Seoa sa bobeli: Lihohoana
1Eaba Morena o re ho Moshe: “E-ea ho Faro, u re ho eena: Morena o bua tjena, o re: ‘Lokolla sechaba sa ka, se tle se e'o ntšebeletsa! 2Haeba u hana ho se lokolla, bona, ke tla otla naha eohle ka lihohoana. 3Nōka e tla nyeunya lihohoana; li tla tsoa nōkeng, li kene ka tlung ea hao, le ka kamoreng ea hao ea ho robala le betheng ea hao, le ka matlung a bahlanka ba hao, le har'a sechaba sa hao; le ka libōping tsa hao, le ka lijaneng tsa hao tse lubelang bohobe. 4Lihohoana li tla tlōlela holim'a hao, le holim'a sechaba sa hao, le holim'a bahlanka ba hao bohle.’ ”
5Joale Morena a re ho Moshe: “E-re ho Arone: ‘Tšoara molamu, u otlollele letsoho la hoa holim'a linōka, le holim'a linōkana, le holim'a matša, u ntše lihohoana, li tlale naha ea Egepeta.’ ”
6Arone a otlollela letsoho la hae holim'a metsi a Egepeta, 'me ha tsoa lihohoana, tsa aparela naha ea Egepeta. 7Ka malepa a tsona, le tsona lingaka tsa etsa joalo, tsa tlisa lihohoana naheng ea Egepeta.
8Faro a bitsa Moshe le Arone, a re: “Rapelang Morena hore a tlose lihohoana tsena ho 'na le ho sechaba sa ka, 'me ke tla lokolla sechaba hore se e'o etsetsa Morena sehlabelo.”
9Eaba Moshe o re ho Faro: “E-ba mosa ho khetha nako eo ke tla u rapella ka eona, uena 'moho le bahlanka ba hao, le sechaba sa hao, hore lihohoana li tlosoe ho uena, le ka tlung ea hoa, li sale ka nōkeng feela.”
10Faro a re: “E be hosasane!”
Moshe a re: “A ho be joalokaha u bolela, e le hore u tle u tsebe hore ha ho ea kang Morena, Molimo oa rōna. 11Lihohoana li tla tloha ho uena, le matlung a hao, le ho bahlanka ba hao, le ho sechaba sa hao, li sale ka nōkeng feela.”
12Eaba Moshe le Arone ba tloha ho Faro; Moshe a ipiletsa ho Morena ka taba ea lihohoana tseo Morena a neng a li rōmetse ho Faro. 13Morena a etsa kamoo Moshe a boletseng kateng; lihohoana tsa shoela ka matlung, le mabaleng, le masimong. 14Ba li bōkella, ea e-ba liqubu-qubu, 'me naha ea nkha phu! 15Empa ha Faro a bona hore o imolotsoe, a thatafatsa pelo ea hae, a se ke a ba mamela, joalokaha Morena a ne a boletse.
Seoa sa boraro: Menoang
16Joale Morena a re ho Moshe:
“E-re ho Arone: ‘Phahamisa molamu oa hao, u otle lerōle la lefatše, le fetohe menoang naheng eohle ea Egepeta.’ ” 17Ba etsa joalo; Arone a otlolla letsoho la hae, a tšoere molamu, a otla lerōle la lefatše, 'me menoang ea hōmela batho le liphoofolo. Lerōle lohle la lefatše la fetoha menoang naheng eohle ea Egepeta. 18Ka malepa a tsona, lingaka le tsona tsa leka ho hlahisa menoang, empa tsa hlōleha; menoang ea hōmela batho le liphoofolo.
19Lingaka tsa re ho Faro: “Hona ke monoana oa Molimo.” Empa pelo ea Faro ea 'na ea thatafala, 'me a se ke a ba a ba mamela, joalokaha Morena a ne a boletse.
Seoa sa bone: Libōba
20Joale Morena a re ho Moshe: “U tsohe ka malungoalungoana, u e'o ema kapele ho Faro. Bona, o tla be a e-ea nōkeng, 'me uena u re ho eena: Morena o bua tjena, o re: ‘Lokolla sechaba sa ka, se tle se e'o ntšebeletsa. 21Empa ha u sa lokolle sechaba sa ka, ke tla rōmela libōba ho uena, le ho bahlanka ba hao, le ho sechaba sa hao, le matlung a hao. Matlo a Baegepeta a tla tlala libōba, le oona mobu oo a hahiloeng ho oona.
22“ ‘Mohl'a letsatsi leo, ke tla sekeletsa setereke sa Goshene, moo sechaba sa ka se ahileng teng, hore ho sona ho se be libōba; e le hore u tle u tsebe hore ke 'na Morena naheng ena. 23Ke tla etsa khethollo pakeng tsa sechaba sa ka le sechaba sa hao. Sesupo sena se tla etsahala hosasane.’ ”
24Morena a etsa joalo; ha fihla boieane ba libōba ka tlung ea Faro, le ka tlung ea bahlanka ba hae, le naheng eohle ea Egepeta, 'me naha ea senyeha ke libōba.
25Eaba Faro o bitsa Moshe le Arone, o re ho bona: “Tsamaeang, le e'o etsetsa Molimo oa lōna sehlabelo hona naheng ena!”
26Moshe a re: “Ha ho lumellehe hore re etse joalo, hobane re etsetsa Morena Molimo oa rōna, mahlabelo a liphoofolo tseo ho li hlaba e leng sebe ho Baegepeta. Bona mona, ha re ka etsa sehlabelo se joalo, e leng sebe ho Baegepeta, ra se etsa moo ba ntseng ba bona, na ha ba na ho re tlepetsa ka majoe? 27Re tšoanetse ho nka leeto la matsatsi a mararo, re ee lehoatateng, re e'o etsetsa Morena Molimo oa rōna, sehlabelo, kamoo a ka re laelang kateng.”
28Ke ha Faro a re: “Ke tla le lokolla, le tle le e'o etsetsa Morena Molimo oa lōna, sehlabelo lehoatateng. Feela le se ke la ea hōle, 'me le 'na le be le nthapelle.”
29Moshe a re: “Joale ke se ke tla tloha ho uena, ho ea rapela Morena, 'me hosasane libōba li tla tloha ho Faro, le ho bahlanka ba hae, le ho sechaba sa hae; feela Faro a khaotse ho 'na a re thetsa, a hana ho lokolla sechaba ho ea etsetsa Morena sehlabelo.”
30Eaba Moshe o tloha ho Faro, o ea ho rapela Morena. 31Morena a etsa kamoo Moshe a boletseng kateng, 'me libōba tsa tloha ho Faro, le ho bahlanka ba hae, le ho sechaba sa hae, ha se ke ha sala leha se le seng feela. 32Empa le nakong ena Faro a 'na a thatafatsa pelo ea hae, 'me a se ke a lokolla sechaba hore se tsamaee.
