Pheletso ea bohle ea tšoana
1Tsena tsohle ke ile ka li nahana, ka leka ho li hlalosa, ka fumana hore ba lokileng le ba bohlale, hammoho le mesebetsi ea bona, ba matsohong a Molimo. Hore na baa ratoa kapa ba hloiloe, le teng ha ba tsebe; motho ha a tsebe se mo tlelang. 2Bohle ba hlaheloa ke ntho e tšoanang: Ea lokileng le ea khopo, ea molemo le e mobe, ea hloekileng le ea sa hloekang, ea etsang mahlabelo le ea sa etseng mahlabelo. Ea etsang hantle o tšoana le moetsalibe; ea hlapanyang o tšoana le ea sa hlapanyeng.
3Bona ke bona bobe bo teng linthong tsohle tse etsahalang mona lefatšeng. Bohle ba hlaheloa ke ntho e tšoanang. Lipelo tsa batho li tletse bokhopo, li bile li na le bohlanya ha batho bao ba sa ntsane ba phela, 'me hamorao ba balelloa le bafu. 4Ea ntseng a phela o sa na le letšepa, hobane le ntja e phelang e molemo ho feta tau e shoeleng.
5Ba phelang bona
baa tseba hore ba tla shoa,
athe bafu bona
ha ho letho leo ba le tsebang,
moputso le oona
ha ba ka ke ba o fumana,
esita le ho hopoloa
ha ba sa hopoloa.
6Lerato le lehloeo le lefufa la bona,
tsena tsohle li timetse le bona;
ha ba ka ke ba hlola
ba e-ba le kabelo
ho tsohle tse etsoang
mona lefatšeng.
7E-ea, u itjelle lijo ka thabo,
u inoelle veine u nyakaletse,
hoba Molimo o s'a khahlisitsoe
ke ketso tsa hao.
8Kamehla u apare aparo tse tšoeu,
kamehla hlooho ea hao
e tlotsoe ka ole.
9Ka matsatsi 'ohle a bophelo ba hao ba lefeela, boo Molimo a u neileng bona mona lefatšeng, e leng matsatsi a se nang thuso, iphelele ka thabo le mosali oa hao eo u mo ratang. Ona ke oona moputso oo u o fumanang ha u ntse u phela, 'me u sebetsa ka thata mona lefatšeng. 10Tsohle tseo u ka li etsang, u li etse ka matla a hao kaofela, hobane lebitleng, moo u eang teng, ha ho sa na mosebetsi, kapa merero, kapa tsebo, kapa bohlale.
11Ke bone ho hong hape mona lefatšeng:
Ba lebelo
hase bona ba sieang kamehla,
linatla
hase tsona tse hlōlang kamehla,
ba bohlale
hase bona ba chaeang kamehla,
ba masene
hase bona ba ruang kamehla,
bahlalefi ha ba lule
tulo tse phahameng kamehla;
menyetla e tlela bohle
ka linako tsa eona.
12Hape ha ho motho ea tsebang hore na nako ea hae e tla tla neng:
Joalokaha tlhapi li tšoasoa
ke tlōoa le sehlōhō,
kapa linonyana li tšoasoa
ke leraba,
batho le bona ba tšoasoa
ke nako tse mahlōnōkō,
li ba tsometse ba sa lebella letho.
Bohlale bo molemo ho feta bothoto
13Ke bone bohlale bona bo bong hape mona lefatšeng, 'me ha ke bo talima ke bona bo le boholo: 14Ho kile ha e-ba le motsana o nang le baahi ba seng bakae. Eaba khosi e 'ngoe e matla ea o futuhela, e o etsetsa thibella, e haha marako ho o pota-pota. 15Motsaneng oo ho ne ho e-na le monna e mong ea futsanehileng, ea bohlale, eo ka bohlale ba hae a ileng a o lopolla; feela ha ho ea kileng a mo hopola. 16Eaba ke re: “Bohlale bo molemo ho feta bonatla!” Empa bohlale ba monna ea futsanehileng boa nyelisoa, le lipolelo tsa hae ha li mameloe.
17Polelo tse bonolo,
tse buuoang ke mohlalefi,
li molemo ho feta mehoo
ea ea busang lithoto.
18Bohlale bo molemo
ho feta hlomo tsa ntoa,
molibe ea mong
o senya tse ngata tse molemo.
