ESEKIELE 9

₁Lentsoe le matla la hōoa ka litsebeng tsa ka, la re: “Lōna balebeli ba motse, tloong koano! Monna ka mong a tle a nkile lihlomo tsa hae!” ₂Ka bona banna ba tšeletseng ba e-tla ka tsela e lebang monyakong o kaholimo, o talimileng lebōea, monna ka mong a tšoere sebetsa se bolaeang. E mong oa bona o ne a apere seaparo se entsoeng ka lene, qhōlōng ho eena ho leketla lenakana le tšetseng enke. Banna bana ba fihla ba ema pel'a aletare ea lethose.

₃Eaba tlōtla ea Molimo oa Iseraele, e neng e le moo likerubime li neng li le hona teng, e nyolohela holimo, e ea monyakong oa Tempele. Morena a bitsa monna ea apereng seaparo se entsoeng ka lene, eo qhōlōng ea hae ho leketlang lenakana le tšetseng enke. ₄Morena a re ho eena: “Tsamaea har'a motse oohle oa Jerusalema, 'me bohle ba hlomohileng, ba llisoang ke manyala 'ohle a etsoang har'a motse ona, u ba tšoaee liphatleng.”

₅A bua ho banna ba bang ke ntse ke utloa, a re: “E-eang le eena har'a motse, le bolaee! Le se ke la hauhela motho, kapa la mo utloela bohlōkō. ₆Le ba bolaee kaofela: Maqheku le bahlankana le baroetsana le basali le bana, empa bohle ba tšoailoeng le se ke la atamela pel'a bona. Le hle le qale ka Sehalalelong sa ka.” Eaba ba qala ka baholo ba neng ba le kapele ho Tempele.

₇Eaba o re ho bona: “Tempele ena le e silafatse! Mabala a eona le a tlatse litōpō! Tsamaeang he!” Eaba ba tsamaea ba bolaea batho har'a motse. ₈Ha ba ntse ba bolaea batho joalo, ke ne ke setse ke le inotši. Eaba ke itihela fatše ka sefahleho, ke hōoa haholo, ke re: “Oho, Morena Molimo! Na u tla timetsa masalla 'ohle a Iseraele ha u hlatsetsa khalefo ea hao holim'a Jerusalema?”

₉Joale Morena a re ho 'na: “Bokhopo ba ntlo ea Iseraele le ba ntlo ea Juda bo boholo haholo. Naha e tletse lipolao, toka ha e eo motseng ona. Ba re: ‘Morena o furaletse naha ena; Morena ha a bone.’ ₁₀Ka baka leo, nke ke ka ba hauhela, kapa hona ho ba utloela bohlōkō. Motho ka mong o tla putsoa ka tseo a li entseng ba bang.”

₁₁Joale ka bona monna eane ea apereng seaparo se entsoeng ka lene, eo qhōlōng ea hae ho leketlang lenakana le tšetseng enke, a tsebisa Morena, a re: “Ke phethile kamoo u ntaetseng kateng!”