ESEKIELE 13

₁Lentsoe la Morena la fihla ho 'na, la re: ₂“Uena ngoan'a motho, hanyetsa baporofeta bana ba Iseraele ba porofetang. E-re ho bana ba iporofetelang tse tsoang mehopolong ea bona: ‘Mamelang lentsoe la Morena! ₃Morena Molimo o bua tjena: Ho malimabe baporofeta ba lithoto, ba porofetang tsa bona, empa ba sa bona letho! ₄Lōna Baiseraele, baporofeta ba lōna ba tšoana le liphokojoe tse phelang har'a masupi. ₅Ha lea ka la ea thiba likheo tse marakong, kapa la haha metero, e le hore Baiseraele ba tle ba tsebe ho ema senna ntoeng, mohl'a Letsatsi la Morena. ₆Lipono tsa bona ke tsa mafeela, le boporofeta ba bona ke ba leshano. Ba re: “Morena o re,” empa Morena a sa ba rōma, 'me ba lebella hore lipolelo tsa bona li phethahatsoe! ₇Na ha le e-s'o bone lipono tsa bohata, 'me la porofeta bohata, ha le re: “Morena o re,” empa 'na ke sa bua joalo?

₈“ ‘Ka baka leo, Morena Molimo o bua tjena: Kahobane le buile taba tsa mafeela, la bona lipono tsa mashano, kea le loantša, ho rialo Morena Molimo. ₉Ke tla otla baporofeta ba bonang lipono tsa mafeela, ba porofetang mashano; ba ke ke ba e-ba le kabelo phuthehong ea sechaba sa ka, kapa ba ngoloa liketsahalong tsa ntlo ea Iseraele, leha e le ho kena naheng ea Iseraele, le tle le tsebe hore ke 'na Morena.

₁₀“ ‘Kahobane ba khelositse sechaba sa ka, ba re: “Khotso!” empa khotso e le sieo; ere ha sechaba sa ka se haha lerako le fokolang, ebe ba le ntlafatsa ka ho le lila ka phepa, ₁₁bolella bana ba lilang lerako ka phepa hore lerako leo le tla oa. Ho tla na pula ea litloèbèlèlè, e nang ka sefako se linaka, 'me moea oa sefefo o tla puka. ₁₂Ha lerako lee le se le oele, na sechaba ha se na ho le botsa, se re: “E kae phepa eo le neng le lile lerako ka eona?”

₁₃“ ‘Ka baka leo, Morena Molimo o re: Ha ke se ke halefile ke tla le heletsa ka moea oa sefefo, 'me ha ke se ke halefile ke tla nesa pula ea litloèbèlèlè e nang ka sefako se linaka hore e ripitle lerako leo. ₁₄Kahoo ke tla heletsa lerako lena, leo le le litseng ka phepa, ke etse hore le qhemetsehele fatše, e le hore mothèo oa lona o tle o bonahale. Ha lerako lena le e-oa, le tla le oela holimo le le timetse, 'me le tla tseba hore ke 'na Morena. ₁₅Khalefo ea ka ke tla e phethahatsa holim'a lerako lena, le holim'a ba ileng ba le lila ka phepa, ebe ke re ho lōna: Lerako le oele! Le ba le litseng ka phepa ba timetse, ₁₆e leng baporofeta ba Iseraele ba ileng ba porofetela Jerusalema, ba boneng lipono tse reng e tla ba le khotso, empa khotso e le sieo, ho rialo Morena.’ ”

₁₇“Ka mokhoa o joalo, uena ngoan'a motho, fahleho sa hao a se ke se talimane le barali ba sechaba sa heno, ba hlahisang boporofeta bo itsoelang mehopolong ea bona. Uena u porofete, u ba hanyetse, ₁₈u re: ‘Morena Molimo o bua tjena: Ho malimabe basali ba roesang batho lithōthō tsa boloi manonyeletsong a matsoho a bona, ba roesang ba baholo le ba banyenyane masira lihloohong tsa bona, e le hore ba hohele batho! Na le tla timetsa bophelo ba sechaba sa ka, ebe ba lōna lea bo baballa? ₁₉Na le tla ntlontlolla sechabeng sa ka hore le tle le khaketsoe harese, le fuoe le lithathana tsa bohobe, ebe le bolaea meea e neng e sa lokela ho shoa, le phelisa e neng e lokela ho shoa, ka ho thetsa sechaba sa ka se utloang mashano aa a lōna?

₂₀“ ‘Ka baka leo, Morena Molimo o bua tjena: Bonang mona, ke hanyetsana le lithōthō tsena tsa lōna tsa boloi, tseo ka tsona le tšoasang batho joalokaha eka ke linonyana. Ke tla li khaola matsohong a lōna, ke lokolle batho bana bao le ba tšoasang ka tsona joalokaha eka ke linonyana. ₂₁Ke tla tabola le masira a lōna, ke pholose sechaba sa ka matsohong a lōna. Se ke ke sa hlola se oela matsohong a lōna ho iketsetsa borata ka sona, 'me le tla tseba hore ke 'na Morena. ₂₂Ka baka la mashano a lōna le soabisitse ba lokileng, bao 'na ke sa ba soabisang; la khothaletsa ea khopo, hore a se ke a kheloha tsela ea hae e khopo, e le hore a tle a se ke a phela. ₂₃Ka baka leo, ha le sa tla hlola le bona lipono tsa mafeela, kapa hona ho nōha, hobane ke tla lopolla sechaba sa ka matsohong a lōna, 'me le tla tseba hore ke 'na Morena!’ ”