ESERA 2

₁Bana ke baahi ba naha ea Juda, bao Nebukadenesare, khosi ea Babilona, a neng a ile a ba thōpa, a ba isa Babilona. Joale ba boela ba khutlela Jerusalema le naheng ea Juda; motho ka mong a khutlela motseng oa habo. ₂Ba ne ba tle le Serubabele, le Jeshua, le Nehemia, le Seraea, le Reelaea, le Moredekai, le Bileshane, le Misepara, le Bigifai, le Rehume, le Baana.

Palo ea banna ba sechaba sa Iseraele ke ena: ₃Ba lelapa la Paroshe e ne e le likete tse peli le lekholo le mashome a supileng a metso e 'meli; ₄ba lelapa la Shefatiea e le makholo a mararo le mashome a supileng a metso e 'meli; ₅ba lelapa la Arake e le makholo a supileng le mashome a supileng a metso e mehlano; ₆ba lelapa la Pahate-Moabe, e leng litlōhōlō tsa Jeshua le tsa Joabe, e le likete tse peli le makholo a robeli le leshome le metso e 'meli; ₇ba lelapa la Elame e le sekete le makholo a mabeli le mashome a mahlano a metso e mene; ₈ba lelapa la Satu e le makholo a robong le mashome a mane a metso e mehlano; ₉ba lelapa la Sakai e le makholo a supileng le mashome a tšeletseng; ₁₀ba lelapa la Bani e le makholo a tšeletseng le mashome a mane a metso e 'meli; ₁₁ba lelapa la Bebai e le makholo a tšeletseng le mashome a mabeli a metso e meraro; ₁₂ba lelapa la Asegade e le sekete le makholo a mabeli le mashome a mabeli a metso e 'meli; ₁₃ba lelapa la Adonikame e le makholo a tšeletseng le mashome a tšeletseng a metso e tšeletseng; ₁₄ba lelapa la Bigifai e le likete tse peli le mashome a mahlano a metso e tšeletseng; ₁₅ba lelapa la Adine e le makholo a mane le mashome a mahlano a metso e mene; ₁₆ba lelapa la Atere, ke ho re la Hesekiea, e le mashome a robong a metso e robeli; ₁₇ba lelapa la Besai e le makholo a mararo le mashome a mabeli a metso e meraro; ₁₈ba lelapa la Jora e le lekholo le leshome le metso e 'meli; ₁₉ba lelapa la Hashume e le makholo a mabeli le mashome a mabeli a metso e meraro; ₂₀ba lelapa la Gibare e le mashome a robong a metso e mehlano.

₂₁Ba tsoang Betlelehema e ne e le lekholo le mashome a mabeli a metso e meraro; ₂₂ba tsoang Netofa e le mashome a mahlano a metso e tšeletseng; ₂₃ba tsoang Anatote e le lekholo le mashome a mabeli a metso e robeli; ₂₄ba tsoang Asemafete e le mashome a mane a metso e 'meli; ₂₅ba tsoang Kireate-Jearime, le Kefira, le Beerote e le makholo a supileng le mashome a mane a metso e meraro; ₂₆ba tsoang Rama le Geba e le makholo a tšeletseng le mashome a mabeli a motso o mong; ₂₇ba tsoang Mikemase e le lekholo le mashome a mabeli a metso e 'meli; ₂₈ba tsoang Bethele le Ai e le makholo a mabeli le mashome a mabeli a metso e meraro; ₂₉ba tsoang Nebo e le mashome a mahlano a metso e 'meli; ₃₀ba tsoang Makabishe e le lekholo le mashome a mahlano a metso e tšeletseng; ₃₁ba tsoang Elame e 'ngoe e le sekete le makholo a mabeli le mashome a mahlano a metso e mene; ₃₂ba tsoang Harime e le makholo a mararo le mashome a mabeli; ₃₃ba tsoang Lode, le Hadide, le Ono e le makholo a supileng le mashome a mabeli a metso e mehlano; ₃₄ba tsoang Jeriko e le makholo a mararo le mashome a mane a metso e mehlano; ₃₅ba tsoang Senaa e le likete tse tharo le makholo a tšeletseng le mashome a mararo.

₃₆Baprista, e leng bara ba Jedaea, oa lelapa la Jeshua, e ne e le makholo a robong le mashome a supileng a metso e meraro; ₃₇ba lelapa la Imere e le sekete le mashome a mahlano a metso e 'meli; ₃₈ba lelapa la Pashahure e le sekete le makholo a mabeli le mashome a mane a metso e supileng; ₃₉ba lelapa la Harime e le sekete le leshome le metso e supileng.

₄₀Balevi, e leng litlōhōlō tsa Jeshua le Kademiele, ba lelapa la Hodafiea, e ne e le mashome a supileng a metso e mene.

