Sechaba se hana ho baka
1“Tloong, re khutleleng ho Morena:
Ke eena
ea re hlenhlantseng linama,
empa ke eena ea tla re folisa;
ke eena
ea re ntšitseng maqeba,
empa ka eena ea tla a tlama.
2Kamora' matsatsi a mabeli
o tla re phelisa,
ka tsatsi la boraro ebe oa re emisa,
re tle re phele 'moho le eena.
3A re lekeng ho tseba Morena,
re ikitlaeletseng ho mo tseba.
Ho tla ha hae ke ha 'nete,
ha 'nete ea ho tla ha mafube;
o tla tla ho rōna sa melupe ea pula,
sa pula tse kolobisang,
tse kolobisang mobu selemo.”
4Empa Morena o re:
“Uena Efraime,
ke etse joang ka uena?
Uena Juda, ke etse joang ka uena?
Rato la lōna le ka moholi
o thibang hoseng,
le ka phōka ea meso
e nyamelang kapele.
5Kahoo ke le khalemetse
ka boporofeta ba ka,
ka lipolelo tsa ka ka le timetsa,
kahlōlo tsa ka
tsa le oela sa lehalima.
6Ke thabela mohau
e seng mahlabelo,
ho tseba Molimo,
e seng nyehelo tsa secheso.
7Ba sentse selekane sa ka
joaloka motse oa Adamo,
kahoo ba ntlhokela botšepehi.
8Gileade ke motse
oa ba etsang bokhopo,
Gileade ke motse
o khanathetseng mali a batho.
9Joalokaha linokoane
li ee li lalle motho,
hlopha sa baprista le sona sea lalla,
se bolaele batho tseleng
e eang Shekeme,
mahlabisa-lihlong ana
se a etse ka morero.
10Ke bone manyala
ka tlung ea Iseraele,
Efraime o etsa bootsoa,
o bo etsetsa hona kateng,
'me Iseraele o itšilafalitse.
11Le uena Juda, kahlōlo e u emetse,
mohla ke khutlisang sechaba sa ka.”
