1“Joale Besalele, le Oholeabe, le batho bohle ba pelo le bohlale, bao Morena a ba neileng bohlale le kutloisiso ea ho tseba ho etsa mesebetsi eohle ea Sehalalelo, ba tla sebetsa, ba etse mesebetsi eo, ho latela tsohle tseo Morena a li laetseng.”
Sechaba se tlisa limpho tse ngata
2Eaba Moshe o bitsa Besalele le Oholeabe, le batho bohle ba pelo li bohlale, bao Morena a ba neileng bohlale lipelong tsa bona, ba ratang, hore ba tle mosebetsing, ba sebetse. 3Ba amohela limpho tsohle ho Moshe, tseo bana ba Iseraele ba li tliselitseng mosebetsi oa hore ho hahoe Sehalalelo ka tsona. Ba 'na ba tlisa limpho tsa boithaopo ho eena hoseng ho hong le ho hong. 4Banna bohle ba bohlale, ba etsang mosebetsi oohle oa Sehalalelo, ba tlohela mosebetsi oo ba neng ba o etsa, ba tla. 5Ba bua le Moshe, ba re: “Sechaba se tlisa lintho tse ngata ho feta tse hlokoang bakeng sa ho etsa mosebetsi oo Morena a laetseng hore o etsoe.”
6Joale Moshe a laela hore ho hlajoe mokhosi liahelong, ho thoe: “Banna le basali ba se ke ba hlola ba tlisa limpho tsa mosebetsi oa Sehalalelo.” Eaba sechaba se khaotsa ho tlisa limpho. 7Tse ntšitsoeng li ne li lekane ho etsa mosebetsi oa Sehalalelo, li be li sale.
Ho etsoa Leaho
8Banna bohle ba bohlale har'a basebetsi ba etsa Leaho ka masira a leshome, a lesela la lene, a lōehileng, le a maputsoa, le a perese, le a mafubelu, 'me sehōmi sa setsebi sa hōma litšoantšo tsa likerubime ho 'ona. 9Bolelele ba lesira ka leng e ne e le limethara tse leshome le metso e 'meli, bophara ba lesira ka leng e le limethara tse peli, 'me masira 'ohle a ne a lekana. 10Ba rokahanya masira a mahlano 'moho; le a mang a mahlano hape ba a rokahanya 'moho. 11Ba etsa likhoketsane ka lesela le leputsoa ntlheng ea lesira la pele, moo masira a kopanang teng, 'me ba etsa joalo le ntlheng ea lesira la bobeli, moo masira a kopanang teng. 12Ba etsa likhoketsane tse mashome a mahlano lesireng la pele; ba etsa hape likhoketsane tse ling tse mashome a mahlano ntlheng ea lesira la bobeli, moo masira a kopanang teng. Likhoketsane li ne li tobane. 13Ba etsa lihokelo tsa khauta tse mashome a mahlano, 'me masira a hokahanngoa ka bobeli ka lihokelo, Leaho a e-ba ntho e le 'ngoe.
14Ka boea ba lipoli ba etsa masela a koahelang Leaho; ba etsa masela a leshome le motso o mong. 15Bolelele ba lesela ka leng e ne e le limethara tse leshome le metso e meraro, bophara ba lesela ka leng e le limethara tse peli, 'me masela ao a leshome le motso o mong a ne a lekana. 16Ba rokahanya masela a mahlano 'moho, le a mang a tšeletseng ba a rokahanya 'moho. 17Ba etsa likhoketsane tse mashome a mahlano ntlheng ea lesela la pele, moo masela a kopanang teng; le likhoketsane tse mashome a mahlano ntlheng ea lesela la bobeli, moo masela a kopanang teng. 18Ba etsa lihokelo tse mashome a mahlano tsa lethose, ho kopanya masela ana hore e be ntho e le 'ngoe. 19Ba etsetsa Tente ena marulelo ka matlalo a lipheleu a 'masa; ba e etsetsa marulelo a mang a kaholimo ho ao ka matlalo a liqibi.
20Eaba ba etsetsa Leaho litšiea tsa lithupa tse hlongoang, tsa sefate sa mositsane. 21Bolelele ba thupa ka 'ngoe e ne e le limethara tse 'ne, 'me bophara ba thupa ka 'ngoe e ne e le lisenthimethara tse mashome a tšeletseng a metso e tšeletseng. 22Ba etsa limapo tse peli, tse bapileng, thupeng e 'ngoe le e 'ngoe, 'me ba etsa joalo ka lithupa tsohle tsa Leaho. 23Ba etsetsa Leaho litšiea tse mashome a mabeli ka lehlakoreng le ka boroa. 24Ba etsetsa litšiea tseo tse mashome a mabeli litšehetso tsa silefera tse nang le mekotjana, tse mashome a mane. Ho ne ho e-na le litšehetso tse peli katlas'a tšiea e 'ngoe le e 'ngoe, moo limapo tse peli tsa eona li kenang teng. 25Ka lehlakoreng la bobeli la Leaho, e leng le ka leboea, ba etsa litšiea tse mashome a mabeli. 26Ba etsa le litšehetso tsa tsona tsa silefera, tse mashome a mane, moo limapo tse peli tsa tšiea ka 'ngoe li kenang teng.
27Lehlakoreng le kamorao la Leaho, e leng le ka bophirimela, ba etsa litšiea tse tšeletseng. 28Ba etsa litšiea tse peli lihukung tsa lehlakore le kamorao la Leaho. 29Tsa kopanngoa ho tloha fatše, ho ea fihla holimo, moo ho nang le mofitšane oa pele. Litšiea tsena tse peli tse lihukung, tsa etsoa joalo. 30Ho ne ho e-na le litšiea tse robeli, le litšehetso tsa silefera tse leshome le metso e tšeletseng; tse peli li le katlas'a tšiea e 'ngoe le e 'ngoe.
31Ba etsa maballo ka lithupa tsa sefate sa mositsane. Maballo a mahlano a ba kaholim'a litšiea tse ka lehlakoreng le leng la Leaho; 32le a mang a mahlano a ba kaholim'a litšiea tse ka lehlakoreng le leng la Leaho, 'me a mang a mahlano hape a ba kaholim'a litšiea tse ka lehlakoreng le kamorao la Leaho, ka nqeng ea bophirimela. 33Ba etsa leballo le bohareng ba Leaho, le tlohang ntlheng e 'ngoe ea lona, ho isa ho e 'ngoe. 34Litšiea tsena ba li maneha khauta, ba li etsetsa mefitšane ea khauta, eo ho khoesoang maballo ho eona, 'me maballo ao le 'ona ba a maneha khauta.
35Ba etsa lesira ka lesela le leputsoa, le le perese, le le lefubelu, le la lene, le lōehileng; le entsoeng ke setsebi, le hōmiloeng litšoantšo tsa likerubime. 36Ba le etsetsa litšiea tse 'ne ka lithupa tsa sefate sa mositsane, tse manehiloeng khauta. Li ne li e-na le lihokelo tsa khauta. Ba li etsetsa litšehetso tse 'ne tsa silefera.
37Ba etsa le lesira la monyako oa Tente ka lesela le leputsoa, le le perese, le le lefubelu, le la lene, le lōehileng; la etsoa ke sehōmi. 38Ba etsa le litšiea tsa lona tse hlano, le lihokelo tsa tsona. Ba maneha khauta holim'a lihlooho tsa tsona, le holim'a lithupa tse li kopanyang. Litšehetso tsa tsona tse hlano ea e-ba tsa lethose.