₄₁Libini, e leng litlōhōlō tsa Asafo, e ne e le lekholo le mashome a mabeli a metso e robeli.

₄₂Ba malapa a balebeli ba Tempele, e leng litlōhōlō tsa Shalome, le Atere, le Talamone, le Akube, le Hatita, le Shobai, e ne e le lekholo le mashome a mararo a metso e robong.

₄₃Basebeletsi ba Tempele e ne e le litlōhōlō tsa Siha, le tsa Hasufa, le tsa Tabaote, ₄₄le tsa Kerose, le tsa Sia, le tsa Padone, ₄₅le tsa Lebana, le tsa Hagaba, le tsa Akube, ₄₆le tsa Hagabe, le tsa Salemai, le tsa Hanane, ₄₇le tsa Gidele, le tsa Gahare, le tsa Reaea, ₄₈le tsa Resine, le tsa Nekoda, le tsa Gasame, ₄₉le tsa Usa, le tsa Paseea, le tsa Besai, ₅₀le tsa Ashena, le tsa Mehunime, le tsa Nefusime, ₅₁le tsa Bakabuke, le tsa Hakufa, le tsa Harehure, ₅₂le tsa Basalote, le tsa Mehida, le tsa Haresha, ₅₃le tsa Barakose, le tsa Sisera, le tsa Tema, ₅₄le tsa Nesia, le tsa Hatifa.

₅₅Ana ke malapa a bahlanka ba Solomone, e leng litlōhōlō tsa Sotai, le tsa Soferete, le tsa Peruda, ₅₆le tsa Jaala, le tsa Darekone, le tsa Gidele, ₅₇le tsa Shefatiea, le tsa Hatila, le tsa Pokerete ea tsoang Sebaime, le tsa Ami.

₅₈Basebeletsi ba Tempele, le litlōhōlō tsa bahlanka ba Solomone, e ne e le makholo a mararo le mashome a robong a metso e 'meli.

₅₉Bana bohle ke bona ba neng ba e-tsoa Tele-Mela, le Tele-Haresha, le Kerube, le Adone, le Imere. Empa ba ile ba hloka bopaki ba hore malapa abo bona le litlōhōlō tsa bona ke Baiseraele. ₆₀Ba lelapa la Delaea, le la Tobiea, le la Nekoda, e ne e le makholo a tšeletseng le mashome a mahlano a metso e 'meli.

₆₁Ana ke malapa a baprista, e leng litlōhōlō tsa Habaea, le tsa Kose, le tsa Barasilai, ea neng a nyale e mong oa barali ba Barasilai oa Mogileade, 'me a b'a s'a ipitsa ka lebitso la mohoe oa hae.

₆₂Bana ba ile ba batla buka ea lelōko la bona, har'a tse ling tsa malōko, empa ba se ke ba e fumana; ka baka leo, ba ntšoa tšebeletsong ea boprista, hobane ho ne ho thoe ha baa hloeka. ₆₃'Musi oa naha a re ba se ke ba ja lijo tse halalelang ka ho fetisisa, ho fihlela moprista a ka ba botsetsa ho Morena ka ho sebelisa majoe a Urime le Thumime.

₆₄Sechaba sohle ha se baloa se ile sa etsa likete tsa mashome a mane a metso e 'meli le makholo a mararo le mashome a tšeletseng; ₆₅ho sa baloe bahlanka le makhabunyane a bona a likete tse supileng le makholo a mararo le mashome a mararo a metso e supileng. Har'a bona ho ne ho e-na le libini tsa banna le tsa basali tse makholo a mabeli.

₆₆Palo ea lipere tsa bona e ne e le makholo a supileng le mashome a mararo a metso e tšeletseng, le limmeile tse makholo a mabeli le mashome a mane a metso e mehlano; ₆₇likamele li le makholo a mane le mashome a mararo a metso e mehlano, litonki li le likete tse tšeletseng le makholo a supileng le mashome a mabeli.

₆₈E ile eare ha batho bana ba fihla Tempeleng ea Morena e Jerusalema, ba bang ba lihlooho tsa malapa abo bona ba etsetsa Tempele ea Molimo linyehelo tsa boithaopo, hore ba boele ba e hahe setšeng sa sona sa pele. ₆₉Bakeng sa mosebetsi ona ba fana kamoo ba ka khonang kateng, ba nea ramatlotlo khauta e etsang boima ba likilo tse makholo a mahlano, le silefera e etsang boima ba likilo tsa likete tse peli le makholo a robeli. Ba fana ka liaparo tsa boprista tse lekholo.

₇₀Baprista, le Balevi, le ba bang ba sechaba, le libini, le balebeli ba menyako, le basebeletsi ba Tempele, ba boela ba aha metseng ea bona, 'me Baiseraele bohle ba aha metseng ea bona.