PHALLO 31

₁Morena a bua ho Moshe, a re: ₂“Bona, ke bitsitse Besalele, mora oa Uri, mora oa Hure, oa lelōko la Juda. ₃Ke mo file Moea oa Molimo, le bohlale, le kelello, le tsebo ea mesebetsi eohle: ₄ho rala litšoantšo tsa mesebetsi e etsoang, le ho sebetsa ka khauta, le ka silefera, le ka lethose; ₅le ho betla majoe a tla kenngoa mekhabisong, le ho betla lithupa, le ho etsa mesebetsi eohle. ₆Ke mo neile le Oholeabe, mora oa Ahisamake, oa lelōko la Dane. Bohle ba bohlale ke ba file tsebo, 'me ba tla etsa tsohle tseo ke ba laetseng tsona. ₇Ba tla etsa Tente ea Morena, le areka ea selekane, le sekoahelo sa tefelo ea sebe se holim'a eona, le tsohle tse sebelisoang ka Tenteng ea Morena; ₈le tafole, le tsohle tsa eona; le seluloana sa lebone sa khauta e hloekileng, le tsohle tsa sona; le aletare ea mokubetso, ₉le aletare ea secheso, le tsohle tsa eona; le sekotlolo sa ho itlhatsoetsa, le seluloana sa sona; ₁₀le liaparo tse lōhiloeng, le liaparo tse halalelang tsa Arone, moprista, le liaparo tsa bara ba hae tsa ha ba sebeletsa e le baprista; ₁₁le ole e tlotsang, le mokubetso o monko o monate oa Sehalalelo. Ba tla etsa tsohle ho ea kamoo ke u laetseng kateng.”

₁₂Morena a boela a re ho Moshe: ₁₃“Uena u bue le bana ba Iseraele, u re: ‘Ruri le tla bōlōka Lisabatha tsa ka, hobane ke sesupo pakeng tsa ka le lōna, le melōko eohle ea lōna, hore le tsebe hore ke 'na Morena, mohalaletsi oa lōna.

₁₄“ ‘Joale le tla hlompha letsatsi la Sabatha, hobane lea halalela ho lōna; ba le hlomphollang, ruri ba tla bolaoa. Bohle ba etsang mesebetsi ka letsatsi leo, ba tla khaoloa sechabeng sa habo bona. ₁₅Ho ka sebetsoa ka matsatsi a tšeletseng, empa letsatsi la bosupa ke la Sabatha, la ho phomola, 'me lea halalela ho Morena. Bohle ba ka etsang mesebetsi ka letsatsi la Sabatha, ruri ba tla bolaoa. ₁₆Bana ba Iseraele, ba melōko eohle ba tla bōlōka letsatsi la Sabatha, ba hlokomele letsatsi la Sabatha, e le selekane sa mehla eohle. ₁₇Ke sesupo sa mehla eohle pakeng tsa ka le bana ba Iseraele, hobane Morena o ile a etsa leholimo le lefatše ka matsatsi a tšeletseng, 'me ka letsatsi la bosupa a phomola, a ka a re khefu!’ ”

₁₈Molimo ha a qeta ho bua ho Moshe a le thabeng ea Sinai, a mo nea matlapa a mabeli a ngotsoeng Molao, matlapa a ngotsoeng ka monoana oa Molimo.