Seoa sa bohlano: Lefu la liphoofolo
1Joale Morena a re ho Moshe: “E-ea ho Faro, u bue le eena, u re: Morena Molimo oa Baheberu, o bua tjena, o re: ‘Lokolla sechaba sa ka, se e'o ntšebeletsa. 2Haeba u ntse u hana ho se lokolla, u ntse u se thibela, 3bona, Morena o tla bolaea liphoofolo tsa hao tse naheng: lipere, le litonki, le likamele, le mehlape ea likhomo, le ea linku, ka lefu la seoa le leholo haholo. 4Morena o tla khetholla liphoofolo tsa Baiseraele ho liphoofolo tsa Baegepeta, 'me ha ho letho le tla shoa ho tsohle tseo e leng tsa bana ba Iseraele.’ ”
5Morena o se a beile nako, a re: “Morena o tla etsa ntho ena hosasane naheng ena.” 6Morena a fela a etsa ntho ena ka la hosasane; liphoofolo tsohle tsa Baegepeta tsa e-shoa, empa ha se ke ha e-shoa phoofolo leha e le 'ngoe liphoofolong tsa bana ba Iseraele. 7Ke ha Faro a rōmela batho ho ea bona hore na ke 'nete, 'me ba fumana ho sa shoa phoofolo leha e le 'ngoe liphoofolong tsa bana ba Iseraele. Empa pelo ea Faro ea 'na ea thatafala, a se ke a lokolla sechaba hore se tsamaee.
Seoa sa botšelela: Mathōpa
8Joale Morena a re ho Moshe le ho Arone: “Ngoathang molora ka sebōping, le tlatse matsoho a lōna, 'me Moshe a o hasetse holimo, Faro a ntse a talimile. 9Molora oo o tla fetoha lerōle holim'a naha eohle ea Egepeta, 'me ha o oela holim'a batho le holim'a liphoofolo, naheng eohle ea Egepeta, o tla hlahisa lethōpa le tla fetoha liso tse phephethang bolalu.”
10Eaba ba ngoatha molora ka sebōping, ba ema kapele ho Faro. Moshe a o hasetsa holimo, 'me oa hlahisa mathōpa a ileng a etsa liso tse phephethang bolalu bathong le liphoofolong. 11Lingaka tsa hlōloa ho ema kapele ho Moshe, ka baka la liso, hobane liso li ne li tsoile lingaka le Baegepeta bohle. 12Empa Morena a 'na a thatafatsa pelo ea Faro, 'me a se ke a ba mamela, joalokaha Morena a ne a boleletse Moshe.
Seoa sa bosupa: Sefako
13Joale Morena a re ho Moshe: “U tle u tsohe ka malungoalungoana, u e'o ema kapele ho Faro, u re ho eena: Morena Molimo oa Baheberu, o bua tjena, o re: ‘Lokolla sechaba sa ka, se e'o ntšebeletsa. 14Ka nako ena ke tla rōmela lioa tsa ka tsohle ho uena, le ho bahlanka ba hao, le ho sechaba sa hao; e le hore u tle u tsebe hore ha ho ea kang 'na lefatšeng lohle. 15Haeba ke ne ke ile ka phahamisa letsoho la ka, ka u otla hammoho le sechaba sa hao ka lefu la seoa, u ka be u timetse lefatšeng, 16empa lebaka leo ke u babaletseng ka lona ke la hore u tle u bone matla a ka, le hore lebitso la ka le tle le tume lefatšeng lohle. 17Feela u sa ntsane u ikhantšetsa sechaba sa ka, u hana ho se lokolla. 18Bona, hosasane, ka eona nako ena, ke tla nesa sefako se linaka, seo ho e-song ho be se kang sona mona Egepeta, ho tloha mohla e simolohang, ho fihlela kajeno. 19Joale rōma batho, ba e'o phutha liphoofolo tsa hao, le tsohle tsa hao tse naheng, ba li koalle, hobane batho bohle le liphoofolo tsohle tse fumanoang li le naheng, li sa phuthoa tsa kenngoa ka litaleng, li tla tšoaroa ke sefako, 'me li tla shoa.’ ”
20Joale ea tšabang lentsoe la Morena, har'a bahlanka ba Faro, a balehisetsa makhoba a hae ka matlung, le liphoofolo tsa hae ka litaleng. 21Empa ea sa natseng lentsoe la Morena a tlohela makhoba a hae le liphoofolo tsa hae naheng.
22Morena a re ho Moshe: “Phahamisetsa letsoho la hao maholimong, hore ho tle ho ne sefako naheng eohle ea Egepeta; se nele batho, se nele liphoofolo, se nele limela tsohle tse naheng, mona naheng ea Egepeta.” 23Moshe a phahamisetsa molamu oa hae maholimong, Morena a lumisa letōlō, a nesa sefako; 'mane oa hlaba fatše, Morena a nesetsa sefako holim'a naha ea Egepeta. 24Sefako sa na, 'mane oa 'na oa tsekema har'a sefako se linaka, seo ho e-s'ong ho be se kang sona naheng eohle ea Egepeta, haesale naha eo e e-ba le baahi. 25Hohle naheng ea Egepeta, sefako sa ruthutha tsohle tse neng li le naheng, ho qala ka batho ho isa ho liphoofolo; sefako sa ruthutha limela tsohle tsa naha, le lifate tsohle tsa naha, sa li roba likotoana. 26Ke seterekeng sa Goshene feela, moo ho neng ho phela bana ba Iseraele, moo sefako se sa kang sa na teng.
27Eaba Faro o rōmela batho ho bitsa Moshe le Arone, 'me a re ho bona: “Ha e le kajeno ke sitiloe. Morena o lokile; 'na le sechaba sa ka ke rōna ba khopo. 28Nthapelleng ho Morena. Letōlō lena la Molimo le sefako, li feta tekanyo; ke tla le lokolla, 'me le ke ke la hlola le lula mona.”
29Moshe a re ho Faro: “Hang-hang ha ke e-tsoa motseng mona, ke tla phahamisetsa matsoho a ka ho Morena; letōlō le tla khaotsa, le sefako se ke ke sa hlola se e-ba teng, hore u tle u tsebe hore lefatše ke la Morena. 30Empa kea tseba hore uena le bahlanka ba hao le ntse le e-s'o tšabe Morena Molimo.”
31Motsitla le harese tsa ruthuthoa, hobane harese e ne e se e tsoetse, 'me motsitla o se o thuntse, 32empa koro le mabele tsona ha lia ka tsa ruthuthoa, hobane li jetsoe morao.
33Eaba Moshe o tloha ho Faro, o tsoa motseng, o phahamisetsa matsoho a hae ho Morena, 'me letōlō le sefako tsa khaotsa, le pula ea se ke ea hlola e pōtlelana. 34Eare ha Faro a bona hore pula, le sefako, le letōlō li khaolitse, a boela a tsoela pele ho etsa sebe. Eena le bahlanka ba hae ba 'na ba thatafatsa lipelo tsa bona. 35Pelo ea Faro ea 'na ea thatafala, 'me a se ke lokolla bana ba Iseraele, joalokaha Morena a ne a boletse ka molomo oa Moshe.
