PHALLO 38

₁A etsa aletare ea secheso ka lithupa tsa sefate sa mositsane. Bolelele ba eona e ne e le limethara tse peli le lisenthimethara tse mashome a mabeli, bophara ba eona e le limethara tse peli le lisenthimethara tse mashome a mabeli, e ne e e-na le mahlakore a mane a lekanang; bophahamo ba eona e le methara e le 'ngoe le lisenthimethara tse mashome a mararo. ₂A etsa manaka a eona holim'a lihuku tse 'ne tsa eona; manaka ao a ne a entsoe ka thupa e le 'ngoe le aletare, 'me a a maneha lethose. ₃A etsa lintho tsohle tse sebelisoang aletareng: lithōthōbōlō, le likharashoana, le linoelo, le lifereko tse hlabang nama, le lipane; tsena tsohle tsa eona a li etsa ka lethose. ₄A etsetsa aletare mokhabiso o kang letlōoa le entsoeng ka lethose; a bea mokhabiso oo katlase ho aletare, o tloha tlase o il'o fihla bohareng ba aletare. ₅A etsa mefitšane e mene lintlheng tse 'ne tsa mokhabiso ona oa lethose, e le e khoesang mefeng. ₆A etsa mefeng ka lithupa tsa sefate sa mositsane, a e maneha lethose. ₇Mefeng eo a e khoesa mefitšaneng, mahlakoreng a aletare, hore aletare e tle e jaroe ka eona. A e etsa ka lithupa tse fatiloeng sekoti hare.

₈Eaba o etsa sekotlolo sa ho itlhatsoetsa, le seluloana sa sona; a li etsa ka lethose; a li etsa ka liipone tsa basali ba neng ba sebetsa monyakong oa Tente ea selekane.

₉A etsa seotloana ka lehlakoreng le ka nqeng ea boroa. Masela a lepeletseng a seotloana a ne a entsoe ka lene, a lōehile, bolelele ba 'ona e le limethara tse mashome a mane a metso e mene. ₁₀Litšiea tse ka lehlakoreng lena tse mashome a mabeli, le litšehetso tsa tsona tse mashome a mabeli, li ne li entsoe ka lethose. Lihokelo tsa litšiea, le mefapo ea tsona, e ne e le tse entsoeng ka silefera. ₁₁Ka lehlakoreng le ka leboea ho ne ho lepeletse masela a bolelele ba limethara tse mashome a mane a metso e mene. Litšiea tse ka lehlakoreng lena tse mashome a mabeli, le litšehetso tsa tsona tse mashome a mabeli, li ne li entsoe ka lethose. Lihokelo tsa litšiea, le mefapo ea tsona, e ne e le tse entsoeng ka silefera.

₁₂Ka lehlakoreng le ka bophirimela le teng ho ne ho lepeletse masela a bolelele ba limethara tse mashome a mabeli a metso e 'meli. Litšiea tsa 'ona li ne li le leshome, le litšehetso tsa tsona li le leshome. Lihokelo tsa litšiea, le mefapo ea tsona, li ne li entsoe ka silefera. ₁₃Ka lehlakoreng le ka bochabela ho ne ho lepeletse masela a bolelele ba limethara tse mashome a mabeli a metso e 'meli. ₁₄Bolelele ba masela a neng a lepeletse ka lehlakoreng le leng la monyako e ne e le limethara tse tšeletseng le lisenthimethara tse mashome a tšeletseng; a ne a e-na le litšiea tse tharo le litšehetso tsa tsona li le tharo. ₁₅Ka lehlakoreng la bobeli, ka nq'ena le ka nq'ane ho monyako oa seotloana, le teng ho ne ho lepeletse masela a bolelele ba limethara tse tšeletseng le lisenthimethara tse mashome a tšeletseng; a ne a e-na le litšiea tse tharo, le litšehetso tsa tsona li le tharo. ₁₆Masela 'ohle a lepeletseng, a pota-potileng seotloana, e ne e le a entsoeng ka lene, a lōehileng. ₁₇Litšehetso tsa litšiea li ne li entsoe ka lethose, lihokelo tsa litšiea, le lithupa tsa tsona, li ne li entsoe ka silefera. Lihlooho tsa tsona li ne li manehiloe silefera, 'me litšiea tsohle tsa seotloana li ne li hokahantsoe ka lithupa tse entsoeng ka silefera.

