1Joale ke re, ha mojalefa e sa le ngoana, ha ho moo a fapaneng le lekhoba teng, le hoja e le mong'a tsohle, 2empa o tlas'a bahōlisi le baokameli ba ntlo, ho fihlela nako e beiloeng ke ntat'ae e fihla. 3Ho joalo le ho rōna; ha re ne re sa le bana, re ne re le makhoba a meea e busang lefatše. 4Empa ha nako e baliloeng e se e fihlile, Molimo o ile a rōma Mora oa hae, a tsoaloa ke mosali, a ba tlas'a Molao, 5hore a tle a lopolle ba tlas'a Molao, re tle re etsoe bana ba Molimo. 6Kaha le le bana, Molimo o rōmetse Moea oa Mora oa hae lipelong tsa lōna, o hōoang, o re: “Abba!” ke ho re: “Ntate!” 7Kahoo ha le sa le makhoba, le se le le bana ba Molimo, 'me ha le le bana ba hae, le entsoe majalefa ke Molimo.
Ngongoreho ea Paulosi ka Bagalata
8Nakong e fetileng, ka ho se tsebe Molimo, le ile la ba makhoba a tseo ka boleng ba tsona e seng melimo. 9Empa kaha joale le tseba Molimo, kapa nka re kaha le tsejoa ke Molimo, le ka khutlela joang taolong ea meea eo e fokolang, e futsanehileng, eo le ratang ho boela le e-ba makhoba a eona? 10Le bōlōka matsatsi a itseng, le likhoeli, le likarolo tsa selemo, le lilemo. 11Kea tšaba, esebe ke fufuleletsoe lefeela har'a lōna.
12Bana beso, kea le rapela: E-bang joaloka 'na, hobane le 'na ke joaloka lōna. Ha lea ntšiteloa ka letho. 13Le tseba hore ho qaleng, ho kula ha ka ho ile ha mpha monyetla oa ho le bolella molaetsa o molemo. 14Ha lea ka la oela molekong oa ho 'nyelisa kapa ho 'nyekelloa ka baka le boemo ba 'mele oa ka, empa le nkamohetse e ka ke lengeloi la Molimo, le joalokaha le ka amohela Kreste Jesu. 15Joale lehlohonolo lela la lōna le kae? Etsoe kea le paka hore, hoja ho ne ho ka etsahala, le ka be le ikhontse mahlo, la mpha 'ona. 16Na ke fetohile sera sa lōna ka ho le bolella 'nete?
17Ba bang baa le thahasella, empa e seng ka mokhoa o motle; ba mpa ba rata ho le arohanya le 'na, hore le tle le thahaselle bona. 18Ke hantle ho thahaselloa ka sepheo se setle kamehla, e seng feela ha ke le teng har'a lōna. 19Bana ba ka, ke boela ke le utloela bohlōkō bo kang ba pelehi, ho fihlela Kreste a bōpeha ka ho lōna. 20Ke ne nka rata ho ba le lōna hona joale, e le hore ke tle ke tsepamise puo ea ka, hobane taba ea lōna e nkemisitse hlooho.
Hagare le Sara
21Mpolelleng, lōna ba ratang ho ba tlas'a Molao, na ha le utloisise Molao? 22Ho ngotsoe hore Aborahama o ne a e-na le bara ba babeli, e mong e le oa mosali eo e leng lekhoba, e mong e le oa mosali eo e sa kang ea e-ba lekhoba. 23Empa mora oa mosali eo e leng oa lekhoba o ne a tsoetsoe ka mokhoa o tloaelehileng; athe mora oa mosali eo e sa kang ea e-ba lekhoba o ne a tsoetsoe ho ea ka tšepiso.
24Taba tseo ke papiso. Basali bao ba tšoantša lilekane tse peli. Se seng se tsoang thabeng ea Sinai, se tšoantšoa ka Hagare, ea tsoalang makhoba. 25Hagare o tšoantša thaba ea Sinai e Arabia, 'me o emetse Jerusalema ea kajeno, eo e leng lekhoba 'moho le bana ba eona. 26Empa Jerusalema e holimo, e leng 'm'a rōna, eona e lokolohile, 27hobane ho ngotsoe, ho thoe:
“Thaba, uena nyōpa,
uena ea sa beleheng;
tsanyaola, u bine ka thabo,
uena ea sa kang a utloa
bohlōkō ba pelehi;
hobane bana ba mosali ea lahliloeng
ba bangata ho feta
ba mosali ea nyetsoeng.”
28Joale, bana beso, lōna le bana ba tšepiso joaloka Isaka. 29Empa joalokaha mehleng eo mora ea tsoetsoeng ka mokhoa o tloaelehileng a ne a hlorisa ea tsoetsoeng ka Moea, le joale ho sa le joalo. 30Feela Mangolo a re'ng? A re: “Leleka mosali enoa oa lekhoba le mora oa hae, hobane mora oa mosali enoa oa lekhoba a ke ke a ba mojalefa le mora oa mosali eo e sa kang ea e-ba lekhoba.” 31Ha ho le joalo, bana beso, ha re bana ba mosali eo e leng lekhoba, empa re ba mosali eo e sa kang ea e-ba lekhoba.
