Matsibolo a khetheloe Morena
1Morena a bua ho Moshe, a re: 2“Nkhethele matsibolo 'ohle. Letsibolo le leng le le leng har'a bara ba Iseraele, la motho le la phoofolo, ke la ka.”
Mokete oa bohobe bo sa lomosoang
3Moshe a re ho sechaba: “Hopolang letsatsi lena, leo ka lona le tsoileng Egepeta, moo le neng le le makhoba teng, hobane Morena o le ntšitse teng ka letsoho la hae le matla. Le se ke la ja bohobe bo lomositsoeng. 4Kajeno lena, ka khoeli ea 'Mesa, lea tsamaea. 5Ha Morena a le fihlisa naheng ea Bakanana, le ea Bahete, le ea Baamore, le ea Bahife, le ea Bajebuse, eo a ileng a e hlapanyetsa bo-ntat'a lōna, hore o tla le nea eona, e leng naha e phallang lebese le mahe a linotši, le tle le etse tšebeletso ena, ka khoeli ena. 6Ka matsatsi a supileng le je bohobe bo sa lomosoang, 'me ka letsatsi la bosupa e be mokete oa Morena. 7Ka matsatsi a supileng le je bohobe bo sa lomosoang; bohobe bo lomositsoeng bo se ke ba bonoa mahalōna; le litomoso li se ke tsa bonoa naheng ea lōna. 8Ka letsatsi lena u tla bolella mora oa hao, u re: ‘Ke etsa hona ka baka la seo Morena a ileng a nketsetsa sona, mohla ke tsoang Egepeta.’ 9Tšebeletso ena e tla ba khopotso, joalokaha eka ke letšoao le entsoeng letsohong la hao, kapa phatleng ea hao, hore u 'ne u bolele Molao oa Morena oa hao, hobane Morena o u ntšitse Egepeta ka letsoho la hae le matla. 10U tla bōlōka taelo ena ka nako ea teng, ka selemo se seng le se seng.
Matsibolo
11“E tle ere ha Morena a se a u fihlisitse naheng ea Kanana joalokaha a ile a u hlapanyetsa, uena le bo-ntat'ao, hore o tla u nea eona, 12u tle u khethele Morena matsibolo 'ohle a batho, le matsibolo a liphoofolo tsohle tsa hao. Tsohle tse tona ke tsa Morena. 13Matsibolo 'ohle a litonki u tla a lopolla ka konyana, 'me ha u sa a lopolle, u a sothe melala. Matsibolo 'ohle a ba batona a bana ba hao u a lopolle.
14“Ka nako e tlang, ha mora oa hao a u botsa, a re: ‘Hoo ke eng?’ uena u tle u re ho eena: ‘Ka letsoho la hae le matla, Morena o re ntšitse Egepeta, moo re neng re le makhoba teng. 15E ile eare ha Faro a ngangella, a hana ho re lokolla, Morena a bolaea matsibolo 'ohle naheng ea Egepeta, ho qala ka matsibolo a batho, ho isa ho matsibolo a liphoofolo. Ke ka lebaka lena ke etsetsang Morena sehlabelo ka letsibolo le leng le le leng le letona, empa matsibolo a matona, a bara ba ka, kea a lopolla.’ 16Tšebeletso ena e tla ba khopotso, joalokaha eka ke letšoao le entsoeng letsohong la hao, kapa phatleng ea hao; e re hopotsa hore Morena o ne a re ntše Egepeta ka letsoho la hae le matla.”
Leru le lopaletseng le khanare ea mollo
17Ha Faro a se a lokolotse sechaba, Molimo ha aa ka a se tsamaisa ka tsela ea Filesitiea, leha e ne e le haufi, hobane Molimo o ne a re: “Mohlomong sechaba se ka tšoha se koeneha ha se bona ntoa, 'me sa khutlela Egepeta.” 18Empa Molimo a tsamaisa sechaba seo ka tsela e potang lehoatateng, e lebang Leoatleng la Lehlaka. Bana ba Iseraele ba nyoloha naheng ea Egepeta ba hlometse.
19Moshe a nka masapo a Josefa, hobane Josefa o ne a ile a hlapantša bana ba Iseraele, a re: “Ruri Molimo o tla le etela; le tle le nyolohe le masapo a ka ha le tloha mona.”
20Ba tsamaea ho tloha Sukote, 'me ba fihla ba hloma Ethame, meeling ea lehoatata. 21Motšeare Morena o ne a ba eteletse pele ka leru le lopaletseng, ho ba bontša tsela; bosiu ka khanare ea mollo, ho ba bonesetsa, hore ba tsebe ho tsamaea bosiu le motšeare. 22Leru le lopaletseng le 'nile la ba kapele ho sechaba motšeare, le khanare ea mollo kapele ho sona bosiu.
