1Eaba Molimo o re ho Moshe: “Joale u tla bona seo ke tla se etsa ho Faro. Ka letsoho la ka le matla, ke tla mo tlama hore a lokolle sechaba sa ka ka letsoho la ka le matla, ke tla mo tlama hore a se leleke.”
Molimo o bitsa Moshe hape
2Molimo a bua ho Moshe, a re: “Ke 'na Morena. 3Ke ile ka iponahatsa ho Aborahama, le ho Isaka, le ho Jakobo, ke le Molimo ea matla 'ohle, empa ha kea ka ka itsebisa bona ka lebitso la ka, ke le Morena. 4Hape ke ile ka etsa selekane sa ka le bona, e leng sa ho ba nea naha ea Kanana; naha ea bojaki ba bona, eo ba neng ba jakile ho eona. 5Hape ke bile ke utloile le sello sa bana ba Iseraele, bao Baegepeta ba ba entseng makhoba a bona, 'me ke hopotse selekane sa ka.
6“Ka baka leo, e-re ho bana ba Iseraele: ‘Ke 'na Morena; ke tla le imolla mejaro ea Baegepeta, ke le lopolle bokhobeng ba bona, ke le lopolle ka letsoho la ka le matla, le ka likahlolo tse boima. 7Ke tla le etsa sechaba sa ka, 'me ke tla ba Molimo oa lōna; le tla tseba hore ke 'na Morena Molimo oa lōna, eena ea le imolotseng mejaro ea Baegepeta. 8Ke tla le fihlisa naheng eo ke neng ke hlapanye hore ke tla e nea Aborahama, le Isaka, le Jakobo, 'me ke tla e nea lōna e be leruo la lōna. Ke 'na Morena.’ ”
9Moshe a bua tjena ho bana ba Iseraele, empa ha baa ka ba mo mamela, ka baka la ho nyahama lipelo, le ka baka la bokhoba bo thata.
10Eaba Morena o bua ho Moshe o re: 11“Tsamaea, u e'o bua le Faro, khosi ea Egepeta, u re a lokolle bana ba Iseraele ba tsoe naheng ea hae.”
12Empa Moshe a re ho Morena: “Bona, bana ba Iseraele ha baa ka ba 'mamela; joale Faro eena a ka 'mamela joang, 'na eo molomo oa ka o se nang bokheleke ba puo?”
13Joale Morena a bua ho Moshe le ho Arone, a ba nea taelo e amang bana ba Iseraele, le e amang Faro, khosi ea Egepeta, hore a lokolle bana ba Iseraele ba tsoe naheng ea Egepeta.
Lelōko la Moshe le la Arone
14Ana ke mabitso a lihlooho tsa malapa a Iseraele. Bara ba Rubene, letsibolo la Iseraele, ke Hanoke, le Palō, le Heserone, le Karimi. Ana ke 'ona malapa a Rubene.
15Bara ba Simeone ke Jemuele, le Jamine, le Ohade, le Jakine, le Sohara, le Shaule, mora oa mosali oa Mokanana. Ana ke 'ona malapa a Simeone.
16Ana ke mabitso a bara ba Levi, ka ho ea ka ho hlahlamana ha bona: Gereshone, le Kohate, le Merari. Levi o ile a phela lilemo tse lekholo le mashome a mararo a metso e supileng. 17Bara ba Gereshone ke Lebeni, le Shimei, ka ho ea ka malapa abo bona. 18Bara ba Kohate ke Amorame, le Isihare, le Heborone, le Usiele. Kohate o ile a phela lilemo tse lekholo le mashome a mararo a metso e meraro.
19Bara ba Merari ke Mahele le Mushi. Ana ke 'ona malapa a Balevi ka ho hlahlamana ha 'ona.
20Amorame a nka rakhali'a hae Jokobeta, hore e be mosali oa hae, 'me a mo tsoalla Arone le Moshe. Amorame a phela lilemo tse lekholo le mashome a mararo a metso e supileng.
21Bara ba Isihare ke Kora, le Nefege, le Sikeri. 22Bara ba Usiele ke Mishaele, le Elesafane, le Siteri.
23Arone a nka Elesheba, morali oa Aminadabe, khaitseli ea Nashone, hore e be mosali oa hae, 'me a mo tsoalla Nadabe, le Abihu, le Eleasare, le Itamare.
24Bara ba Kora ke Asire, le Elekana, le Abiasafe. Ana ke 'ona malapa a morabe oa Bakora.
25Eleasare, mora oa Arone, a nka e mong oa barali ba Putiele, hore e be mosali oa hae, 'me a mo tsoalla Finease.
Ana ke mabitso a lihlooho tsa Balevi, ho ea ka malapa a bona.
26Arone le Moshe ke bona bao Morena a neng a re ho bona: “Ntšang bana ba Iseraele naheng ea Egepeta, ho ea ka mabōtho a bona.” 27Ke bona bo-Arone le Moshe ba neng ba bue le Faro, khosi ea Egepeta, ba re a lokolle bana ba Iseraele, ba tsoe naheng ea Egepeta.
Taelo ea Morena ho Moshe le ho Arone
28Ka letsatsi leo Morena a neng a bue ka lona ho Moshe, ha a le naheng ea Egepeta, 29Morena o ne a re ho Moshe: “Ke 'na Morena! Bolella Faro, khosi ea Egepeta, tsohle tseo ke tla li bua ho uena.”
30Eaba Moshe o re ho Morena: “Bona, ha ke na bokheleke ba puo; joale Faro a ka 'mamela joang?”
