Thibella ea Jerusalema ea tšoantšoa
1“Uena ngoan'a motho, nka letlapa u le bee kapele ho uena, u etse setšoantšo sa motse oa Jerusalema holim'a lona. 2Motse ona u o etsetse thibella, u hahe marako ho o pota-pota, u hahe litora, u hlome liahelo tsa ntoa, 'me u bee litšetlo. 3U nke lekhoakhoa la tšepe, u le hlome pakeng tsa hao le motse, u shebe ka ho lona. Etlaba u o etselitse thibella, ebe uena u o thibeletse. Hona e tla ba pontšo ho ba ntlo ea Iseraele.
4“U paqame ka lehlakore la letsoho le letšehali, 'me 'na ke tla u jarisa bokhopo ba ntlo ea Iseraele. U tla jara bokhopo boo ba bona ho ea ka palo ea matsatsi ao u tla paqama fatše ka 'ona. 5U tla jara makhopo ana a bona ka matsatsi a makholo a mararo le mashome a robong, e leng a lekanang le palo ea lilemo tseo ba entseng bokhopo ka tsona. Ka mokhoa o joalo u tla jara bokhopo ba ntlo ea Iseraele.
6“Ha u se u qetile matsatsi ana, u tla boela u paqama hape ka lehlakore la letsoho le letona, u jare bokhopo ba ntlo ea Juda ka matsatsi a mashome a mane. Letsatsi ka leng le tla lekana le selemo se le seng sa lilemo tseo ba entseng bokhopo ka tsona.
7“U shebe thibella e etselitsoeng Jerusalema, ebe u porofetela Jerusalema letsoho la hao le le phollatsi. 8Ke tla u tlama ka mehala, e le hore u sitoe ho phethohela ka lehlakoreng lefe kapa lefe, ho fihlela u qeta matsatsi a thibella ena ea hao.
9“Nka koro le harese le linaoa le lierekise le rokho le mabele, u li tšele ka pitseng, 'me ka tsona u iketsetse bohobe boo u tla bo ja ka matsatsi ana a makholo a mararo le mashome a robong, ha u ntse u paqame ka lehlakore. 10Ka letsatsi u tla ja bohobe bo etsang boima ba likeramo tse makholo a mabeli le mashome a mararo ka nako e lokelang. 11Ka letsatsi u tla noa metsi a ka lekanang mohotsoana. 12U tla ja liphaphatha tsa harese, u li apehe ka khapane ea masepa a motho, moo ba ntseng ba u bona.”
13Morena a re: “Ka mokhoa o tjena bana ba Iseraele ba tla ja lijo tse silafalitsoeng linaheng tsa balichaba, tseo ke tla ba lelekela ho tsona.”
14Eaba ke re: “Oho, Morena Molimo! Ha ke e-s'o ka ke itšilafatsa! Ho tloha bocheng ba ka ho fihlela kajeno ha ke e-s'o ka ke e-ja eng kapa eng e fumanoang e ichoeletse, kapa e harotsoe ke libatana. Ha ke e-s'o ka ke e-ja nama e sesila.”
15Morena a re ho 'na: “Bona, ke u neile khapane ea bolokoe ba khomo bakeng sa khapane ea masepa a motho, hore u apehe lijo tsa hao ka eona.”
16A boela a re ho 'na: “Bona mona, uena ngoan'a motho, ke tla fokotsa lijo Jerusalema. Batho ba tla ja ka tekanyo le ka tlhokomelo; le metsi ba a noe ka tekanyo, ba tsielehile. 17Lijo le metsi li tla fokotseha, motho a tšohe ha a bona motho e mong, hobane e tla be e se e le bo-masatsoane feela, ka baka la bokhopo ba bona.
