Juda le Tamare
1Ka eona nako eo Juda a tloha ho bana babo, a fapohela ha monna oa Adulame, eo lebitso la hae e neng e le Hira. 2Teng Juda a bona morali oa Mokanana, ea bitsoang Shua; a mo nyala, 'me a kena likobong tsa hae. 3Mosali eo a emola, a tsoala mora, 'me a mo rea lebitso la Ere. 4A emola hape, a tsoala mora, 'me a mo rea lebitso la Onane. 5A boela a tsoala mora, a mo rea lebitso la Shela. Juda o ne a le Kesibe ha Hira a tsoala mora eo.
6Eaba Juda o nyalisa Ere, letsibolo la hae; lebitso la mosali oa hae e ne e le Tamare. 7Empa Ere, letsibolo la Juda, e ne e le motho ea khopo mahlong a Morena, 'me Morena a 'molaea.
8Eaba Juda o re ho Onane: “Kenela mohats'a moholoane oa hao, u mo tsoalle bana, kaha u ngoan'abo monna oa hae.” 9Empa Onane o ne a tseba hore bana bao ha e na ho ba bana ba hae; kahoo ha a ne a kena likobong tsa mosali oa ngoan'abo, o ne a ee a e chomolele, esere a tsoalla ngoan'abo bana. 10Seo a ileng a se etsa sa e-ba sebe mahlong a Morena, 'me le eena Morena a 'molaea. Eaba Juda o re ho Tamare, ngoetsi ea hae:
11“Khutlela heno, 'me u itulele u le mohlolohali, ho fihlela mora oa ka Shela a hōla.” O ne a tšaba hore Shela le eena o tla shoa joaloka bana babo. Eaba Tamare oa tsamaea, o ea lula habo.
12Ha nako e ntse e tsoela pele, mosali oa Juda, morali oa Shua, a shoa. Ha Juda a se a tšelisehile, a nyolohela Timina ho bakuti ba linku tsa hae, a e-na le motsoalle oa hae Hira, oa Adulame.
13Ha Tamare a bolelloa, ho thoe: “Matsal'a hao o nyolohela Timina ho ea kuta linku tsa hae,” 14a hlobola liaparo tsa hae tsa bohlolohali, a ikhurumetsa ka lesira, a ithatela ka lona, 'me a lula khorong ea Enaime, e tseleng e eang Timina. Tamare o ne a se a bone hore Shela o hōlile, empa o ne a e-s'o mo neoe hore e be mosali oa hae.
15Ha Juda a 'mona, a hopola hore ke seotsoa, hobane o ne a ikhurumelitse sefahleho. 16A fapohela ho eena kathōko ho tsela, 'me a re: “Tloo, re robale le uena.” O ne a sa tsebe hore ke ngoetsi ea hae.
Tamare a re: “U tla 'nea'ng, e le hore u tle u kene likobong tsa ka?”
17A re: “Ke tla u rōmella potsanyane e tsoang mohlapeng oa ka.”
Eaba Tamare o re: “Na u tla bea lintho paneng ho fihlela u e rōmela?”
18Juda a re: “Ke tla bea eng paneng?”
Tamare a re: “Setempe sa hao sa bopaki, le leqhoèlè la sona, le molamu o letsohong la hao.” A mo nea tsona, 'me Juda a kena likobong tsa hae, a mo emarisa. 19Joale Tamare a ema, a itsamaela, a tlosa lesira la hae, 'me a boela a apara liaparo tsa hae tsa bohlolohali.
20Ha Juda a rōmella potsanyane ka motsoalle oa hae Adulame, hore mosali a khutlise seo a neng a se beile paneng, a se ke a hlola a fumana mosali eo. 21A botsa banna ba sebaka seo, a re: “Seotsoa sela se neng se le Enaime, pel'a tsela, se kae?”
Ba araba, ba re: “Ha ho seotsoa se kileng sa e-ba mona.”
22Eaba o khutlela ho Juda, o re: “Ha kea se fumana!”
23Juda a re: “Seotsoa seo se ka ipolokela lintho tseo e le tsa sona, esere ra tšehoa. Ua bona, ke rōmetse potsanyane ena, empa ha ua ka ua fumana seotsoa seo.”
24Kamora' khoeli tse tharo Juda a bolelloa, ha thoe: “Tamare, ngoetsi ea hao, o ile a iketsa seotsoa, 'me ho feta mona ke moimana ka baka la bootsoa boo ba hae.”
Juda a re: “Mo tliseng, 'me a chesoe!”
25Eare ha Tamare a tlisoa, a rōmela molaetsa ho matsal'a hae, a re: “Ke emarisitsoe ke mong a lintho tsena.” A re: “Kea u botsa hle, lintho tsee ke tsa mang: Setempe sa bopaki, le leqhoèlè la sona, le molamu?”
26Juda a li tseba, 'me a re: “O lokile ho mpheta, hobane ha kea ka ka mo nea mora oa ka Shela.” A se ke a hlola a robala le eena hape.
27Ha nako ea hae ea ho kena tlung e fihla, ho ne ho e-na le mafahla ka pōpelong ea hae. 28Eare ha a itšihlolla, ngoana e mong a ntša letsoho, 'me 'melehisi oa hae a nka khoele e khubelu, a mo tlama letsoho ka eona, a re: “Enoa o hlahile pele.” 29Empa eare ha a honyetsa letsoho la hae, eaba ngoan'abo oa hlaha, 'me 'melehisi a re: “Joale uena u monyohile joang?” A mo rea lebitso la Perese. 30Kamorao ha hlaha ngoan'abo, ea tlamiloeng ka khoele e khubelu letsohong la hae, 'me a reoa lebitso la Sera.