₁₈Lesira la monyako oa seotloana le ne le entsoe ke sehōmi, lesela le leputsoa, le le perese, le le lefubelu, le le entsoeng ka lene, le lōehileng. Bolelele ba lona e ne e le limethara tse robong; bophara ba lona e le limethara tse peli, hore le tšoane le masela a lepeletseng a seotloana. ₁₉Litšiea tsa lesira leo li ne li le 'ne, le litšehetso tsa lona li le 'ne, li entsoe ka lethose, lihokelo tsa tsona li entsoe ka silefera. Lihlooho tsa tsona li ne li manehiloe silefera, le lithupa tse li kopanyang e ne e le tsa silefera. ₂₀Limapo tsohle tsa Leaho, le tsa seotloana, ho potoloha, li ne li entsoe ka lethose.

₂₁Ena ke kakaretso ea lintho tsa Leaho, tse ileng tsa bokelloa, tsa Leaho la areka e kentseng matlapa a ngotsoeng Molao. Lintho tsena li ile tsa bokelloa ka taelo ea Moshe, ke Balevi, ba le taolong ea Itamare, mora oa moprista Arone.

₂₂Besalele, mora oa Uri, mora oa Hure, oa lelōko la Juda, a etsa tsohle tseo Morena a li laetseng Moshe. ₂₃O ne a thusoa ke Oholeabe, mora oa Ahisamake, oa lelōko la Dane. Oholeabe e ne e le lelala, le setsebi sa mesebetsi; le sehōmi se hōmang masela a maputsoa, le a perese, le a mafubelu, le a entsoeng ka lene, a lōehileng.

₂₄Khauta eohle e ileng ea sebelisoa mosebetsing oohle oa ho haha Sehalalelo, e ne e le khauta e tsoang limphong tsa baithaopi; e ne e etsa boima ba likilo tsa sekete, tse lekantsoeng ka tekanyo e sebelisoang ka Sehalalelong.

₂₅Silefera e neng e bōkeletsoe ke sechaba e ne e etsa boima ba likilo tse likete tse tharo le makholo a mane le mashome a mararo, tse lekantsoeng ka tekanyo e sebelisoang ka Sehalalelong. ₂₆Motho ka mong oa ba baliloeng, ho qala ka ea lilemo tse mashome a mabeli, ho ea holimo, a ntša keramo tse tšeletseng, tse lekantsoeng ka tekanyo e sebelisoang ka Sehalalelong. Palo ea ba ntšitseng ea e-ba likete tse makholo a tšeletseng a metso e meraro le makholo a mahlano le mashome a mahlano. ₂₇Ho ile ha sebelisoa silefera e etsang boima ba likilo tse likete tse tharo le makholo a mane, ho etsa litšehetso tsa Sehalalelo, le litšehetso tsa lesira: litšehetso tse lekholo tsa etsoa ka silefera e etsang boima ba likilo tse likete tse tharo le makholo a mane; setšehetso ka seng sa etsoa ka silefera e etsang boima ba likilo tse mashome a mararo a metso a mene. ₂₈Ka silefera e etsang likilo tse mashome a mararo, ha etsoa lihokelo tsa litšiea, litšiea tsa manehoa lihlooho, 'me ha etsoa lithupa.

₂₉Lethose la limpho tsa boithaopo le ne le etsa boima ba likilo tse likete tse peli le makholo a mane le mashome a mabeli a metso e mehlano. ₃₀Ka eona ha etsoa litšehetso tsa monyako oa Tente ea Morena, le aletare ea lethose, le mokhabiso oa lethose o kang letlōoa, le tsohle tsa aletare, ₃₁le litšehetso tse pota-potileng seotloana, le litšehetso tsa monyako oa seotloana, le limapo tsohle tsa Leaho, le limapo tsohle tse pota-potileng seotloana.