Pitsa e mafōōme
1Ka letsatsi la leshome la khoeli ea leshome selemong sa borobong, lentsoe la Morena la boela la fihla ho 'na, la re: 2“Uena ngoan'a motho, ngola letsatsi lena, le eona nako ena, hobane ka lona letsatsi lena, khosi ea Babilona e tla etsetsa Jerusalema thibella. 3Bolella ba ntlo ena ea bafetoheli papiso ena, u re ho bona: ‘Morena Molimo o bua tjena:
“ ‘Bea pitsa ifo,
e bee ifo, u e tlhalihele.
4Pheha nama ka eona,
u phehe nama e nonneng,
nama ea serope le ea sephaka,
u phehe le mashoetla a eona;
5tsena e be tsa nku e khethehileng,
e khethehileng kahar'a mohlape.
Beseletsa pitsa ena e bele,
nama e be e tsoe masapong.
6“ ‘Ka baka leo, Morena Molimo o bua tjena:
“ ‘Ho malimabe
motse o tšollang mali,
o kang pitsa e tletseng mafōōme,
pitsa e sa ke be e faloe!
Tšola maqa a ka pitseng
u a tšole ka bonngwe,
u a tšole u sa a laole ka lōtho.
7“ ‘Motseng ona mali a ne a tšolloe,
a tšolleloa holim'a lefika,
a se ke a tšolleloa fatše,
fatše moo a neng a ka monyela.
8Ho tsosa khalefo le boiphetetso ba ka,
ke ile ka a tlohela holim'a lefika,
moo a neng a ke ke a pateha.
9“ ‘Ka baka leo, Morena Molimo o bua tjena:
“ ‘Ho malimabe
motse o tšollang mali,
ke tla o roallela hlaba ea patsi!
10Bokella patsi u e hotetse,
pheha nama u e butsoise,
u chese moro, le masapo a chesoe.
11Bea pitsa e feela holim'a mashala,
e be e chese,
those la eona le tlerefale,
litšila tsa eona li qhibilihe kahare,
mafōōme a eona a chesoe ke mollo.
12Matsapa 'ohle a lekiloe, a hlōtsoe,
e khanathetse mafōōme,
a hana ho tloha,
ke mollo feela
o ka tsebang ho a tlosa.
13“ ‘Litšila tsa hao ke bokhopo, hobane ke lekile ho u hloekisa, empa litšila tseo tsa hao ha lia ka tsa tloha. U ke ke ua hlola u hloeka ho fihlela khalefo ea ka e kokobela.
14“ ‘Ke 'na Morena ea buileng. Nako ea hore ke nke bohato e fihlile, nke ke ka u utloela bohlōkō, leha e le ho u hauhela. U tla ahlōloa ho ea ka boitšoaro ba hao le liketso tsa hao, ho rialo Morena.’ ”
Lefu la mosali oa moporofeta Esekiele
15Lentsoe la Morena la fihla ho 'na, la re: 16“Uena ngoan'a motho, ka ho panya ha ntši ke tla u amoha mosali oa hao, e leng moratuoa oa hao e moholo. Leha ho le joalo u se ke ua lla, kapa ua bokolla, kapa ua keleketla likeleli. 17U feheloe u ntse u khutsitse, u se ke ua llela bafu. U 'ne u roale moqhaka oa hao hloohong ea hao, le meqathatso ea hao maotong, u se ke ua koahela litelu tsa hao kapa ua ja lijo tse etselitsoeng ba bofifing.”
18Kahoo ka bua le sechaba hoseng, mantsiboea mosali oa ka a hlokahala. Ka la hosasane ka etsa kamoo ke neng ke laetsoe kateng.
19Eaba sechaba sea mpotsa, se re: “Na u ka re hlalosetsa hore na lintho tsee tseo u li etsang li re supisa eng?”
20Ka se araba, ka re: “Lentsoe la Morena le ile la fihla ho 'na, la re: 21‘E-re ho ba ntlo ea Iseraele, Morena Molimo o bua tjena: Bonang, ke tla silafatsa Sehalalelo sa ka, e leng qhobosheane eo le ikhantšang ka eona, eo le e ratang haholo, eo le e qenehelang. Bara le barali ba lōna, bao le ba siileng Jerusalema, ba tla bolaoa ka sabole. 22Le tla etsa kamoo ke entseng kateng. Le se ke la koahela litelu tsa lōna, leha e le ho ja lijo tse etselitsoeng ba bofifing. 23Le roale meqhaka ea lōna lihloohong, le meqathatso ea lōna maotong. Le ke ke la lla leha e le ho bokolla, empa le tla motela ka baka la libe tsa lōna, 'me le llelane. 24Esekiele e tla ba sesupo ho lōna; le tla etsa joalokaha a entse. Etlare ha tsena li phethahala le tsebe hore ke 'na Morena Molimo.’
25“Joale he, uena ngoan'a motho, ke tla tlosa har'a bona qhobosheane eo ba ikhantšang ka eona, eo ba e ratang haholo, eo ba itlōtlang ka eona, eo ba e labalabelang; ke tlose le bara le barali ba bona. 26Hona mohlang oo ea tla phonyoha o tla fihla a u bēhèlè litaba, 27leleme la hao le rarolohe, u tsebe ho bua le ea phonyohileng, u se hlole u e-ba semumu. U tla ba sesupo ho bona, 'me ba tla tseba hore ke 'na Morena.”
