Metsi aa bohlela
1Molimo a hopola Nōoe, le liphoofolo tsohle tse hlaha, le makhomo 'ohle a neng a e-na le eena ka arekeng. Joale Molimo a fokisa moea holim'a lefatše, 'me metsi a bohlela. 2Mehloli ea boliba bo boholo, le maru a khaotsa ho tšolla metsi, pula e tsoang leholimong ea emisa. 3Butle-butle metsi a 'na a monyela fatše, 'me qetellong ea matsatsi a lekholo le mashome a mahlano, metsi a ne a se a fokotsehile. 4Ka khoeli ea bosupa, ka letsatsi la leshome le metso e supileng la khoeli, areka ea lula holim'a lithaba tsa Ararate. 5Metsi a 'na a tsoela pele ho fokotseha ho fihlela ka khoeli ea leshome, 'me ka letsatsi la pele la khoeli ea leshome litlhōrō tsa lithaba tsa hlaha.
6Hoba ho fete matsatsi a mashome a mane, Nōoe a bula fesetere eo a neng a e entse arekeng. 7A ntša lekhoaba; lona la tsoa, la 'na la solla, ho fihlela metsi a e-psha lefatšeng. 8Joale a ntša leeba, ho bona hore na metsi a fokotsehile lefatšeng. 9Empa leeba la se ke la fumana moo le ka beang leoto teng, 'me la khutlela ho eena ka arekeng, hobane metsi a ne a sa tletse hohle lefatšeng. A nanabetsa letsoho la hae, a tšoara leeba, a le khutlisetsa ho eena ka arekeng. 10A ema matsatsi a mang a supileng, a nt'o ntša leeba hape ka arekeng. 11Mantsiboea la khutlela ho eena, molomong oa lona le nkile lehlaku la mohloaare, le neng le qeta ho rojoa. Joale Nōoe a tseba hore metsi a fokotsehile lefatšeng. 12A boela a ema matsatsi a supileng hape, a nt'o boela a ntša leeba, empa la se ke la hlola le khutlela ho eena hape.
13Ka selemo sa makholo a tšeletseng a motso o mong, ka khoeli ea pele, ka letsatsi la pele la khoeli, metsi a ne a se a monyetse fatše. Nōoe a bula areka kaholimo, 'me a bona hore joale ho qōmme. 14Ka khoeli ea bobeli, ka letsatsi la mashome a mabeli a metso e supileng, lefatše le ne le se le omme ngo!
15Eaba Molimo o re ho Nōoe: 16“Uena le mosali oa hao, le bara ba hao, le lingoetsi tsa hao, tsoa ka arekeng. 17Tsoa le libōpuoa tsohle tse phelang: linonyana, le liphoofolo, le tsohle tse hahabang holim'a lefatše, li tle li tsoale haholo, li ate, li ngatafale lefatšeng.”
18Joale Nōoe a tsoa a e-na le mosali oa hae, le bara ba hae, le lingoetsi tsa hae. 19Liphoofolo tsohle, le makhomo 'ohle, le linonyana tsohle, le tsohle tse hahabang holim'a lefatše, tsa tsoa ka arekeng ka mefuta ea tsona.
20Joale Nōoe a hahela Morena aletare, 'me a khetha liphoofolong tsohle tse sa ileheng, le linonyaneng tsohle tse sa ileheng, 'me ka tsona a etsa sehlabelo sa secheso aletareng. 21Ha Morena a utloa monko o monate, a re ka pelong ea hae: “Ha ke sa tla hlola ke rohaka lefatše ka baka la motho, hobane mehopolo ea pelo ea motho haesale e le mebe ho tloha bocheng ba hae. Ha ke sa tla boela ke otla lintho tsohle tse phelang, joalokaha ke entse.
22“Ha feela lefatše
le sa ntse le le teng,
nako ea ho jala le ea ho kotula,
mohatsela le mofuthu,
hlabula le mariha,
motšeare le bosiu
li ke ke tsa phetsa ho ba teng.”
