Bolokolohi ba Bokreste
1Kreste o re lokolotse, hore re fele re be le bolokolohi. Tiisetsang ke hona, 'me le se ke la lumela ho boela le jarisoa joko ea bokhoba.
2Mamelang! Ke 'na Paulosi ea le bolellang sena: Ha le ka bōlla, Kreste ha a sa tla ba le thuso ho lōna. 3Ke paka hape hore mang le mang ea bōllang o tlamehile ho phetha Molao oa Moshe kaofela. 4Lōna ba batlang ho lokafatsoa ka Molao oo, le ikhaohantse le Kreste, le lahlehetsoe ke mohau oa Molimo. 5Ha e le rōna, ka matla a Moea oa Molimo, re lebeletse, ka tumelo, tokafatso eo re tšepileng ho e fumana, 6hobane ha motho a le ho Kreste, lebōllo kapa boqai hase letho, empa taba-taba ke tumelo e sebetsang ka lerato.
7Le ne le ntse le le temeng. Ke mang ea le thibetseng ho 'na le latela 'nete? 8Khothaletso eo ha e tsoe ho ea ntseng a le bitsa. 9Ka tomoso e seng kae ho lomosoa hlama kaofela. 10'Na ke le tšepile Moreneng, hore le ke ke la hopola letho lesele. Empa eo ea le ferekanyang, leha e ka ba mang kapa mang, o tla oeloa ke kotlo. 11Ha e le 'na, bana beso, haeba ke ntse ke ruta tsa lebōllo, ke'ng ha ke sa ntse ke hlorisoa? Hoja ho joalo, khōpiso ea sefapano e ka be e felisitsoe. 12E se e ka bao ba le fuluhang ba ka iphaola!
13Lōna, bana beso, le bitselitsoe bolokolohi. Feela ka bolokolohi boo, le se ke la fa tsa botho sebaka, le mpe le sebeletsane ka lerato; 14etsoe Molao oohle o akaretsoa ka taelo e le 'ngoe: Rata oa heno joalokaha u ithata. 15Empa ha le lōmana, 'me le jana, hlokomelang, esere la timetsana.
Litholoana tsa Moea le mesebetsi ea botho
16Joale ke re: Tsamaisoang ke Moea, 'me ha le ka ke la phetha litakatso tsa botho. 17Litakatso tsa botho li loantšana le tsa Moea, le tsa Moea li loantšana le tsa botho. Li hanyetsana hoo le sitoang ho etsa seo le se ratang. 18Ha le ka tsamaisoa ke Moea, ha le sa le pusong ea Molao oa Moshe.
19Joale mesebetsi ea botho e tōtōbetse: Ke bohlola, liketso tse litšila, tse manyala, 20tšebeletso ea melimo ea bohata, boloi, bōra, liqabang, mohōnō, khalefo, likhang, liphapang, likhaohano, 21mōna, botahoa, bonyollo, le tse ling tse joalo. Joalokaha nkile ka le bolella e sa le pele, ke sa boela ke le bolella hape hore ba etsang tse joalo e ke ke ea e-ba majalefa a 'Muso oa Molimo.
22Empa se beoang ke Moea ke lerato, thabo, khotso, mamello, mosa, molemo, botšepehi, 23bonolo le boitšoaro. Tse kang tsena, ha ho molao o ka li thibelang. 24Joale bao e leng ba Kreste ba thakhisitse lithato le litakatso tsa bona tsa botho. 25Haeba re phela ka Moea, a re keng re tsamaisoe ke Moea. 26Re se ke ra ipatlela thoriso ea lefeela; re se ke ra phephetsana, kapa ra hōnōhelana.
