TŠIMOLOHO 25

₁Aborahama a boela a nyala mosali e mong, eo lebitso la hae e neng e le Ketura. ₂Mosali enoa a mo tsoalla Simerane, le Jokoshane, le Medane, le Midiane, le Jishebaka, le Shua. ₃Jokoshane a tsoala Sheba le Dedane. Litlōhōlō tsa Dedane e ne e le Baasure, le Baletushe, le Baleumime. ₄Bara ba Midiane e ne e le Efa, le Efere, le Hanoke, le Abida, le Eledaa. Bana bohle e ne e le bara ba Ketura.

₅Aborahama a nea Isaka tsohle tseo a nang le tsona. ₆Empa ha e le bara ba basali ba hae ba mafielo, Aborahama a ba nea limpho, 'me eitse a sa phela a ba tlosa ho mora oa hae Isaka, a ba isa ka nq'a bochabela, naheng ea bochabela.

₇Litšiu tsa bophelo ba Aborahama e bile lilemo tse lekholo le mashome a supileng a metso e mehlano. ₈Aborahama a neela moea a shoa, 'me a orohela ho bang ka eena, hoba a phele halalele ka boiketlo, a hōlile, a atetsoe ke litšiu. ₉Bara ba hae, Isaka le Ishemaele, ba mo epela lehaheng la Makapela, tšimong ea Eferone, mora oa Sohara oa Mohete, pel'a Mamore. ₁₀Tšimo ena Aborahama o ne a e rekile ho bara ba Hete. Ke moo Aborahama a ileng a epeloa teng, le mosali oa hae Sara. ₁₁Kamora' lefu la Aborahama, Molimo a hlohonolofatsa Isaka, mora oa hae. Isaka a aha Selibeng sa Lakai-Roi.

₁₂Lena ke lelōko la Ishemaele, mora oa Aborahama, eo Hagare oa Moegepeta, lekhabunyane la Sara, a ileng a mo tsoalla Aborahama.

₁₃Ana ke mabitso a bara ba Ishemaele ka ho hlahlamana ha tsoalo ea bona: Nebajote, letsibolo la Ishemaele, le Kedare, le Adabeele, le Mibesame, ₁₄le Mishema, le Duma, le Masa, ₁₅le Hadare, le Tema, le Jeture, le Nafisha, le Kedema. ₁₆Bana ke bona bara ba Ishemaele, 'me ana ke mabitso a bona, ho ea ka metse ea bona, le ho ea ka liahelo tsa bona; ke mahosana a leshome le metso e 'meli, ho ea ka merabe ea bona.

₁₇Lilemo tsa bophelo ba Ishemaele e bile lekholo le mashome a mararo a metso e supileng. A neela moea, a shoa, 'me a orohela ho bang ka eena. ₁₈Litlōhōlō tsa hae tsa aha ho tloha Hafila ho ea fihla Shure, ka bochabela ho Egepeta, tseleng e eang Asiria. A aha ka bochabela ho bana babo.

₁₉Tsena ke litaba tsa Isaka, mora oa Aborahama.

Aborahama o ile a tsoala Isaka. ₂₀Isaka o ne a e-na le lilemo tse mashome a mane, ha a nyala Rebeka, morali oa Bethuele, Moarame oa Padane-Arame, khaitseli ea Labane oa Moarame.

₂₁Isaka a rapella mosali oa hae ho Morena, hobane e ne e le nyōpa, 'me Morena a utloa thapelo ea hae, Rebeka mosali oa hae ea e-ba moimana. ₂₂Masea a ne a rahana ka pōpelong ea hae; eaba o re: “Haeba ho tjee, ekaba ke phelela eng?” A ea botsa Morena, ₂₃'me Morena a re ho eena:

₂₄Ha matsatsi a hae a ho beleha a se a phethahetse, bonang, mafahla a ne a le teng ka pōpelong ea hae.

₂₅La pele la hlaha le le lefubelu, 'mele oohle oa lona o ne o ka kobo e phōphōmang boea, 'me ba le rea lebitso la Esau. ₂₆Kamora' moo ha hlaha moena oa hae, 'me letsoho la hae le ne le tšoere serethe sa Esau, eaba ba mo rea lebitso la Jakobo. Isaka o ne a e-na le lilemo tse mashome a tšeletseng ha a ba tsoala.

₂₇Ha bashanyana bana ba ntse ba hōla, Esau ea e-ba setsomi, a phela har'a naha; athe Jakobo e ne e le motho oa khotso, oa sesala-hae. ₂₈Isaka o ne a rata Esau, hobane o ne a e-ja nama ea liphoofolo tseo a li bolaeang, empa Rebeka eena o ne a rata Jakobo.

₂₉Ka mohlomong Jakobo o ne e phehile sopho, Esau a kena a e-tsoa naheng, a lapile haholo. ₃₀Eaba Esau o re ho Jakobo: “Ak'u mphe ntho e khubelu eno, ntho e khubelu eno hle, ke je, hobane ke lapile haholo!” Ke ka baka leo a reiloeng lebitso la Edomo.

₃₁Jakobo a re: “Nthekisetse litokelo tsa boholo ba hao pele.”

₃₂Esau a re: “Bona, ke se ke le lekhatheng la ho shoa; ho 'na molemo oa litokelo tsa boholo ba ka ke ofe?”

₃₃Jakobo a re: “Ntlhapanyetse pele!” Eaba oa mo hlapanyetsa, o rekisetsa Jakobo litokelo tsa boholo ba hae.

₃₄Joale Jakobo a fa Esau bohobe le sopho ea lierekisi; eaba oa ja, oa noa, a nt'o phahama, a ikela.

Esau a nyelisa litokelo tsa boholo ba hae joalo.