Bajuda ba khutlela Jerusalema
1Ka selemo sa pele sa puso ea Siruse, khosi ea Peresiea, Morena a phethahatsa polelo eo a neng a e bolele ka Jeremia. Morena a susumetsa Siruse hore a etse phatlalatso ka lengolo, 'me le romeloe 'musong oohle oa hae. Khosi ea e ngola, ea re:
2“Siruse, khosi ea Peresiea, o bua tjena: ‘Morena Molimo oa maholimo, o 'neile mebuso eohle ea lefatše, 'me o ntaetse hore ke mo hahele Tempele Jerusalema, naheng ea Juda. 3E mong le e mong oa sechaba sa hae, ea teng mona har'a lōna, ke re Molimo oa hae a ke a be le eena, 'me eo a nyolohele Jerusalema e naheng ea Juda, a e'o haha Tempele ea Morena Molimo oa Iseraele. Ke eena Molimo ea leng Jerusalema. 4Bohle ba ntseng ba phela, hohle moo ba jakileng teng, baahi ba sebaka seo ba ke ba ba thuse ka silefera, le ka khauta, le ka liphahlo, le ka likhomo, le ka limpho tsa boithaopo, tsa Tempele ea Morena, e Jerusalema.’ ”
5Joale lihlooho tsa malapa a ba morabe oa Juda, le oa Benjamine, le baprista, le Balevi, le bohle bao Morena a neng a susumelitse meea ea bona, ba itokisetsa ho ea haha Tempele ea Morena Jerusalema. 6Bohle ba neng ba ahisane le bona ba ba thusa ka lintho tse entsoeng ka silefera, le ka khauta, le ka liphahlo, le ka likhomo, le ka lintho tsa bohlokoa, ntle ho limpho tsa boithaopo.
7Le khosi Siruse a ntša thepa eohle ea Tempele ea Morena, eo Nebukadenesare a neng a ile a e nka Jerusalema, a e bea ka tempeleng ea melimo ea hae. 8Tsena tsohle khosi Siruse a li bea tlas'a taolo ea Miteredate, eo e neng e le ramatlotlo; eena a li balla Sheshebasare, khosana ea Juda.
9Palo ea tsona ke ena: mekèkè ea khauta e mashome a mararo, le mekèkè ea silefera e sekete, le mefuta e meng ea lijana e mashome a mabeli a metso e robong, 10le likotlolo tsa khauta tse mashome a mararo, le likotlolo tsa silefera tse makholo a mane le leshome, le lijana tse ling tse sekete.
11Palo ea lintho tsena tsohle tse entsoeng ka khauta le ka silefera e ne e le likete tse hlano le makholo a mane. Tsena tsohle Sheshebasare a tla le tsona, ha bathōpuoa ba neng ba le Babilona ba khutlela Jerusalema.
