Sefela sa Moshe
1Eaba Moshe le bana ba Iseraele ba binela Morena sefela sena, ba re:
“Ke tla binela Morena,
hobane ruri o itlotlisitse ka tlhōlo;
o lahletse pere
le mopalami oa eona
ka leoatleng.
2Morena ke matla a ka;
le thoko ea ka;
ke eena ea mpholositseng,
ke Molimo oa ka,
'me ke tla mo rorisa,
ke Molimo oa ntate,
'me ke tla mo tlotlisa.
3Morena ke mohlabani,
lebitso la hae ke Morena.
4O lihetse likariki tsa Faro,
le mabōtho a hae ka leoatleng,
mokhetho oa balaoli ba hae,
oa teba Leoatleng la Lehlaka.
5Boliba bo ba pupelitse,
ba theohetse tlase-tlase joaloka lejoe.
6“Morena, tsoho la hao le letona
le tlotlisitsoe ka matla,
Morena, tsoho la hao le letona
le thuakantse sera.
7Ka boholo ba botlōtlehi ba hao,
u liha ba u tsohelang matla;
khalefo ea hao ha e tuka
e ba chesa joaloka 'mōkō.
8Ka moea o tsoang nkong tsa hao
metsi a bokellana,
metsi a phallang
a ema joaloka lerako,
maliba a tuluana
botebong ba leoatle.
9“Sera se ile sa re:
‘Ke tla ba phalalisa, ke ba tšoare;
ke arole khapo, ke khotsofale.
Ke tla hula sabole ea ka,
ka tsoho la ka ke ba timetse.’
10U ile ua fokisa moea oa hao,
leoatle la ba koahela,
ba teba joaloka loto
metsing a tšabehang.
11“Morena, ke mang
ea kang uena har'a melimo?
Ke mang ea kang uena,
ea tlōtlehang ka khalalelo?
Ea tšabehang ka botumo?
Ea etsang mehlolo?
12U ile ua otlolla
letsoho la hao le letona,
eaba lefatše lea ba metsa.
13“Ka mohau oa hao
ua tsamaisa sechaba,
sechaba seo u se lopolotseng,
ka matla a hao ua se isa liahelong,
liahelong tsa hao tse halalelang.
14Lichaba tsa utloa,
'me tsa thōthōmela,
baahi ba Filesitiea
ba tšoaroa ke tšabo.
15Marena a Edomo a ile a ferekana,
mahosana a Moabe
a otlanya mangoele,
baahi bohle ba Kanana ba nyamela.
16Tšabo le thōthōmelo
tsa ba oela holimo,
ka matla a tsoho la hao
ba khutsitse joaloka majoe,
ho fihlela chaba sa hao se feta,
chaba sa hao Morena,
ho fihlela chaba seo se feta,
seo u iphumanetseng sona.
17U ba fihlisitse,
'me ua ba ahisa thabeng ea hao,
sebakeng seo
u se entseng leaho la hao, Morena,
Sehalalelong se entsoeng
ka matsoho a hao, Morena.
18Morena o tla busa
kamehla le mehla!”
19Lipere tsa Faro, le likariki tsa hae tsa ntoa, le bapalami ba hae, ba ile ba kena leoatleng, 'me Morena a khutlisetsa metsi a leoatle holim'a bona, empa bana ba Iseraele bona ba tsamaea har'a leoatle, mobung o ommeng.
Sefela sa Meriama
20Eaba Meriama oa moporofeta, khaitseli ea Arone, o nka morōpa ka letsoho la hae; basali bohle ba tsoa, ba mo sala morao, ba nkile merōpa, 'me ba etsa motjeko. 21Meriama a phokola sefela, a re:
“Binelang Morena,
hobane ruri o itlotlisitse,
o itlotlisitse ka tlhōlo,
o lahletse pere
le mopalami oa eona
ka leoatleng.”
Metsi a babang a Mara
22Joale Moshe a tlosa Baiseraele Leoatleng la Lehlaka, ba ea lehoatateng la Shure. Ba tsamaea lehoatateng ka matsatsi a mararo, empa ba se ke ba fumana metsi. 23Ba fihla Mara, empa ba sitoa ho noa metsi a Mara, hobane a ne a baba. Ke ka lebaka lena sebaka seo se reiloeng lebitso la Mara. 24Sechaba sa korotlela Moshe, sa re: “Re tla noa eng?”
25Eaba Moshe o ipiletsa ho Morena, 'me Morena a 'montša sefate. Moshe a nka lekala la sona a le lahlela ka metsing, 'me metsi a e-ba monate.
Morena a ba beela molao le taelo, a ba a ba leka hona moo, 26'me a re: “Haeba le hlile le mamela lentsoe la Morena Molimo oa lōna, 'me le etsa ho lokileng mahlong a hae; le sekehela litaelo tsa hae tsebe, le bōlōka melao eohle ea hae, nke ke ka le otla ka mafu 'ohle ao ke ileng ka otla Baegepeta ka 'ona, hobane ke 'na Morena, Mofolisi oa hao.”
27Joale ba fihla Elime, moo ho neng ho e-na le liliba tse leshome le metso e 'meli, le lifate tse mashome a supileng tsa lipalema, 'me ba hloma litente tsa bona pel'a metsi.
