Karohano ea Aborame le Lota
1Aborame a nyoloha Egepeta, eena le mosali oa hae, 'moho le Lota, le tsohle tseo a neng a e-na le tsona, ba ea naheng e ka boroa. 2Aborame o ne a ruile mehlape e mengata, le silefera, le khauta.
3A 'na a tsoela pele maetong a hae ho tloha boroa ho ea Bethele, le ho ea fihla sebakeng seo a neng a hlomile litente tsa hae mehleng ea pele, pakeng tsa Bethele le Ai, 4e leng sebakeng seo a neng a hahe aletare ea hae ea pele ho sona; ke moo Aborame a neng a rapele Morena teng.
5Lota, ea neng a tsamaea le Aborame, o ne a e-na le mehlape ea linku le ea likhomo, le litente, 6e leng hore naha eo e ne e ke ke ea ba lekana haeba ba ne ba ka aha 'moho; maruo a bona a ne a le mangata hoo ba neng ba ke ke ba aha 'moho. 7Liqabang tsa hlaha pakeng tsa balisana ba Aborame le ba Lota. Nakong eo Bakanana le Baperise ba ne ba ahile naheng eo.
8Eaba Aborame o re ho Lota: “Kea u rapela, qabang a e ke e be sieo pakeng tsa rōna le uena, le pakeng tsa balisana ba ka le balisana ba hao, hobane re bana ba motho. 9Ha ke re u ka ikhethela moo u ratang teng naheng ee eohle? A re arohane. Haeba u e-ea ka letsohong le letšehali, 'na ke tla ea ka ho le letona; ha u e-ea ka ho le letona, ke tla ea ka ho le letšehali.”
10Lota a phahamisa mahlo, 'me a bona phula eohle ea Jorodane e e-na le metsi a mangata, joaloka serapa sa Morena, le joaloka Egepeta, ho ea fihla Sōoare. E ne e le pele Morena a timetsa Sodoma le Gomora. 11Eaba Lota o ikhethela phula eohle ea Jorodane, a leba bochabela, 'me ba arohana. 12Aborame a aha naheng ea Kanana, ha Lota eena a ile a ikhahela metseng e phuleng, a hloma litente tsa hae pel'a Sodoma. 13Batho ba Sodoma e ne e le baetsalibe ba khopo haholo, ba siteloa Morena.
14Kamora' hoba Lota le Aborame ba arohane, Morena a re ho Aborame: “Ak'u phahamise mahlo, 'me u talime ho tloha sebakeng seo u leng ho sona, ho ea leboea le boroa, le bochabela le bophirimela. 15Naha eohle eo u e bonang ke tla u nea eona le litlōhōlō tsa hao kamehla eohle. 16Litlōhōlō tsa hao li tla ba kaalo ka lerōle la lefatše, 'me haeba ho na le motho ea ka balang lerōle la lefatše, le litlōhōlō tsa hao a ka li bala. 17Ema, u tsamaee le naha eo ka bonamo ba eona, hobane ke tla u nea eona.”
18Aborame a khokhotholla litente tsa hae, a ea aha lifateng tsa eike tsa Mamore, tse Heborone, 'me a hahela Morena aletare teng.
