HABAKUKE 3

₂Morena, botumo ba hao

ke bo utloile,

le eona mesebetsi ea hao

kea e tšaba, Morena.

Ak'u e nchafatse

mehleng ena ea rōna,

u etse hore e tsejoe

bophelong ba rōna,

leha u halefile

u 'n'u hopole ho hauhela.

₃Molimo o fihlile a e-tsoa Temana,

Ea Halalelang

a e-tsoa Thabeng ea Parane.

Tlōtla e aparetse maholimo,

fatše le tletse lithoko tsa hae.

₄Khanya ea hae

e ka mahlaseli a letsatsi,

ka liatleng tsa hae

mahlaseli aa betseha!

Ke moo matla a hae

a patehileng teng.

₅Lefu la seoa le mo eteletse pele,

feberu eona

e latela mehlaleng ea hae.

₆Ha a ema, lefatše la sisinyeha,

ha a talima, merabe ea thōthōmela;

lithaba tsa boholo-holo tsa heleha,

maralla a khale-khale a batalla.

Litsela tsa hae ke tsa kamehla eohle.

₇Ke bone baahi ba Kushane

ba tšohile haholo,

le baahi ba Midiane

ba otlanya mangoèlè.

₈Morena,

na u ne u halefetse linōka?

Na khalefo ea hao

e n'e tlōketse melatsoana,

kapa u ne u halefetse leoatle,

ha u n'u palame lipere tsa hao,

u kaletse kariki tsa hao tsa tlhōlo?

₉U il'a hula seqha sa hao

ua se cheha,

metsu e tletse ka sehlajoeng sa hao,

ua patsola lefatše,

linōka tsa phalla.

₁₀Lithaba tsa u bona,

eaba lia reketla,

liphororo tsa metsi tsa phorosela,

boliba ba metsi le bona ba hoasa,

eaba maqhubu

bo a akhōletsa holimo.

₁₁Letsatsi le khoeli

tsa ema themelele!

ha metsu ea hao e bèbang

e tsèkèma,

ha rumo la hao le benyang

le phatsima.

₁₂Ua hata holim'a lefatše u halefile,

ua hatakela lichaba u hlōkōfetse.

₁₃U n'u futuha

ho ea lopolla chaba sa hao,

u il'o pholosa motlotsuoa oa hao.

Molaoli oa ba khopo

u mo timelitse,

ua mo hlōbōlisa

ho tloha holim'a hlooho,

ua mo hlōbōlisa ho ea tsoa leotong.

₁₄Ka metsu ea hae

molaoli ua n'a mo hlaba,

mohla bahlabani

ba neng ba re futuhetse,

ba re futuhetse hore ba re qhalanye,

ba thabetse ho bolaea bahlophehi,

bahlophehi ba neng ba ipatile.

₁₅Ua hatakela leoatle

ka lipere tsa hao,

boliba bo boholo ua bo loebehlanya.

₁₆Ha ke utloa ke ile ka ferekana,

ka bebenya melomo

ha ke utloa molumo oo;

masapo a ka a qala ho bola,

maoto a ka le 'ona a rèrèkèla.

Empa tsatsi la koluoa

ke tla le lebella,

tsatsi leo ke le lebelle ka mamello,

hore le chabele

chaba se re futuhetseng.

₁₇Leha fate sa feiee

se ke ke sa fupa,

kapa fate sa morara sa se ke sa beha;

leha mohloaare

o ke ke oa beha litholoana,

kapa kotulo ea e-ba sieo masimong;

leha masaka a likhutšoane a ka oma,

kapa masaka a likhomo

a mela mohloa,

₁₈'na ke tla 'ne ke ithabelle Morena,

ke nyakallele Molimo,

Mopholosi oa ka.

₁₉Morena Molimo ke eena

ea 'matlafatsang,

ea potlakisang maoto a ka

joaloka a likhama,

ea ntsamaisang holim'a lihlaba.