LIPOLELO 8

₁“Melao eohle eo ke le laelang eona kajeno, le hlokomele hore le e phethe, le tle le phele, le ngatafale, le kene naheng eo Morena a e hlapanyelitseng bo-ntat'a lōna, 'me e be ea lōna. ₂Le hopole leeto lohle leo Morena Molimo oa lōna, a le tsamaisitseng lona lehoatateng ka lilemo tsena tse mashome a mane. O ile a le kokobetsa, a le leka, hore a bone se ka lipelong tsa lona, hore na le tla bōlōka melao ea hae kapa che. ₃O ile a le kokobetsa, a le bolaisa tlala, a le fepa ka manna ao lōna le bo-ntat'a lōna le neng le sa a tsebe, hore le tle le tsebe hore motho ha a phele ka bohobe feela, empa o phela le ka polelo e 'ngoe le e 'ngoe e tsoang molomong oa Morena. ₄Liaparo tsa lōna ha lia ka tsa taboha, le maoto a lōna ha aa ka a ruruha ka lilemo tsena tse mashome a mane. ₅Tsebelang ka lipelong tsa lōna hore, joalokaha ntata a khalemela mora oa hae, le Morena Molimo oa lōna, o le khalemela joalo. ₆Le bōlōke melao ea Morena Molimo oa lōna, le tsamaee litseleng tsa hae, le mo tšabe.”

₇“Morena Molimo oa lōna, o le isa naheng e ntle, naha e nang le linōkana tse phallang metsi; naha ea liliba le mehloli e kopotsang likhohlong le lithabeng. ₈Naha ea koro, le harese, le morara, le lifate tsa feiee, le likharenate; naha ea lifate tsa mohloaare, le mahe a linotši; ₉naha e sa hlokeng letho, eo ho eona le tla ja, le se ke la hloka letho; naha eo majoe a eona a nang le tšepe, eo lithabeng tsa eona le tlang ho cheka lethose. ₁₀Le tla ja, le khore, 'me le hlohonolofatse Morena Molimo oa lōna, ka baka la naha e ntle eo a le neileng eona.”

₁₁“Itlhokomeleng, esere la lebala Morena Molimo oa lōna, ka ho se bōlōke melao ea hae, le litaelo tsa hae, le litemoso tsa hae, tseo ke le laelang tsona kajeno; ₁₂esere ha le jele, le khotše, le hahile matlo a matle, le lula ho 'ona; ₁₃mehlape ea lōna ea likhomo le ea linku e atile; le silefera ea lōna le khauta ea lōna li eketsehile; le atetsoe ke tsohle tseo le nang le tsona, ₁₄eaba lipelo tsa lōna lia ikhōhōmōsa, le lebala Morena Molimo oa lōna, ea le ntšitseng naheng ea Egepeta, moo le neng le le makhoba teng. ₁₅Ke eena ea le tsamaisitseng lehoatateng le leholo, le tšabehang, moo ho nang le linōha tse mahlōkō a bohale, le liphepheng; le naheng e omeletseng, moo ho neng ho se na metsi, empa a le fa metsi a tsoang lefikeng la morallana. ₁₆Ha le le lehoatateng, Morena o ile a le fepa manna, ao bo-ntat'a lōna ba neng ba sa a tsebe, hore a le kokobetse, a le leke, qetellong a tle a le etsetse tse molemo. ₁₇Ho seng joalo, ka lipelong tsa lōna le ne le tla re: ‘Matla a rōna, le matla a matsoho a rōna, ke 'ona a re ruisitseng.’ ₁₈Empa le hopole Morena Molimo oa lōna, hobane ke eena ea le neang matla a hore le rue, hore a phethahatse selekane sa hae, seo a se hlapanyelitseng bo-ntat'a lōna, joaloka kajeno.

₁₉“Haeba le ka lebala Morena Molimo oa lōna, la latela melimo e meng, la e sebeletsa, la e khumamela, kajeno kea le tiisetsa hore ruri le tla timela. ₂₀Le tla timela joaloka lichaba tseo Morena a li timelitseng moo le ntseng le bona; le lōna le tla timela joalo, hobane ha lea ka la mamela lentsoe la Morena Molimo oa lōna.”