TŠIMOLOHO 11

₁Lefatše lohle le ne le bua puo e le 'ngoe, le sebelisa mantsoe a le mang. ₂Joale eare ha batho ba ntse ba hloma ba hlomola, ba leba bochabela, ba fumana thota naheng ea Shinare, 'me ba aha teng.

₃Eaba baa buisana, ba re: “Tloong, re etseng setene, re se bese, se butsoe hantle.” Bakeng sa majoe ba sebelisa setene, bakeng sa seretse ba sebelisa bōka. ₄Ba re: “Tloong, re ikhaheleng motse, le tora eo tlhōrō ea eona e tla fihla leholimong; mabitso a rōna a tle a tume, esere ra tšoha re qhala-qhalana le lefatše lohle.”

₅Joale Morena a theohela fatše ho tla bona motse le tora eo batho ba e hahang. ₆Eaba Morena o re: “Bonang, kaofela ha bona ke sechaba se le seng, ba bua puo e le 'ngoe. Hona ke qaleho feela ea mosebetsi oa bona, 'me ha ho letho le tla ba thibela morerong oo ba hopotseng ho o etsa. ₇A re theoheleng fatše he, re ferekanye puo ea bona, ba se ke ba utloana ha ba bua.”

₈Joale Morena a ba qhalanyetsa hohle lefatšeng, ho tloha moo ba neng ba le teng, 'me ba tlohela ho haha motse oo. ₉Ke ka baka leo lebitso la oona ho ileng ha thoe ke Babele, hobane ke moo Morena a ileng a ferekanyetsa puo ea lefatše lohle teng, 'me ho tloha moo Morena a ba qhalanyetsa lefatšeng lohle.

₁₀Lena ke lelōko la Sema.

Sema ha a e-na le lilemo tse lekholo, a tsoala Arepakeshade hoba ho fete lilemo tse peli morallo oa metsi o bile teng. ₁₁Hoba Arepakeshade a tsoaloe, Sema o ile a phela lilemo tse makholo a mahlano, 'me a tsoala bara ba bang le barali.

₁₂Arepakeshade a phela lilemo tse mashome a mararo a metso e mehlano, eaba o tsoala Shela. ₁₃Hoba Shela a tsoaloe, Arepakeshade o ile a phela lilemo tse makholo a mane a metso e meraro, 'me a tsoala bara ba bang le barali.

₁₄Shela a phela lilemo tse mashome a mararo, eaba o tsoala Ebere. ₁₅Hoba Ebere a tsoaloe, Shela o ile a phela lilemo tse makholo a mane le metso e meraro, 'me a tsoala bara ba bang le barali.

₁₆Ebere a phela lilemo tse mashome a mararo a metso e mene, eaba o tsoala Pelege. ₁₇Hoba Pelege a tsoaloe, Ebere o ile a phela lilemo tse makholo a mane le mashome a mararo, 'me a tsoala bara ba bang le barali.

₁₈Pelege a phela lilemo tse mashome a mararo, eaba o tsoala Reu. ₁₉Hoba Reu a tsoaloe, Pelege o ile a phela lilemo tse makholo a mabeli le metso e robong, 'me a tsoala bara ba bang le barali.

₂₀Reu a phela lilemo tse mashome a mararo a metso e 'meli, eaba o tsoala Seruge. ₂₁Hoba Seruge a tsoaloe, Reu o ile a phela lilemo tse makholo a mabeli le metso e supileng, 'me a tsoala bara ba bang le barali.

₂₂Seruke a phela lilemo tse mashome a mararo, eaba o tsoala Nakore. ₂₃Hoba Nakore a tsoaloe, Seruke o ile a phela lilemo tse makholo a mabeli, 'me a tsoala bara ba bang le barali.

₂₄Nakore a phela lilemo tse mashome a mabeli a metso e robong, eaba o tsoala Tera. ₂₅Hoba Tera a tsoaloe, Nakore o ile a phela lilemo tse lekholo le leshome le metso e robong, 'me a tsoala bara ba bang le barali.

₂₆Tera a phela lilemo tse mashome a supileng, eaba o tsoala Aborame le Nakore le Harane.

₂₇Lena ke lelōko la Tera.

Tera o ile a tsoala Aborame, le Nakore, le Harane; Harane a tsoala Lota. ₂₈Harane a shoa ntat'ae Tera a sa phela, a shoela naheng eo a tsoaletsoeng ho eona, e leng Ure ea Bakalatiea. ₂₉Bo-Aborame le Nakore ba nyala basali. Lebitso la mosali oa Aborame e ne e le Sarai, 'me lebitso la mosali oa Nakore e le Mileka, morali oa Harane, eo e leng ntat'a Mileka le ntat'a Iseka. ₃₀Sarai e ne e le nyōpa, a se na ngoana.

₃₁Eaba Tera o nka mora oa hae Aborame, le Lota, setlōhōlō sa hae, mora oa Harane le ngoetsi ea hae Sarai, mosali oa mor'a hae Aborame; a tloha le bona naheng ea Ure ea Bakalatiea, a fallela naheng ea Kanana. Ha ba fihla Harane, ba aha teng.

₃₂Litšiu tseo Tera a li phetseng e bile lilemo tse makholo a mabeli le metso e mehlano. Tera o ile a shoela Harane.