HOSEA 14

₁Uena Iseraele,

khutlela ho Morena,

Morena Molimo oa hao,

hobane u oele

ka baka la bokhopo ba hao.

₂Itokisetseng tseo le tla li bua,

le khutlele ho Morena,

le re ho eena:

“Ak'u re tšoarele

bokhopo bohle ba rōna,

'me thapeli ea rōna u e amohele.

Bakeng sa ho nyehela

ka mahlabelo a lipohoana,

re tla u boka ka melomo ea rōna.

₃Asiria e ke ke ea re pholosa,

ha re sa tla palama lipere tsa ntoa.

Tse entsoeng ka matsoho a rōna

re ke ke ra hlola re re

ke melimo ea rōna,

hobane khutsana

e utloeloa bohlōkō ke uena.”

₄Joale Morena o re:

“Bokoenehi ba bona ke tla bo felisa,

ke ba rate ka rato lohle la pelo ea ka,

hobane khalefo ea ka e ba fapohile.

₅Ho Iseraele ke tla ba joaloka phōka,

Iseraele o tla thunya sa mohalalitoe,

a mele metso sa kedare ea Lebanone.

₆Makal'a hae a tla hlōmela,

a thathalle, a khahlehe

joaloka fate sa mohloaare,

a nkhe hamonate

sa kedare ea Lebanone.

₇Ba tla boela ba lula

moriting oa sona,

ba leme mabele, ba a chaee haholo,

ba etse lithunthung

joaloka fate sa morara,

botumo ba bona

e ke ba veine ea Lebanone.

₈Ekaba Efraime

o sa tla etsa'ng ka melingoana?

Ke mo utloile,

ke tla be ke mo lebele.

'Na ke ka sefate sa kipere

fate se setalana,

ke ka thuso ea ka

u bèhang litholoana.”

₉Ea bohlale ke mang?

Tsena o tla li hlokomela.

Ea masene ke mang?

Eena o tla li utloisisa.

Litsela tsa Morena li nepahetse,

ba lokileng ba tla tsamaea ka tsona,

baetsalibe

ba khōthōmetsehe ho tsona.