Jakobo o balehela Harane
1Isaka a bitsa Jakobo, a mo hlohonolofatsa, a mo laela, a re: “U se ke ua nyala e mong oa banana ba Bakanana. 2Tsamaea, u ee Padane-Arame, tlung ea Bethuele, ntat'ao moholo ea tsoalang 'm'ao; u nyale mosali teng ho barali ba malom'ao Labane. 3Molimo ea matla 'ohle a ke a u hlohonolofatse, a u fe bana ba bangata, a be a u atise haholo-holo, u tle u be ralichaba-chaba. 4A ke a u nee lehlohonolo la Aborahama, uena le litlōhōlō tsa hao, u tle u rue naha eo u leng mojaki ho eona, eo Molimo a neng a e nee Aborahama!” 5Ka mokhoa ona, Isaka a re Jakobo a tsamaee, 'me eena a ea Padane-Arame ha Labane, mora oa Bethuele oa Moarame, khaitseli ea Rebeka, 'm'a bo-Jakobo le Esau.
6Esau a bona hore Isaka o hlohonolofalitse Jakobo, 'me o mo rōmetse Padane-Arame ho ea nyala mosali teng; le hore, ha a mo hlohonolofatsa, o ile a mo laela, a re: “U se ke ua nyala e mong oa banana ba Bakanana;” 7le hore Jakobo o mametse ntat'ae le 'm'ae, ka ho ea Padane-Arame. 8Esau a bona hore mahlong a ntat'ae, Isaka, banana ba Bakanana ba khopo; 9eaba o ea ha Ishemaele, o eketsa sethepu sa hae ka ho nyala Mahalate, morali oa Ishemaele, mora oa Aborahama, khaitseli ea Nebajote.
Toro ea Jakobo
10Jakobo a tloha Beeresheba, a leba Harane. 11A fihla sebakeng se seng, a robala teng, hobane letsatsi le ne le se le liketse. Joale a nka le leng la majoe a hona moo, a le sama, eaba oa robala. 12A lora toro, 'me ho eona a bona lere e hlonngoeng fatše, e il'o fihla leholimong. A bona mangeloi a Molimo a ntse a e-hloa, a theoha ka eona. 13A bona Morena a eme kaholimo ho eona, a ntse a re: “Ke 'na Morena, Molimo oa ntat'ao Aborahama, le Molimo oa Isaka. Naha eo u robetseng ho eona ke tla u nea eona le litlōhōlō tsa hao. 14Litlōhōlō tsa hao li tla ba kaalo ka lerōle la lefatše, 'me u tla namela bophirimela, le bochabela, le leboea, le boroa. Merabe eohle ea lefatše e tla hlohonolofatsoa ka uena le ka litlōhōlō tsa hao. 15Bona, ke na le uena, 'me ke tla u sireletsa hohle moo u eang teng, ke be ke u khutlisetse naheng ena. Ha nka ke ka u furalla, ho fihlela ke etsa seo ke se buileng ho uena.”
16Eaba Jakobo o phaphama borokong, o re: “Ruri Molimo o teng sebakeng sena; feela ke ne ke sa tsebe.” 17A tšaba, 'me a re: “Sebaka see se tšabeha hakaakang! Sebaka sena ke sona ntlo ea Molimo, ebile ke khoro ea leholimo.”
18Jakobo a tsoha ka malungoa-lungoana, a nka lejoe leo a neng a le samile, a le hloma hore e be mokolokotoane, a le tšéla ka ole. 19Sebaka seo a se rea lebitso la Bethele; athe pele motse oo o ne o bitsoa Lōse.
20Eaba Jakobo oa ikana, o re: “Haeba Molimo a ka ba le 'na, a mpaballa leetong lena leo ke le nkileng, a mpha bohobe ka ja, le liaparo ka apara, 21ka ba ka khutlela tlung ea ntate ka khotso, Morena e tla ba Molimo oa ka. 22Le lejoe leo ke le hlommeng hore e be mokolokotoane, e tla ba ntlo ea Molimo. Ke tla mo nea karolo e le 'ngoe leshomeng ka leng la tsohle tseo a mphang tsona.”
