:

Ke hore u lokolle

mahlaahlela a bokhopo,

u imolle ba imetsoeng

ke mejaro ea bona,

ba hateletsoeng u ba lokolle,

mesebetsi eohle ea botlatlapi

u e felise.

₇Ke hore u abelane lijo

le ba lapileng,

u amohele baleleri lapeng la hao,

ba hlobotseng u ba fe liaparo,

bang ka uena u ba thuse.

₈“Joale seli la hao le tla hlaha,

le hlahe joaloka mafube a meso,

ho fola ha hao le hona ho akofe,

ho loka ha hao ho tla u etella pele,

tlōtla ea Morena

e sireletse serao sa hao.

₉Etlare ha u ipiletsa,

Morena a u arabe,

ere ha u kōpa thuso,

eena a re: ‘Ke 'na enoa.’

“Haeba u felisa

liketso tsa botlatlapi,

tsa ho supana ka menoana

le ho buisana hampe;

₁₀ha u ka ikitlaeletsa

ho fepa ba lapileng,

ua thoba meea

ea ba tšoenyehileng,

fifi le tla apoha,

seli la hao le khanye,

bosiu ba hao

bo ke motšeare oa lengeta.

₁₁Morena o tla u tataisa kamehla,

a u fe tseo u li hlokang

leha naha e omeletse,

a matlafatse litho tsa 'mele oa hao.

U tla tšoana le serapa

se noesetsoang hantle,

u ke seliba

seo mohloli oa sona o sa psheng.

₁₂Bara ba hao ba tla tsosa

thako tsa hao tsa khale,

u hahe holim'a methèo

ea baholo-holo ba hao.

Uena u tla bitsoa Motsosi

oa marako a helehileng,

u bitsoe Molokisi

oa litsela le matlo.”

₁₃“Haeba u sa nke maeto

ka tsatsi la Sabatha,

u sa phethe merero ea hao

ka tsatsi la ka le halalelang;

haeba u bitsa Sabatha

letsatsi la thabo,

u re ke la Morena le halalelang,

le hlomphehang;

haeba u le hlompha

ka ho se etse mesebetsi ea hao,

u sa phethe merero ea hao,

u sa bue mafeela;

₁₄ke hona u tla thabela Morena,

a etse hore lefatše lohle

le u hlomphe,

u je lefa

la ntat'ao-moholo Jakobo.”