Morena o nyatsa melimo ea bohata
1Lentsoe la Morena la fihla ho 'na, la re: 2“Uena ngoan'a motho, talima lithabeng tsa Iseraele, u li porofetele, 3u re: ‘Lōna lithaba tsa Iseraele, mamelang lentsoe la Morena Molimo. Morena Molimo o bua tjena ho lithaba le ho maralla, le ho linōka le ho likhohlo: 'Na ka sebele sa ka, ke tla le bolaea ka sabole, 'me ke felise libaka tsa lōna tsa borapeli. 4Lialetare tsa lōna li tla heletsoa, melimo ea lōna ea bohata e pshatloe, 'me babolauoa ba lōna ke ba akhele kapele ho melingoana eo ea lōna. 5Litōpō tsa Baiseraele li tla rapalatsoa kapele ho melingoana eo ea bona, masapo a lōna ke a qhalakanye ho pota-pota lialetare tsa lōna. 6Hohle moo le phelang teng metse e tla fetoha masupi, libaka tsa lōna tsa borapeli li heletsoe, e le hore lialetare tsa lōna li tle li senngoe, li sale li le feela. Melimo ea lōna ea bohata e tla pshatloa, e fele, lifika tseo le li khumamelang li heletsoe, 'me tsohle tseo le li entseng li felisoe. 7Litōpō tsa babolauoa li tla rapalla har'a lōna, 'me le tla tseba hore ke 'na Morena.
8“ ‘Empa ke tla siea masalla, hobane ba bang ba lōna ba tla phonyoha sabole, ha le qhalanyetsoa har'a linaha le lichaba. 9Ba phonyohileng sabole, ba lichabeng tseo ba qhalanyelitsoeng ho tsona e le bathōpuoa, ba tla nkhopola, ba hopole kamoo ke soabisitsoeng kateng ke lipelo tsa bona tse hlokang botšepehi, tse ileng tsa mphuralla, 'me mahlo a bona a talima melingoana ea bohata. Ba tla inyonya ka baka la bobe bohle boo ba bo entseng, le ka baka la manyala a bona. 10Ba tla tseba hore ke 'na Morena, le hore ke ne ke sa ba tšose ha ke re ke tla lihela koluoa ena holim'a bona.’ ”
11Morena Molimo o bua tjena: “Opang liatla, le tile ka maoto, le hōoeletse, le re: ‘Bomalimabe bona bo etsahala ka baka la mesebetsi e manyala ea ba ntlo ea Iseraele, hobane ba tla bolaoa ka sabole, le ke sekoboto, le ke lefu la seoa!’ 12Ba hōle ba tla bolaoa ke lefu la seoa, ba haufi bona ba bolaoe ka sabole, masalla a etselitsoeng thibella a bolaoe ke sekoboto. Ka mokhoa o joalo ke tla phethahatsa khalefo ea ka holim'a bona. 13Ke hona le tla tseba hore ke 'na Morena, ha litōpō tsa babolauoa ba bona li rapaletse har'a melingoana ea bona ea bohata, ho pota-pota lialetare tsa bona tse holim'a maralla 'ohle a phahameng, le holim'a litlhōrō tsa lithaba tsohle, le katlas'a lifate tsohle tse talana, le katlas'a lifate tsohle tse teng tsa eike, e leng libaka tseo ho tsona ba neng ba chesetsa mokubetso o nkhang hamonate, ba o chesetsa melingoana ea bona ea bohata. 14Ke tla otlolla letsoho la ka holim'a bona, naha ke e fetole nanaola ho tloha lehoatateng le ka Boroa ho ea Ribela, hohle moo ba phelang teng. Ba tla tseba hore ke 'na Morena.”
