Litaba tsa Kaine le Abele
1Adama a kena likobong tsa mosali oa hae, Eva; mosali a ithoala, a tsoala Kaine. Eaba Eva o re: “Ke fumane monna ka thuso ea Morena.” 2A boela a tsoala Abele, moen'a Kaine.
Abele e ne e le molisa oa linku, athe Kaine eena e ne e le molemi. 3Ha nako e ntse e e-ea, Kaine a tlisetsa Morena nyehelo ea lilopotsiea. 4Abele le eena a mo tlisetsa matsibolo a nonneng a mohlape oa hae. Morena a khahloa ke Abele le nyehelo ea hae, 5empa a se ke a khahloa ke Kaine le nyehelo ea hae. Kaine a halefa haholo, sefahleho sa hae sa tsunkana.
6Morena a re ho Kaine: “U halefetse'ng? Ke ka baka la'ng ha sefahleho sa hao se tsunkane? 7Haeba u etsa hantle, na sefahleho sa hao ha se na ho bontša khotso? Empa ha u sa etse hantle, sebe se laletse monyakong oa hao, sea u lakatsa; feela uena eka khona u se hlōle.”
8Kaine a re ho Abele, moen'a hae: “A re ee naheng.” Joale eare ha ba le naheng, Kaine a tsohela Abele moen'a hae matla, a 'molaea.
Teleko ea Kaine
9Morena a re ho Kaine: “Ngoan'eno, Abele, o kae?”
Kaine a araba, a re: “Ha ke tsebe! Na ke 'na molisana oa ngoan'eso?”
10Morena a re: “U entse'ng? Lentsoe la mali a ngoan'eno le ipiletsa ho 'na le e-tsoa mobung. 11Kahoo u rohakehile, 'me u lelekiloe mobung oo mali a ngoan'eno, a tšolotsoeng ke letsoho la hao, a monyetseng ho oona. 12Ha u lema, mobu o ke ke oa hlola o u atlehisa ka tse tsoang ho oona. U tla ba 'malehi le moleleri lefatšeng.”
13Kaine a re ho Morena: “Kotlo ea ka e kholo hoo ke sitoang ho e mamella. 14Bona, kajeno u ntelekile naheng ena, 'me nke ke ka hlola ke bona sefahleho sa hao. Ke tla ba 'malehi le moleleri lefatšeng, 'me ho tla etsahala hore ea mponang a mpolaee.”
15Morena a re ho eena: “Ka baka leo, mang le mang ea tla bolaea Kaine, polao eo e tla pheteletsoa hasupa.” Eaba Morena o tšoaea Kaine, esere ea 'monang a 'molaea. 16Kaine a tloha pel'a Morena, a ea aha lefatšeng la Nodo, ka bochabela ho Edene.
Lelōko la Kaine
17Kaine a kena likobong tsa mosali oa hae; mosali a ithoala, a tsoala Henoke. Kaine a haha motse, a o reella ka mora oa hae, Henoke. 18Henoke a tsoala Irade; Irade a tsoala Mehueaele; Mehueaele a tsoala Methushaele; Methushaele a tsoala Lameke.
19Lameke a nyala basali ba babeli: lebitso la e mong e ne e le Ada, la e mong e le Silla. 20Ada a tsoala Jabale, eo e leng ntat'a ba neng ba phela litenteng, ba ruileng mehlape. 21Lebitso la moen'a hae e ne e le Jubale, eo e leng ntat'a bohle ba neng ba letsa makolilo le liphala. 22Silla eena a tsoala Tubale-Kaine, eo e neng e le lelala la lintho tse entsoeng ka lethose le tšepe. Khaitseli ea Tubale-Kaine e ne e le Naama.
23Eaba Lameke o re ho basali ba hae:
“Ada le Silla, utloang lentsoe la ka:
lōna basali ba Lameke,
mamelang polelo ea ka:
ke bolaile motho
ea mpatileng leōma,
le mohlankana ea ntetelitseng.
24Haeba Kaine a pheteletsoa hasupa,
Lameke eena e tla ba
hamashome a supileng hasupa.”
25Adama a boela a kena likobong tsa mosali oa hae, mosali a mo tsoalla mora eo a ileng a mo rea lebitso la Seta. Eva a re: “Molimo o mphile ngoana e mong bakeng sa Abele, hobane Kaine o ne a 'molaee.” 26Seta le eena a ba le mora, 'me a mo rea lebitso la Enoshe.
Joale batho ba qala ho rapela Morena.
