ESAEA 45

₁“Morena o bua tjena

ho motlotsuoa oa hae,

e leng Siruse eo ke utlileng

tsoho la hae le letona,

hore a kokobetse

chaba tse kapele ho eena.

'Na ke tla amoha likhosi

matla a ho loana,

ke bule mamati a kapele ho eena,

menyako ea 'ona

e se hlole e koaloa.

₂Ke tla u etella pele,

ke batalatse lithaba,

menyako ea lethose ke e thuake,

mekoallo ea tšepe ke e robake.

₃Ke tla u nea matlotlo

a patiloeng har'a mafifi,

maruo a patiloeng

likhocheletsaneng,

u tle u tsebe hore ke 'na Morena,

Molimo oa Iseraele,

ea u bitsang ka lebitso.

₄Ka baka la Jakobo,

mohlanka oa ka,

ka baka la Iseraele,

mokhethoa oa ka,

ke u bitsitse ka lebitso la hao,

ka u rea bitso le hlomphehang

leha u sa k'a ntseba.

₅“Ke 'na Morena, ha ho na e mong,

kantle ho 'na ha ho na Molimo.

Ke tla u matlafatsa,

le hoja u sa ntsebe,

₆e le hore ho tloha bochabela

ho ea bophirimela

chaba li tsebe

hore ha ho e mong kantle ho 'na.

Ke 'na Morena, ha ho na e mong.

₇Ke etsa leseli, ke etsa lefifi,

kea pholosa ke be ke timetse,

'na Morena,

tsena tsohle kea li etsa.

₈“Lōna maholimo

theolelang toka lefatšeng,

maru a ke a nesetse lefatše,

a le nesetse ho loka,

lefatse le tle le itsibole,

ho tle ho hlahe

tholoana tsa pholoho,

toka e hōle hammoho le tsona;

'na Morena, tsena li entsoe ke 'na.”

₉“Ho malimabe

ea tsekisanang le 'Mōpi oa hae,

eena e leng lengetana

har'a mangetana!

Na letsopa

le ka re ho sebōpi sa lona:

‘U etsa'ng?’

Na mosebetsi oa hao o ka re:

‘Ha u na tsebo’?

₁₀Ho malimabe ea reng ho ntat'ae:

‘U tsoetse'ng?’

Kapa ea reng ho 'm'ae:

‘U belehile'ng?’

₁₁“Morena, Ea Halalelang oa Iseraele,

'Mōpi oa hao o bua tjena:

Na u ka mpotsa tse tla etsahala

ho bana ba ka?

Kapa ua ntaela mabapa

le mosebetsi oa matsoho a ka?

₁₂Ke entse lefatše

ka ba ka le bōpela motho,

esita le maholimo

ka a ala ka matsoho a ka,

le linaleli tsohle tsa leholimo

li laeloa ke 'na.

₁₃Ka ho loka ha ka

ke susumelitse Siruse,

tsela tsa hae tsohle

li tla otlolloa ke 'na.

O tla tsosa marako a motse oa ka,

a be a lokolle bathōpuoa ba ka,

a ba lokolle

ntle ho theko kapa moputso,”

ho rialo Moren'a mabōtho.

“Matlotlo a Egepeta

le thepa ea khoebo ea Kushe,

le banna ba liqhobane

ba naha ea Sheba,

ba tla ineela ho uena,

e be ba hao;

ba hulane kamora' hao

ba tlanngoe ka mahlaahlela.

Ba tla u obamela,

ba u rapele, ba re:

‘Ruri Molimo o na le uena,

ha ho Molimo e mong

ntle ho eena.’ ”

₁₅Ruri u Molimo ea ipatileng,

uena Mopholosi,

Molimo oa Iseraele.

₁₆Bohle ba etsang melimo ea bohata

ba tla hlajoa ke lihlong,

ba tlontlolohe,

ba ferekane kaofela ha bona.

₁₇Empa Iseraele

o tla pholosoa ke Morena,

a mo pholose

ka pholoho ea mehla eohle,

le ka mohla

a ke ke a hlajoa ke lihlong,

kapa a tlontloloha kamehla eohle.

₁₈Morena, 'Mōpi oa maholimo,

eena Molimo ea bōpileng lefatše,

a le etsa,

eena ea ileng a le tsitsisa,

eena ea sa kang

a le bōpela lefeela,

ea le bōpetseng

hore ho pheloe ho lona,

o bua tjena:

“Ke 'na Morena, ha ho na e mong.

₁₉Ha kea bua sephiring,

khocheletsaneng tse lefifi,

ha kea ka ka re

ho litlōhōlō tsa Jakobo:

‘Mpatleleng lelea.’

'Na Morena, ke bua ho lokileng,

'na ke bolela tse nepahetseng.”

₂₀“Khōbōkanang, le tle,

le atameleng 'moho,

lōna ba phonyohileng ho balichaba,

lithoto ting! le tsamaeang le jere,

le jere melimo ea bohata, ea lehong,

lōna ba rapelang melimo

e ke keng ea le pholosa.

₂₁Atamelang,

le bolele taba tsa lōna,

tlisang melimo ea lōna e eletsane.

Ke mang ea boletseng see

e sa le khale?

Ke mang ea se phatlalalitseng

mehleng e fetileng?

Na e ne e se 'na Morena?

Ha ho molimo e mong

kantle ho 'na,

Molimo ea lokileng le Mopoholosi;

ha ho e mong haese 'na feela.

₂₂“Sokolohelang ho 'na,

le tle le pholohe,

lōna lipheletso tsohle tsa lefatše;

ke 'na Molimo, ha ho na e mong.

₂₃Ke hlapantse ka 'na,

molomo oa ka o buile ka ho loka,

lentsoe la ka le ke ke la fetoheloa.

Mangoele 'ohle a tla nkhumamela,

maleme 'ohle le ona

a ikane ka 'na.

₂₄“Batho bohle ba tla bua ka 'na,

ba re:

‘Ho loka le matla

li ho Morena a inotši.’

Bohle ba ileng ba mo halefela,

ba tla tla ho eena,

ba hlabisoe lihlong.

₂₅Empa ho Morena

litlōhōlō tsohle tsa Iseraele

li tla fumanoa li lokile,

'me li nyakalle.”