Boporofeta malebana le Tire
1Bona ke boporofeta malebana le Tire:
Bokollang
lōna likepe tsa Tarashishe,
hobane Tire e ripitliloe,
ha ho sa na ntlo,
ha ho sa na kou ea likepe!
Tsebiso ena
e tsoa naheng ea Kitime,
e senoletsoe ba naha ea Tire.
2Khutsang
lōna ba ahileng pel'a lebōpo,
khutsang lōna bahoebi ba Sidone,
ba ruisitsoeng
ke ba tšelang maoatle.
3Koro ea Shihore
e tšelisitsoe maoatle a maholo,
chai ea phula ea Nile
ea tlisetsa Tire mouno,
Tire ea ruisoa
ke ho hoeba le chaba tse ling.
4Ak'u itšoabele uena Sidone,
uena u leng qhobosheane ea leoatle,
hoba leoatle le buile, la re:
“Ha ke e-s'o be le mahlaba a pelehi,
le ho tsoala ha ke e-s'o tsoale,
ha ke e-s'o holise bara,
le barali ha ke e-s'o ba holise.”
5Ha Baegepeta ba hlabeloa mokhosi
ba tla tšoha ha ba utloa tsa Tire.
6Tšelelang mose ho Tarashishe;
bokollang lōna ba ahileng
pel'a lebōpo la leoatle.
7Na oo ke oona motse oa lōna
oa menyaka,
motse o theiloeng
mehleng ea khale-khale,
o il'a rōmela baahi
ho ea aha naheng tse hōle?
8Ea ileng a rerela Tire tsee ke mang?
Tire,
motse oa ho hlomamisa likhosi,
oo bahoebi ba oona
e leng mahosana,
oo bo-ralikhoebo ba oona
ba tummeng fatšeng lohle?
9Ke Moren'a mabōtho
ea rerileng hona,
ho felisa boikhantšo
ba bohle ba tlōtloang,
ho kokobetsa bohle
ba tummeng lefatšeng.
10Uena morali oa Tarashishe
haola naheng ea heno,
u haole ho eona
joaloka nōka ea Nile,
hobane ea u thibelang ha a sa le eo.
11Morena o otlolotse tsoho la hae,
a le otlolla holim'a leoatle,
a etsa hore mebuso e thōthōmele.
Malebana le Kanana
Morena o entse taelo,
hore qhobosheane tsa eona
li ripitloe.
12Eaba o re:
“Uena morali oa Sidone
ea ripitliloeng,
u ke ke ua hlola u nyakalla hape!
Leha u ka tsamaea
ua tšelela Kitime,
le teng phomolo
u ke ke be ua e bona!”
13Talima naha ea Bakalatiea,
ea chaba seo e seng e se letho!
Baasiria ba e fetotse
hoatata la libatana,
ba haha tora tsa bona tsa liboholi,
ba heletsa qhobosheane tsa eona,
ba e siea e fetohile masupi.
14Bokollang
lōna likepe tsa Tarashishe,
hoba qhobosheane ea lōna
e ripitliloe.
15Ho tloha ka tsatsi leo, Tire e tla lebaloa ka lilemo tse mashome a supileng, e leng nako e lekanang le lilemo tsa ho phela ha khosi. Ha lilemo tseo tse mashome a supileng li fetile, Tire e tla tšoana le seotsoa se boleloang pineng e reng:
16“Nka harepa ea hao
u potolohe le motse,
uena seotsoa tooe,
u seng u sa hopoloe;
tsanyaola meloli,
u bine lipina tse ngata,
u tle u boele u hopoloe hape.”
17Ha lilemo tse mashome a supileng le fetile, Morena o tla hopola Tire. Joaloka seotsoa sena Tire e tla boela khoebong ea eona, e sebelisane le mebuso eohle e teng lefatšeng. 18Phaello eo e tla e fumana ka khoebo ea eona e tla e abela Morena. E ke ke ea boloka phaello eo ho ithuisa ka eona, empa e tla neoa ba khumamelang Morena, 'me bona ba tla khōra, ba apare tse majabajaba.
