MORUTI 3
Tsohle li beetsoe linako
1Lintho tsohle
li beetsoe linako tsa tsona,
nako tsa ho etsa tsohle
mona lefatšeng:
2Ke nako ea ho tsoaloa
le nako ea ho shoa,
nako ea ho hloma
le nako ea ho hlomola;
3nako ea ho bolaea
le nako ea ho folisa,
nako ea ho heletsa
le nako ea ho haha;
4nako ea ho lla
le nako ea ho tšèha,
nako ea masoabi
le nako ea mohobelo;
5nako ea ho lahla majoe
le nako ea ho a phutha,
nako ea ho akana
le nako ea ho se akane;
6nako ea ho batla
le nako ea ho tela,
nako ea ho boloka
le nako ea ho lahla;
7nako ea ho tabola
le nako ea ho rōka,
nako ea ho khutsa
le nako ea ho bua;
8nako ea ho rata
le nako ea ho hloea,
nako ea ntoa
le nako ea khotso.
9Mosebetsi oo motho a o fufulelloang o 'museletsa eng? 10Ke bone mosebetsi o boima oo Molimo a o neileng batho hore ba o sebetse. 11O entse hore ntho e 'ngoe le e 'ngoe e lokele nako ea eona; o neile batho takatso ea ho tseba tsa khale le tse tlang ho tla, empa ha ba na ho fihlela kutloisiso ea seo Molimo a se entseng ho tloha tšimolohong ho isa qetellong.
12Kea tseba hore ha ho letho le molemo ho motho, haese feela ho ithabisa le ho etsa tse ntle ha a sa ntsane a phela. 13Ha motho ka mong a e-ja, a e-noa, a fumana tse molemo ka mesebetsi ea hae, hoo ke mpho ea Molimo. 14Ke tseba le hore tsohle tseo Molimo a li etsang li tla hlola kamehla eohle. Ha ho letho leo motho a ka le eketsang kapa a le fokotsa ho tsona. Molimo o etsa tsena hore batho ba tle ba mo tšabe.
15Tse teng ha li qale ho ba teng,
tse tla ba teng li bile teng pele;
Molimo o etsa hore tsohle li sene,
li suthelane sebaka.
Tōka ha e eo lefatšeng
16Mona lefatšeng
ka boela ka bona hona:
Sebakeng sa kahlōlo
ka bona bokhopo,
sebakeng sa toka
ka bona bokhopo.
17Eaba ke bua ka pelo, ke re:
“Molimo o tla ahlōla
ea lokileng le ea khopo;
ntho ka 'ngoe
e na le nako ea eona,
ketso ka 'ngoe
e na le nako ea eona.”
18Ka boela ka bua ka pelo, ka re: “Molimo o bea batho tekong, hore ba tle ba lemohe hore ba tšoana le liphoofolo. 19Tse hlahelang liphoofolo li hlahela le batho. Pheletso ea bona e tšoana le ea liphoofolo; batho ba shoa joaloka liphoofolo. Motho o phefumoloha moea o tšoanang le oo phoofolo e o phefumolohang. Motho ha a fete phoofolo ka letho, hobane tsohle ke lefeela. 20Ntho tsohle li fella nqa e le 'ngoe; tsohle li tsoa lerōleng, 'me tsohle li khutlela lerōleng. 21Ke mang ea tsebang hore na moea oa motho o nyolohela holimo, oa phoofolo oona o theohela tlas'a lefatše?”
22Ka baka leo ke bone hore ha ho letho le molemo ho feta hore motho a ithabise ka tseo a li entseng, hobane hoo ke eona kabelo ea hae. Ke mang ea ka etsang hore motho a bone tse tla etsahala ha a se a shoele?
© Bible Society of South Africa 1989. Used with permission. All rights reserved.
