Boporofeta bo nyatsang Tire
1Ka letsatsi la pele la khoeli selemong sa leshome le motso o mong, lentsoe la Morena la fihla ho 'na, la re: 2“Uena ngoan'a motho, ha Tire e bua ka Jerusalema e ile ea tšeha, ea re: ‘Jerusalema e ripitliloe, khoebo ea eona e felile, joale ke tla atleha ha e le mona e fetohile lesupi!’ 3Kahoo Morena Molimo o bua tjena: ‘Uena Tire ke tla u futuhela, ke u bitsetse lichaba tse tsoang hōle, li u loantše, joalokaha leoatle le akhotsa maqhubu a lona. 4Li tla heletsa marako a Tire, li lihe le litora tsa eona. Ke tla hōhōla mobu oa eona, ke siee letlapa le le feela. 5Tire e tla fetoha sebaka seo ho anehoang matlōoa ho sona har'a leoatle, e be lelobelo la lichaba, hobane 'na Morena, ke buile, ho rialo Morena Molimo. 6Barali ba Tire ba har'a naha ba tla bolaoa ka sabole, 'me ba tla tseba hore ke 'na Morena.’ ”
7Morena Molimo o bua tjena: “Ke tla tlisa Nebukadenesare, khosi ea Babilona, khosi ea likhosi, a e-tsoa lebōea, a tl'o futuhela Tire ka lipere le ka likariki tsa ntoa, ka bapalami ba lipere le ka lebōtho le leholo. 8O tla bolaela barali ba hao har'a naha ka sabole, a u etsetse thibella, a u hahele marako, a u etsetse thibella, a u hahele marako, a u etsetse lekhoakhoa la lithèbè. 9O tla thua mabota a hao ka litšetlo, a heletse le litora tsa hao ka meqala. 10Lipere tsa hae li tla ba ngata hoo li tla u koahela ka lerōle. Lekitikiti la lipere, le la makoloi le la likariki tsa ntoa le tla sisinya mabota a hao, ha a kena likhorong tsa hao joaloka banna ba kenang motseng oo marako a oona a helelitsoeng. 11Litlhako tsa lipere tsa hae li tla hatakela literata tsa hao tsohle. O tla bolaea sechaba sa hao sohle ka sabole, litšiea tsa hao li oele fatše. 12Lira tsa hao li tla hapa maruo a hao, li lobele thepa ea hao. Li tla heletsa marako a hao, li lihe matlo a hao a majabajaba. Li tla lahlela majoe a hao leoatleng, li lahlele le maballo a hao, le kōqōkōqō ea matlo a hao a helelitsoeng. 13Ke tla felisa lipina tsohle tsa hao, le molumo oa liharepa tsa hao ke o felise. 14Ke tla u etsa lefika le feela, 'me u tla fetoha sebaka seo ho anehoang matlōoa ho sona. Marako a hao a ke ke a hlola a tsosoa, hobane 'na Morena ke buile, ho rialo Morena Molimo.”
15Morena Molimo o bua tjena ho Tire: “Na linaha tse pel'a leoatle ha li na ho thōthōmela ha li utloa hore u oele, ha mahlatsipa a ntse a lumaela, 'me batho ba bolaoa har'a motse oa hao? 16Mahosana 'ohle a mabōpong a leoatle a tla theoha literoneng tsa 'ona, a hlobole liaparo tsa 'ona tsa bohosana le tse hōmiloeng. A tla lula fatše a tšohile haholo, a ntse a thōthōmela ka linako tsohle, a u makaletse. 17A tla u binela koli-ea-malla, a re:
“ ‘U ripitliloe joang
uena motse o tummeng,
oo baahi ba oona
e leng banna ba leoatle,
uena u neng u le sehanyata,
sehanyata leoatleng,
u le sehanyata
'moho le baahi ba hao?
Bohle ba phelang leoatleng
baa u tšaba!
18Joale lihlekehleke lia thōthōmela,
li thōthōmela
ka tsatsi la ho oa ha hao;
leoatleng lihlekehleke li tšohile,
li tšohile ka baka la ho oa ha hao.’ ”
19Morena Molimo o bua tjena: “Etlare ha ke u etsa nanaola joaloka motse o hlokang baahi, ke u tebisa leoatleng, metsi a u koahela, 20ke tla u theolela tlase, hammoho le ba theohelang tlase mohohlong, ho sechaba sa boholo-holo. Ke tla u lulisa lefatšeng le katlase, masuping a boholo-holo, 'moho le ba theohelang tlase mohohlong. Ha u ka ke ua hlola u khutla teng kapa u e-ba le kabelo lefatšeng la ba phelang. 21Ke tla u felisa ka mokhoa o tšabehang, 'me ha u sa tla hlola u e-ba teng. Ba tla u batla, empa ba ke ke ba hlola ba sa u fumana, ho rialo Morena.”
